1 Ma aidungde cinzwa gwang kedicai, mige Joseph dade rangdi, "Ainie, n pei sai zeulie." Cine pa pe napei kena Manasseh penai Ephraim de peu pecu nzanglu. 2 Jacob de, "Pielo, n napei Joseph ncu pie kera gwanglu delie," de eh pau beu ge, Israel pe kengkieng pelane teu eh cuh zeu ga bamlu. 3 Jacob Joseph dade rangdi, "Kengkieng Tinggwang Canaan deu Luz gade ada ge pezu liagai. Pa acu samlam beu 4 nah a dade rangdi, ‘Ainie, Ih ncu n name kekiee peu eh n leuhme kieesüt zie. Ih ncu heleuh kekieege tei beu zie. Ih aipau deu de n leuhme de kelungta penui gu tei kera pwapeu zie.’ 5 Cu n napei kena de, Ih nda Egypt ga gwanglu kemak dwa ncu Egypt deu gade mna kebeu de, penai au agu lie. Ephraim penai Manasseh agu zie, Reuben penai Simeon agu kecu nzwa. 6 Penai cai n name lungh dai kecube n gu zie; penui magum ga penui de penui sinabe kena zi kangga de qudi zie. 7 Dede a ziemne au, Ih Paddan gade kegwang dau, A suisia zu lie, lampui gade Canaan deu gade Rachel tsaidi, Ephrath ga mie kera dei kemak ge gade. Ih pecu Ephrath ga kegwang lampui gage kungdi" (cide cai, Bethlehem).

8 Israel Joseph napei kena de ngaulu ge, pa keteudi, "Aipau kena de cau na no?" 9 Joseph pe pei dage ranggai, "Penai au a napei lie, Tinggwang ne aika de acu pwa kepeube kena lie." Israel rangdi, "Penai de ada ngngwa gwanglo, iciude Ih penai de samlam beulu kerane." 10 Cu Israel miak mneidi pa cing kedine, cine pa ngaulu tadi. Cine Joseph penaide petaiga ngngwa gwang beu, nah pa penaide kemam gai nah penaide tui gai. 11 Israel Joseph dade rangdi, "Ih madaude ncu ngau dai kera cetlama, dede Tinggwang acu peu n name dede ngau kera peuda." 12 Ge Joseph penaide Israel ngkokpui kena kak gade teu mpet lu, delwe pa pe zu hangdeu ga keu miedi. 13 Joseph penai hangna na de, Ephraim de pe ba zetle ga Israel ba hile bie nah Manasseh de pe ba hile ga Israel ba zetle bie ge teulu, delwe penaide petai ga ngngwa gwang kaibeu. 14 Israel pe ba zetle nzang pet delwe Ephraim peu gage kailu, pa au henabe, nah pe ba hile Manasseh peu gage kailu. Pa pe ba kena de barilu, kedanemene Manasseh be neraibe kecune. 15 Israel Joseph de samlam eh ranggai,

"Tinggwang, a peime Abraham nah Isaac pe dwa tet kegwangbe de,

nah Tinggwang henai tingba kecang de a mapiela kelabe de,✝

16 tinggimgwabe, rejam lu kebui peciakne gade acu kelikelube de aipau peina kena dede peu pecu samlam beulo.

Peu a zi nah a peime Abraham nah Isaac zi penai da la kelube teilo!

Peu penai name kideu ga kekiee ge lungh kelube tei lulo."✝

17 Joseph pe pei pe ba zetle pwa Ephraim peu gage kaipwa kebam ngau luge, pe sui tadi. Pa pe pei ba pwa Ephraim peu gade Manasseh peu gage kai kera teulu. 18 Joseph pe pei dade rangdi, "Ciciu ma, a pei; kedanemene aide be neraibe lu. N ba zetle pwa pe peu gage kai lulo." 19 Pe pei mlaidi eh rangdi, "Ih ci, a na Ih ci. Pa de heleuh ge teilu zie, nah pa de heleuh kedi ge tei luzie. Dede pe caihereibe au pe swa diki zie, nah pe leuhme heleuhdung kekiee ge tei lu zie." 20 Israel cipau nai penai de aipau samdung de teu eh samlam beu,

"Israelme mide samlam kebeu dau nnai zi teu eh ainzwa rang zie,

‘Peu Tinggwang de ncu Ephraim penai Manasseh nzwa teibeu lulo.’"

Ainzwa eh, Israel Ephraim de Manasseh dwa kailu. 21 Israel Joseph dade rangdi, "Ainie Ih au tsaidi lai zeuda, dede Tinggwang ncu ngngwa la zie, nah ncu n paume deu gage ngngwa cailigwang beu zie. 22 Nang, n siname reu kebambe de, Ih Amoritme dade a kiengtie nah a lakpi le keu kelu lamlwa deupia de Ih ncu peula lie."✝