1 Ma aidungde aizwa gwang kebam cai Tinggwang Abraham de kedei gai. Pa pedage rangdi, "Abraham!" Abraham keligai, "Ih aika bam."✝ 2 Pecai Tinggwang rangdi, "N napei de ngngwalu, n na pumli nade, nang ku kelabe Isaac de, nah Moriah deu ga miecu. Cika lamlwatu ge reu gage Ih ncu ranglia lai eh kebam de gage pecu cika ge keru reca tei beulo." 3 Cine Abraham tingcang nuge pecai benai cuh zilu, pe gada püt teilu, nah rehang hangna de ngngwa si lu, pe napei Isaac de si eh. Pa keru reca tei kera ziemne tsing de danglu, pecai pedage Tinggwang ne rang kebeu heni ga pa mie kera tet culu. 4 Lang cumne benai Abraham ngang cu pie gaige heni de deitau ge ga ngau. 5 Abraham pe rehangbe kena dade rangdi, "Aika gada de ngngwa bamlu, nah Ih nah mipeina luga mie zie reu. Anai mie recalu delwe nnai taiga cailigwang dai zie." 6 Pecai Abraham keru reca tei kera tsing de keu lwe pe napei Isaac reu ge cide kai beudi. Pa pe ba ga mi nah tangkane keulu; nah penai hangna na nzang lwe tet petdi. 7 Isaac pe pei Abraham dade marang eh rangdi, "A pei," nah pa rangdi, "Ih aika bam, a napei." Pa rang dai, "Ainie, aika mi nah tsing bam, dede keru reca tei kera meurünna dai ga bam no?" 8 Abraham rangdi, "Tinggwang ne meurünna keru reca ziemne pwa peu zie, a napei." Cine penai hangna na nzang mie ladi.

9 Iciuge penui Tinggwang rang kebeu ni ga mielu ge, Abraham racabam teilu delwe tsing pwa gailu. Pecai pa pe napei Isaac de kanglu, nah ratakbam tsing reu gage pe napei de pwa gailu.✝ 10 Abraham pe ba hetwapet pe napei de teitset kera pe tangkane keulu. 11 Pecai RAMPAUBE tinggimgwame tinggim gade pecu qu nah rangdi, "Abraham, Abraham!" nah pa rangdi, "Ih aika bam." 12 Pa rangdi, "N napei reu ga n ba kai so, mede pecu magede tei di so, kedanemene Ih cu au cilu da nang Tinggwang de hingla lie kecu, n na pumli na de nang adwa de keu mbaih di kemak ngau." 13 Abraham ngang cu pie gaige ainie, meurün seu ge tsinghum gage peki dwak pwa kebam ngaulu. Abraham mie delwe meurün seu de keu pecu teugwang pena keleu gade keru reca teilu. 14 Cine Abraham heni cide qu, "RAMPAUBE peu zie," nah henai kecang de ainzwa rang bamla, "RAMPAUBE lamlwatu ga de cide pwa peu zie." 15 RAMPAUBE gwame pia pe kena be tinggim gade Abraham de qu dai gai 16 nah rang dai-RAMPAUBE ne aide sampet peu da-Ih ne sampet beu nang ma aidungde tei kebeu ziemne, nah n na, n na pumli be de teu caili kemakne,✝ 17 Ih ncu samlam beubi zie nah Ih n leuhme de tinggimdung ga hegidung kiee ge, nah jaaidikung ga heciang kekiee ge nzwa tei beu zie; nah n leuhmedung penui ngauraume de ngam luzie.✝ 18 N name heleuh pelane gade kideube samlam pung luzie, kedanemene nang a kwa kiengnei kelune. 19 Cine Abraham pe rehangbe kena tai ga cailigwanglu delwe penui tet cuh gai eh nzang lwe Beersheba gage tet gailu, nah pa Beersheba ga lungh bamdi.

20 Ma aidungde cai Abraham dage ranglia eh, "Milkah de n sinabe pei Nahor de pena mna beuda." 21 Penui cai, pe neraibe Uz, Buz be pecaihereibe pei, Kemuel Aram pei, 22 Kesed, Hazo, Pildash, Jidlaph, nah Bethuel. 23 Bethuel be Rebekah pei teilu. Aidung de Milkah ne pena hang heset Abraham sinabe Nahor de mna kebeudung da. 24 Pe nauseupui pezi Reumah kecu pui dede Tebah, Gaham, Tahash, nah Maacah de mnalu.