1 Cine Abram Egypt gade hang nah pa, pe nau, nah pe ma pelane teu eh Negev gage tet gaidi. Lot de penuide ngngwa miedi. 2 Cu Abram au mahei süt, makaunedung de, rangkanggeu de nah kecak de. 3 Pa n beuh jüja eh Negev gade Bethel ga mie, ndaa pe paiki, Bethel penai Ai kakga kebam ni de ga. 4 Pa ndaa tei kelu recabam kebam ni de ga pa mie. Aika de pa RAMPAUBE zi qugai. 5 Cu Lot, Abram de ngngwa mbeuh kelabe de, meurün haudung nah ketum haudung nah ramzeukidung de bam. 6 Penai hangna na nna eh lungh ncüt bam kera ziemne hangdeu be tei dau lakdi, kedanemene penai mabamdung kiee süt kedine, ciu eh penai lungh ncüt gailak di. 7 Iciu delwe, Abram kaudung kekwame penai Lot kaudung kekwame kak ga ngngwa siadi. Cipau ting dau Canaanme penai Perizzitme cipau deu ga lungh bam. 8 Cine Abram Lot dade rangdi, "Peu anai kakga nah n kau kekwame nah a kau kekwame kakga ngngwa kesia bam helo, kedanemene, anui au kilungme ge lu. 9 Ndwa ga hangdeu pelane bam de meni? Mie cu, delwe ada de nkatei tsam di lu. Magade nang hile bie mie cai, Ih zetle bie mie zie. Mede magade nang zetle bie mie cai Ih hile bie mie zie." 10 Cine Lot pie twagwagai eh Jordan langkam pelane ga dui yisüt kebam ngaulu, Zoar pelane ga kecang, RAMPAUBE gurie nzwa nah Egypt deu nzwa. Aide au RAMPAUBE Sodom penai Gomorrah de ngkap kemak dwa. 11 Cine Lot Jordan langkam pelane de pe ziemne kedetlu, delwe naimiak kepetle ge tet gaidi, nah penui kibaume hang gege dade kelamtsamdi. 12 Abram Canaan deu ga lunghdi, nah Lot langkie namdidung kakga ga lunghdi. Pa Sodom taiga kecang pe ramzeukidung teilu. 13 Cu Sodom ga minadung au RAMPAUBE dage kemaudung siasüt kecu tei kegaime.

14 Lot pe dade tet kedi cai, RAMPAUBE Abram dade rangdi, "Nang sap kebam ni gade tingtünle, tingbangle, naimiak kepetle nah naimiak kenlütle pie gai pielo. 15 Nang kengau aipau hangdeu pelane de, Ih ncu nah n leuhme de kelungta pwa peu zie.✝ 16 Ih n leuhme de kideu ga rebui kekiee kiee ge tei beu zie, iciu eh magade mige kideu rebui de pei lu bui liecai, iciu cai n leuhme de de pei kap lubui. 17 Cuhlu, hangdeu pedi nah petie ga tet miecu, kedanemene cide Ih ncu peu zielu." 18 Cine Abram pe ramzeuki keu ncu lu, nah gwang Hebron nam ga mhudung Mamre taiga lungdi, nah cika de RAMPAUBE de recabam ge teibeu.*