1 Tingbazie kiee kemak cai Tinggwang Jacob dage rangbeu, "Cuhlu, Bethel ga mie cu, delwe cika gwang lungh dilu. Cika ge recabam ge Tinggwang, nang n swacingbe Esau dade pak ketet dau ncu peu ngaukegai be de tei pwa peulo."* 2 Pecai Jacob pe kilungme nah pecu ngngwa kela peciakne dage ranggai, "Sangme rabedung nnui kak kebam de keu gidilu, nnui de teimci lu, nah nnui nia kedi dilu. 3 Pecai anui aika pütdi eh Bethel ga mie cu go. Cika de Ih Tinggwang, a lungrei ting dau acu ngha kebeube, nah Ih kemie leuga acu ngngwa kelabe de recabam ge tei beuzie." 4 Cine penui sangme rabedung pelane penui ba ga keladung de, nah penui nli kela nlidung pwa Jacob de peudi. Jacob cidung de Shechem taiga mhu bang kang gage kungdi. 5 Penui tetla kecudau, penuide twagwa kebam namdidung da Tinggwang nggi süt kecu teu gwang, cine minadung Jacob namedung de zui ma. 6 Cine Jacob Luz de qukela heni (cide, Bethel) ga gwang lu, Canaanme deu ga kebam ga, pa nah mina pelane pecu ngngwa kelame. 7 Pa cika recabam ge teilu nah heni cide de EI Bethel lie qulu, kedanemene cika de Tinggwang pecu peu ngaukegai ne, pa pe swacingbe dade pak kela dau. 8 Rebekah ngkwetpui, Deborah, tsaidi. Pecu pwa Bethel ngkang lebie mhu bang kang gage kungdi, cine cipau zi de Allon Bakuth msiaklu.

9 Cidau Jacob Paddan Aram gade cailigwanglu ge, Tinggwang pecu peu ngau dai nah pecu samlam beu. 10 Tinggwang pe dade rangdi, "N zi au Jacob, dede n zi Jacob qu si lak ta. N zi Israel zie da." Cine Tinggwang pe zi Israel msiak beu. 11 Tinggwang pedade rangdi, "Ih au Kengkieng Tinggwang. N name kekiee lunghlu eh lungh hinglu. Heleuh ge nah heleuh maadung ge n dade lungh gwang zie, nah n leuhmedung kak ga hegwangmedung bam zie. 12 Ih Abraham nah Isaac de kepeube deu de, Ih ncu peu zie. Ih n cai n leuhmedung dede hangdeu de pwa peu zie." 13 Tinggwang pedade nghang di pa pecu mpau kecu heni de gade. 14 Jacob Tinggwang pecu mpau kecu heni de gage tsusum ge, tangtsu tsusum ge sumlu. Pa cipau tsusum reu gage zau reca ruigai nah cika ge maca ruigai. 15 Jacob Tinggwang pecu ngngwa mpau kecu heni de zi Bethel msiaklu.

16 Penui Bethel gade tetcuh dai. Penui Ephrath namdi gade mdeila reu kecune, Rachel mna hi cang gwangdi. Pa keherei sütdi. 17 Pa keherei sütdi kecudau, hena tei kemnapui pe dage rang, "Ngngi di so, kedanemene cu nang mipeina keda ge lungh luzie." 18 Pa tsai laizeudi, pe ngyi tüt kemiedau pa pe zi Ben-Oni msiakbeu, dede pe pei be pecu Benjamin qulu. 19 Rachel tsaidi nah pecu Ephrath (cide, Bethlehem) lampui kung gage kungdi. 20 Jacob pe rau reu gage tsusum ge sumlu. Cide henai kecang de Rachel rau riet pwa bam. 21 Israel tetcuh dai nah meurün hau de kepie tsukwa* gwale ge pet pe ramzeuki teilu. 22 Israel cipau deu ga lungh kebam dau, Reuben pe pei nauseupui Bilhah de ngngwa zeu di, nah Israel cide siu lu.

Cu Jacob pena mipei kereiekena bam dida. 23 Pe napeime Leah ne mna kelume cai Jacob neraibe, Reuben, nah Simeon, Levi, Judah, Issachar, nah Zebulun. 24 Pe napeime Rachel ne mna kelume cai Joseph penai Benjamin. 25 Pe napeime Rachel kilapui Bilhah ne mna kelume cai, Dan nah Naphtali. 26 Leah kilapui Zilpah napei kena cai, Gad penai Asher. Aidung de peciakne Jacob namedung Paddan Aram gade pecu mna kebeumedung. 27 Jacob pe pei Isaac taiga gwanglu, Mamre ga Kiriath Arba (Hebron dede lie la) ga, Abraham nah Isaac kelungh bam ga.✝

28 Isaac mmi haige eh riakheset lunghlu. 29 Isaac pe ngyi tütdi eh tsaidi, nah pe paumedung taiga ge kaidi, lungh mlung eh cing süt kecume ge eh. Esau penai Jacob, pe napei kena, pecu kungdi.