1 Sarah mmi haige eh ngkaiehena lunglu. Aidung de Sarah teilung mmidung da. 2 Sarah Kiriath Arba gade tsaidi, aide, Hebron, Canaanme deu ga. Abraham Sarah ziemne hei eh hap bamdi. 3 Pecai Abraham cuhlu delwe pe nau pau kebam gade tetdi, nah Heth napeidung dade marang eh ranggai, 4 "Ih au nnui kakga sangme ge lie. Kehereide acu nnui kakga herau kie ge tei kera hangdeu ge peulo, iciu eh Ih a nau de cika ge kunglu kerane." 5 Heth name bau Abraham de keli eh ranggai, 6 "Anui kwa kiengnei gailo, a mpaubo. Nang au anui kakgade Tinggwang hegwang napei lie. N nau de n suitube anui raudung gage kunglu lo. Anui keheibe de rau ncu ha lak lie di lak lie, ciude nang n nau de kunglu kerane." 7 Abraham cuhlu delwe mina deu, Heth napeidung da keumie. 8 Pa penuide resiu eh, ranggai, "Magade nnui kesamdau Ih a naude kung lulo maisia cai, a kwa siulu delwe a ziemne nnui Zohar napei Ephron dade kie beulo. 9 Pedade Machpelah tsupop, pe gu de, peluh kung ga kebam de acu zwa kera kie beu lulo. Peu pecu cide pemi mmui lu cang eh nnui dwade acu zwa hangdeu de heraukie teilu kera." 10 Cidau Ephron Heth namedung kakga ntum bam, nah Hittitme pei Ephron, Heth napeidung nah namdi kirie ga ngngwa gwang kelame pelane kak de Abraham sam keli eh ranggai, 11 "Lak, a mpaubo, a sam kiengnei gailo, Ih luh de, nah cika tsupop kebam de si eh a leuhme peidung kebam dwa gade Ih cide ncu n nau de kunglu kera peu zie." 12 Pecai Abraham pekatei deuketmedung dwa ga keu mielu. 13 Pa Ephron de resiu eh Hittitme pelane siulu kebui tei eh, ranggai, "Dede nnui petau lu bui lie cai, kehereide a kwa kiengnei gailo. Ih luh mi de teibeu zie. Rangkang keu lulo adade, nah Ih cika a kibaume de kunglu dizie." 14 Ephron Abraham dage keli gai eh, ranggai, 15 "Kehereide, a mpaubo, a kwa kiengnei gailo. Hangdeu keceu aide rangkanggeu hai mdai* gwale ma, anai kakga dai bam no? Cika ge n nau de kung lulo" dedi. 16 Abraham Ephron sam mneilu delwe rangkang geu hai mdai Heth napeidung siu kecu gade pa rang kecu nzwa heli keteime zai rehi gade perüt mdetlu.

17 Cine Ephron luh Machpelah ga, Mamre taiga kebam luh de, nah tsupop cika kebam de, nah luh de tsingbang twagwa kebam pelane pe nli pekungdung peciakne si eh mpet beu, 18 Abraham de Heth napeidung nah namdi kirie ga gwang kelame pelane dwa gade. 19 Aide cai Abraham pe nau Sarah de Machpelah luh ga kebam tsupop gage kungdi, aide Mamre taiga, cide Hebron, Canaanme deu ga bam. 20 Cine luh de nah cika tsupop kebam de Abraham de peu pe heraukie tei kerane Heth napeidung ne mpet beudi.