1 Cu Abraham cing süt di nah RAMPAUBE Abraham de ma pelane ketei ga samlam beu. 2 Abraham pe kilabe dage rangdi, mige pe kilungme cingtube nah pe maabam pelane pie rengei kelabe, "A mnie kakga ge n ba kailu 3 nah Ih ncu peu tinggim Tinggwang nah kideu Tinggwang RAMPAUBE dwa ga de sampet tei gai zie, nang a na ziemne penau aika canaanme napui dade, Ih ngngwa lungh kebamme kak de kedet lak lie kecu. 4 Dede nang a mna nam ga nah a kibaume da mie zie, delwe a na Isaac ziemne henau ge peeilu maisia." 5 Kilabe pedade rangdi, "Magade releipui be aipau deu ga acaisui gwang raudi cai dainzwa lai? Ih n na de lang caili pwa nang kegwang Mesopotomia deudi de gage langgai di zie ni?" 6 Abraham pe dade rangdi, "Nang a na de cika ge langgai dai kelak teibilu. 7 RAMPAUBE, tinggim Tinggwang acu a pei ki gade nah a kibaume deu gade ngngwa gwang kelube, nah pa acu sünne eh sampet eh pesam kaibeu eh ranggai, ‘N name de Ih hangdeu aide peu zie,’ pa pe tinggimgwame de n dwa langgai zie, nah nang cika de a na ziemne nau ngaulu zie. 8 Dede releipui acaisui raudi cai, ciude nang a sampet aipau kangga lüt si ta dizie. Dede nang a na de cika ngngwa cailigwang lak." 9 Cine kilabe peba pwa Abraham pe mpaube mnie kena kakga ge kailu delwe pa kerang de teizie lie eh sampet teilu.

10 Kilabe pe mpaupei gu utdung kerei teulwe tetdi. Pa pe mpaube mapeu ketsamtsam pelane gade de teu si eh tetdi. Pa tetti delwe Aram Naharaim* cuikui, Nahor namdi ga miedi. 11 Pa namdi gwale bie dui tekwa ge ga peu utdung de kwaktunglu. Cide ting hegi, cipau tingdau mipui dui twak kera miedi. 12 Ciu eh pa rangdi, "RAMPAUBO, a mpaupei Abraham Tinggwang, henai acu peu teidaulu nah Samkak kelu samsang a mpaube Abraham de keu lialo. 13 Pielo, Ih dui rwak aika namdi ga releime dui twak gwang kera ga sapbam. 14 Peu ainzwa lu. Ih releipui de rangcu dau, ‘Kehereide n duibung pwa hena mie gai eh acu peu sak,’ nah pa acu, ‘Saklu, nah Ih ngu utdung ziemne de dui twak pwa gwang beu zie,’ de eh rang cai, cipau pui de nang n kilabe Isaac ziemne kedet kelube pui lulo. Aide ne nang a mpaube dade samkak kelu samsang keulia kecu Ih cilu zie." 15 Cidau pa marang cangdi kecu dwa de, ainie, Rebekah pe duibung ge pe hekeutu gage pwa lwe gwang. Rebekah Abraham sinabe Nahor nau, Milkah napei Bethual mnabeu. 16 Pa au relei hezuyi süt nah kemci pui ge. Pa pedwa ga mipei ge de bam swa ma. Pa tekwa ga nghung eh pe duibung twak puilu delwe cailigwang. 17 Ge kilabe pakpet pecu redau lwe rangdi, "Kehereide acu peu keceu nage de n duibung gade dui saklo." 18 Pa rangdi, "Saklu, a mpaubo," nah pa pe ba zette pe duibung pwa hena gai beu eh pecu peu saklu. 19 Pa pecu peu sak cang kelu dau, pa rangdi, "Ih n gu utdung ziemne de dui pwa gwangbeu zie, penui sak canglu kemaktane." 20 Cine pa zette pe duibung makaune dui kesak kwak gage tei mta kelwa gaidi eh, tekwa ga pak dai mie dui pwa gwang beu, nah pe utdung pelane ziemne dui pwabeu. 21 Mina be mlei mene pecu pie bam RAMPAUBE pe beu ziemne pecu peu tei daukelu teilu de mi mebi kecu. 22 Utdung dui sak cang kelu cai, minabe kecak ngkie ringgoi perüt shekel pempie nah kecak ta kena perüt shekel kerei ge pe ba kena ziemne keu mpet beu, 23 delwe keteudi, "Nang cau napui no? Kehereide acu ranglialo, cika heziu n pei ki ga zeu kera a minadung nah a ziemne heni bam mi?" 24 Pa pedage rangdi, "Ih au Milkah napei Bethual, pa Nahor de mna kebeube napui lie." 25 Pa pedage rang eh, "Anui da reigau nah ketum tak kiee süt bam, nah heziu nnui bamlu kebui heni de bam." 26 Ciu eh mina be keumie RAMPAUBE de reca. 27 Pa kie eh, "RAMPAUBE de twalu, a mpaube Abraham Tinggwang, pa pe kenlum a mpaube dage samkak kebeu de masang eh gidi ma. A ziemne, RAMPAUBE a mpaube ki kibaume da acu ngngwa gwang beu da."

28 Pecai releipui be pe pui kiga pak gwang maha aidungde pelane pau beu. 29 Cu Rebekah pe heipei bamla, nah pezi cai Laban. Laban minabe lampui ga duilet taiga kebambe da pak mie. 30 Cidau pa ngkie ringgoi nah heta kena pe tipui ba ga kebam ngaulu, nah pa Rebekah, "Aipau mina be adage rang," de kecu samde siulu ge pa mina taiga mie, nah, ainie, pa duilet taiga pe utdung taiga sapbam. 31 Ge Laban rangdi, "Acu ngngwa kilung gwanglu, nang RAMPAUBE samlam kebeume ge da. Daitei nang hegwale sap bam no? Ih a ki ga n ziemne heni mtei luda, nah utdung ziemne de si eh." 32 Cine mina be kilung ga lütlu nah pa utdung püt lwakdi. Utdung de reigau nah taktyeidung peu, nah pecai minabe ziemne nah pecu ngngwa kelame pi nah pe pi hui kera dui pwa gwangbeu. 33 Penui pe dwaga taktyei pwa gwang teleilu, dede pa rangdi, "Ih rang zie lie kelade Ih rang di kemaktane Ih ma tyei lak." Cine Laban keli eh, "Ranggai cu" dedi. 34 Pa rangdi, "Ih au Abraham kilabe. 35 RAMPAUBE a mpaube de samlam süt beu eh pecu keheime ge tei beu. Pa pecu meurün hau nah ketum haudung, rangkanggeu, kecak, kilapeidung nah kilapuidung, nah utdung nah gadadung pwa peudi. 36 Sarah, a mpaupei nau, pa cing kedi caine pecu mipeina ge mnabeu, nah pa pecu pe mabam pelane peu dida. 37 A mpaupei acu peu pe sam mzai kera sampet gai, ranggai, ‘Nang a na ziemne Ih lung kebam deu canaan ga releime kak de henau pei so. 38 Meliene, nang mie maisia a kibaume, a pei leuhme, nah a na ziemne henau peilu.’ 39 Ih a mpaupei dage rangdi, ‘Magade releipui acaisui rau di cai.’ 40 Dede pa a dade rangdi, ‘RAMPAUBE, Ih pesam mzai muila kelabe, pa pe tinggimgwabe de langgai beuzie nah pa n lampui ngau daulu zie, iciu eh nang a kibaume kak gade nah a pei kelak ria gade a na ziemne nau peilu zie. 41 Dede nang nlilu bui a sampet de gade magade a kibaume nang gwang kecu dau penui ncu pe mpaube pui de peu lak lie cai. Cidau nang a sampet gade mbai lu bui.’ 42 Cine Ih henai duilet ga gwanglu, delwe ranggai, ‘O RAMPAUBE, a mpaupei Abraham Tinggwang, kehereide, Nang magade a mbeu tei daulu kera tei kesang beu zielie cai, 43 Ih au aika bam, sap lwe dui rwak taiga bam. Releime ge dui twak kera gwang cu dau, Ih pe dage rang, "Kehereide n duibung gade acu dui keceu nage sak kera peulo." 44 Releipui de acu rang eh, "Saklu, nah Ih n utdung ziemne de dui pwa gwangbeu zie," cipau releipui de de peu nang RAMPAUBE ne kedetkelu a mpaupei na nau lulo.’ 45 Ih mlei mene kie canglu mereu kecu dau, ainie, Rebekah pe duibung pe hekeutu gage pwa lwe nghung tekwa ga dui twak bamdi. Cine Ih pedade rangdi, ‘Kehereide acu peu dui sak lo.’ 46 Ge pa zette pe hekeutu gade pe duibung pwa hena mie delwe rangdi, ‘Saklu, nah Ih n utdung de de dui peu zie.’ Cine Ih saklu, nah pa utdung de de peu dui saklu. 47 Ih pedage keteu eh rangdi, ‘Nang cau napui no?’ Pa rangdi, ‘Bethual napui, Nahor napei, Milkah ne pecu mna kebeube de.’ Pecai Ih ringgoi be pwa pe ngkie gage kai nah heta kena pwa pe ba gage kai. 48 Delwe Ih keumie RAMPAUBE de reca, nah RAMPAUBE samlam beu, a mpaube Abraham Tinggwang, acu lampui petau be ga nzang gwang a mpaube kibaume napui de ngau kelune peu pe na nau kera ziemne. 49 Cu ciziemne, nang magade a mpaupei dage nlum kebeu samkak masang eh mtei eh keulia cai, acu rang gailo. Dede melie cai, acu ranglialo, iciu eh Ih nzet lebie ba mede hile bie ge nreu gai lu kerane."

50 Iciu ge Laban penai Bethual keli gai eh rangdi, "Makie aide RAMPAUBE dade gwang kecune; anui ndage keyi kesia rang gailak. 51 Pielo, Rebekah n tai ga bam da. Cine pecu nzang lwe tetcu, RAMPAUBE ne rang kebeu nzwa, pecu peu n mpaupei napei nau teicu." 52 Abraham kilabe penui sam aide siulu ge, pa pekatei hangdeu ga RAMPAUBE de keumie. 53 Kilabe pai nah rangkang geu nah kecak le ketei netdung li mpetlu, delwe cidung de Rebekah de peu. Pa mtakepeu ma pemi kehungdung pwa pe heibe nah pe pui de de peugai. 54 Pecai pa nah pecu ngngwa kelame matyei nah saklu. Delwe cipau ziu cika bamlu, nah penui tingcang cuhlu ge, pa rangdi, "Acu peu a mpaupei da cailigwang culo." 55 Pe heibe penai pe pui de rangdi, "Peu releipui de anui da mtakkak gede mede ziangrei ge bam gai rielo. Cipau cai pa tet lubui." 56 Dede pa penui dade rangdi, "Peu acu bamdi helo, RAMPAUBE a beu tei dau beu da. Acu a lampui ga lang beulu ciude Ih a mpaupei da mielu kerane." 57 Penui rangdi, "Anui releipui de qu lwe pecu keteu zie." 58 Cine penui Rebekah de qu lwe pecu keteudi, "Nang mina aipau de de nzang tet lubui deni?" Pa keli, "Ih tet lubui." 59 Cine penui tipui Rebekah nah kilabe pui de si eh lang gai, Abraham kilabe nah pe minadung de nzang gwangdi. 60 Penui Rebekah de samlam beu, nah peda rang eh,

"Anui tipui, ncu peu mina pecang pui teilu,

nah n leuhme de peu kirie gum kelube teilu penuide ngaurau kelame dade."

61 Pecai Rebekah cuhlu, nah pa nah pe kila releime si eh utdung reu ngkeilu nah penuide nzang tetdi. Iciu eh kilabe Rebekah de ngngwalu delwe pe lampui le ge tet cu gai.

62 Cipau ting dau Isaac Negev ga lungh bamla, nah Beer Lahai Roi gade cailigwang bam. 63 Isaac luh ga terwa zie lie tinghegi tetpet. Pa pie nghang ge, ainie, utdung cika gwang kela ngaulu. 64 Rebekah pie gai, nah pa Isaac de ngaulu ge, pa pe ut reu gade nghunglu. 65 Pa kilabe de rang eh, "Mina lu be de luh ga anui tai lam tet gwang kelabe de cau no?" Kilabe rang, "Pa au a mpaube." Cine pa pe ngwangbiet pai keu pezu gumdi. 66 Kilabe Isaac dage pa tei kedi be ma pelane pau beu. 67 Ciu eh Isaac Rebekah de ngngwa pe pui Sarah kelung paiki de ga nlütlu, ciu eh pa penau di, nah pa pecu ku. Cine Isaac pepui ga kedi teide pelung tei ncieplu.