1 Tinggwang Noah, renam kaunedung pelane, nah kauruine liem ga kela pelane de de nsungta dima. Tinggwang kideu reu gage tingkai gui kera tei gai, nah dui be cip miedi. 2 Kideu kang ga duiletdung nah tinggim ga tingrui hebakidung de ngkuidi, nah tingrui tadi. 3 Duinai duidung kideu be gade cam reureu di, nah zie hai eh riakngei cai au dui cam reureu miedi. 4 Kei henabe kei, ziangreiehena benai, liem be Ararat deutu ga gwang mtaklu. 5 Dui be cam reureu jüja bamdi kei kereibe kei kecang. Ciu eh kei kereibe kei lang naige benai, lamlwatu twangdung ngau petdi.

6 Ciu eh zie riakdai cai Noah liem hebaki Pa ne tei kelude ngkei gai. 7 Pa hegak ge de lang mpet gai ge cide liem nlüt mpet bamdi kideu ga dui cipmie kemaktane. 8 Pecai pa tamhau gede lang mpet gai dai kideube ga dui cam mi mebi pie lu kerane. 9 Dede tamhau cide mtak gai kera ni ngaulu ma, nah pa pe da liem ga cailigwang dai, kedanemene dui ne kideu pelane gum pwa bam reu kecune. Pa pe ba ketwa pet, cide pe tai ga liem be ga keu nlüt lu. 10 Pa lang hena ne kwa dai lu delwe pa liem gade tamhau de lang mpet gai dai. 11 Tinghegi dige tamhau caili peda gwang dai. Pielo! Pe mui ga Olive nei kering ge bam. Cine Noah kideu be ga dui cam miekedi cilu. 12 Pa keda lang henane kwalu, delwe tamhau de lang mpet gai dai. Pa peda cailigwang dai tadi.

13 Cinzwadi eh mmi raitube nah hai herok ket bekum, kei raitube kei, lang naige benai kideu ga dui be cangdi. Noah liem cum de keudi, delwe piegai, nah ngaulu, ainie hangdeu cang dida. 14 Kei na bekei, zie ngkaiehena benai,* kideu be cangking di. 15 Tinggwang Noah dage rangdi, 16 "Liem gade mpet lu, nang, n nau, n napeidung, nah n na naudung de ncu ngngwa lwe. 17 Makaune kering pelane nda kebam de ngngwa mpetlu, nruinedung, makaunedung nah bwa kela kaune leune kideu reu ga bwa keladung, iciu eh penui kideu peureu ga kieesi lu kerane, delwe penui lunghing lu eh kideu reu lungh hamlu kerane." 18 Cine Noah pe napeidung, pe nau, nah pe na naudung de pecu ngngwa lwe mpetlu.✝ 19 Ring kela kaune, bwa kela leune, nah nruine, kideu ga mlai kela leune, penui kenzwadung pemaa tei eh liem gade tetdi.

20 Noah au RAMPAUBE dage recabam ge teilu. Pa makaunedung kemci be nah nruinedung kemci be ketsamtsam keu ciak lu, delwe pwa recabam gage keru recadung teigai. 21 RAMPAUBE ru kegai perim keyi de pesuilwe pe lung gade rangdi, "Ih madaude mina ziemne hangdeu be de reset dai lakta, penui henane gade penui lungcet mau ladi lie de. Mede Ih madaude ringkela leune de ngkap dai lakta, Ih tei kedi nzwa.

22 Kideu kebam tane, heleuh kelingting nah luhlüt ting, kengkung nah kelum,

hepwak nah tingka, nah tingba nah tingmui bam mui zie."