1 RAMPAUBE Noah dage rangdi, "Gwanglu, nang nah n kilungme pelane, liem ga nlüt lu, kedanemene aipau ceheu gade nang au a dwa gade masang kela Ih ngaulu delu. 2 Makaune kemcibe pelane gade peseudung hena nah pepuidung hena nang nda teu gwang zie. Makaune mci kemakbe gade cai, penui kak de kena teu gwanglu, peseu nah pepui. 3 Nruinedung ting ga kebamdung lie cai, periedung hena nah pepuidung hena teu gwanglu, peu penui nadung de kideu peu reu pelane ga lungh cuh dailu kerane. 4 Lang henane cai Ih tingrui langgai zie kideu reu ga nah cide tingmui tingba zie riakdai ge rui zie. Ih tei kelu hangdeu reu ga ringkela pelane de ngkapdi lu kerane." 5 Noah RAMPAUBE pecu rang kebeu leune de teilu.

6 Kideu be ga duinai kegwang dau Noah mmi hai herok di. 7 Noah, pe napeidung, pe nau nah pe napeime naudung, de ngngwa liem ga nlüt lu kedanemene duinai gwang kedine. 8 Kemcibe nah mci kemak makaunedung, nruinedung nah hangdeu reu ga bwa kela pelane, 9 kena kena, peseu nah pepui, Noah da gwang eh liem ga nlüt lu, Noah de Tinggwang rang kebeu nzwa. 10 Lang hena ne cai, kideu reu ga duinai duidi gwangdi. 11 Noah teilung mmi hai herok bekum, keina be kei, cipau kei zie kereiehena benai, cipau nai gapte, kideu kang gade duilet disüt kecu peciakne letba de gai, nah tinggim hebakidung ngkeidi. 12 Iciu eh tingmui tingba zie riakdai ge kideu ga tingrui mie ndeudi.

13 Cipau nai Noah nah pe napeidung, Shem, Ham nah Japheth, nah Noah nau, nah pe na hangcum naudung, de ngngwa liem ga nlütlu. 14 Penui de si eh renaam kaune cikenzwa bedung nah kauruine cikenzwa bedung nah kideu reu ga bwa kela kaunedung ket ket cikenzwa bedung, nah nruine keheibe de cikenzwa bedung, pe hesiu pung kela ruinedung. 15 Pe cui ngyi ketei ring kela leune kena na Noah da gwanglu delwe liem ga nlüt lu. 16 Makaune nlüt kelu peseu nah pepui gege pelane; Tinggwang pecu rang kebeu nzwa penui nlüt lu. Ciu eh RAMPAUBE penui nlüt kedi cai kikambe ngkuidi. 17 Ciu eh kideu be ga zie riakdai ge duinai gwangdi, nah dui be kieesi reureu di nah liem be kideu reu nliem cuhdi. 18 Nah duidung ne kideu reu pelane gumpwadi, nah liem be dui reu ga nlim ladi. 19 Kideu be reu ga dui be cuh sütdi nah ting kangga pelane iciu eh lamlwatu kehudung pelane de gum pwadi. 20 Nah dui be cuh reureu eh lamlwatudung hutu reuga cubits kereimengei hangdi. 21 Kideu reu ga ring mlai kela leune tsaidi, nruinedung, kauruinedung, renaam kaunedung, nah makaune kideu reu ga kekiee lungh kebam ring kela pelane nah mina pelane. 22 Ringkela makaune pelane kideu ga lungh keladung, kering cuingi penui ngkiedung gade ngi keladung pelane, tsaidi 23 Ciu eh kideu peu reu ga ring kela leune de ngkapdi, mina gade makaune ditube kecang, bwa kela kaunedung, nah ting ga kebam nruinedung. Cidung de pelane kideube gade ngkapdi. Noah nah pecu liem ga ngngwa kelame rünne banglu. 24 Dui be kideu reu ga zie hai eh riakngei ge bamdi.