1 RAMPAUBE Sarah mapie beuzie lie pa kerang nzwa pe mapie beu, nah RAMPAUBE Pa sampet kebeu nzwa Sarah ziemne teicang gaibeu. 2 Sarah tetlaklu nah Abraham de pa cing kedi caine mipeina ge Tinggwang ne pedage rang kebeu ting gap dau mnalu. 3 Abraham pe napei, pecu mna kebeube de, Sarah ne pecu mna kelube de Isaac msiaklu.* 4 Abraham pe napei Isaac lang heset di ge hegeurum kecu teilu, Tinggwang pedage ajah kai kebeu nzwa.✝ 5 Abraham mmi haige di kecu dau pe na Isaac de pecu mna beu. 6 Sarah rangdi, "Tinggwang acu suiyi pwa peu da; mileune de siu kegaime acu ngngwa pesuiyi zie." 7 Pa rangdai gai "Caune Abraham dade Sarah hename nepam zielie kecu ranglu laino, dede Ih pa cing kedi caine mipeina ge mna beuda!"

8 Hena nade ngkieng cu lwe tung tadi, Isaac tung ta kedi benai Abraham hengyi dige telei gai. 9 Sarah langnai ge Egyptme pui Hagar napei Abraham na mna kebeube de ngau periakdi. 10 Cine pa Abraham dage rang gai, "Aipau hebaang pui de nah pe napei de gwa gidi lulo, kedanemene aipau hebaang pui napei de peu a na Isaac de ngngwa, mapwa ga ncüt gailak."✝ 11 Ma aide Abraham pe napei ziemne pelung keherei sütdi. 12 Dede Tinggwang Abraham dage rangdi, "Aipau nade ziemne nah n kila pui ziemne nlung keherei so. Makie aidungde pa n dage rang kebeu samdung de pedade kiengnei lulo, kedanemene Isaac dade n leuhmedung zi keu zielu. 13 Ih n kilabe pui napei de de peu heleuh ge luzie, pa au n leuhme ge kecune." 14 Abraham tingcang nuge pecai benai cuh zi lwe tangku nah dui la keulu delwe Hagar de pe hekeutu ga cide npüt kaibeu. Pa pe napei de peu lwe pecu lang gidi. Hagar tetpwa hetaideu Beersheba ga huirwa ladi. 15 Duila ga dui sak cangdi ge, pe napei nade tsinghum kangga ge gi gaidi. 16 Pecai pa pe napei dade dei ham kemak ga mie ntum bamdi, lakpi le kap canglu kera dei ge ga*, pa rangdi, "Peu acu a napei tsai kecu ngau helo." Pa cika ntum bam kecu dau, pa pe kwa cii eh hap süt cudi. 17 Tinggwang mipeina de kwa siulu, nah tinggim gade Tinggwang gwame Hagar de qu, nah pedage rangdi, "Nang daitei nlung keherei au no, Hagar? Ngngi so, Tinggwang au mipeina de kebam ga pe kwa siulu da. 18 Cuh lu, n napei nade kwak cuhlu delwe pelung teinciep beulu; kedanemene Ih pecu heleuh kedi ge tei zie." 19 Pecai Tinggwang pe miak teimrak beu, nah pa tekwaki dui ngaulu. Pa mie delwe dui le duila ga kai puilu delwe pe napei de peu saklu. 20 Tinggwang mipeina de ngngwa la, nah pa ngking cuhlu. Pa hetaideu ga lungh bamla eh lakpi kap cisüt kecume ge teilu. 21 Pa Paran hetaideu ga lungh bamla, nah pe pui Egyptme deu gade pe ziemne pe nau pei beulu.

22 Cipau tingdau Abimelech nah pe reugwame kedibe Phicol au Abraham de mpau eh, ranggai, "Tinggwang au nang ketei leune ga ncu ngngwa la. 23 Cu ciziemne nang Tinggwang zi gade aika de sampet beulo, acu, mede a name mede a leuhme dage ma kesia tei gailak lie kecu. Nang lungh kebam deu de de nah acu samkak kelu masang de Ih ncu liagai kecu nzwa lai lo." 24 Abraham rangdi, "Ih sampet beu zie." 25 Abraham gu tekwa dui ziemne Abimelech kilame ne pe dade süt pwadi kecune Abimelech dage ncam gai. 26 Abimelech rangdi, "Cau ne ai kenzwa tei bi Ih ci ma. Nang madau gede ada ge ranglia ma, Ih henai kecangde cide siu ma." 27 Cine Abraham meurün nah hetumseu keu lwe Abimelech de cidungde peu gai, nah penai hangna samting samkak teilu. 28 Pecai Abraham pe meurün hau gade meurünlei hena penuikatei ne keu ncamlu. 29 Abimelech Abraham dade rangdi, "Meurünlei hena penui katei ne keu ncam kecu aidungde kie de dai no?" 30 Pa keli gai, "Nang meurün lei hena aide a ba gade ngaulu zie, iciu lude tekwa aide Ih ne kui kelube lie de kecu a ziemne zierang be delie" 31 Cine pa heni cide Beersheba lie qulu, kedanemene cika de penai hangna na samkak tei kelune. 32 Penai Beersheba gade samting samkak kelu tei, nah pecai Abimelech penai pe reugwame kedibe Phicol Philistinme deu ga cailigwangdi. 33 Abraham Beersheba ga Tamarisk bang ling gailu. Pa cika de kelungta kering Tinggwang, RAMPAUBE de reca. 34 Abraham peting ketie ge Philistinme deu ga sangme pei ge tei lung ladi.