1 Ge Joseph pesui siasütdi eh pe pei zu ga gumpunglu delwe pa pe reu ga hap nah pa pecu kemam bamdi. 2 Joseph pe kilame daru kecime de pe pei pau keniak ra sam kaibeu. Cine daru kecime Israel de keniaklu. 3 Penui cide zie riakdai ge teibamdi, kedanemene peting ci kenzwa ge keu keniakla kecune. Egyptme zie riakhena ge ziemne pecu heei eh hap.

4 Heei eh kehap tingbadung cang di ge, Joseph Pharaoh kilungme dage marang eh ranggai, "Cu Ih magade nnui miakngau gade nnui suibe teilu cai, kehereide Pharaoh dage sam aide rang beu lo, 5 ‘Apei acu peu sampet eh ranglu, ainzwa eh, "Pielo, Ih au tsai lai zeu da. Canaan deu ga a rau Ih aziemne ne mtei pwakebam de gage acu kunglu lo. Cika ge nang acu kung zie." Cu cine acu peu hang eh a pei de kunglo, nah iciulu de Ih cailigwang dai zie.’" 6 Pharaoh keli gai, "Miecu delwe n pei de kung lulo, pa ncu peu sampet kelu nzwa." 7 Joseph pe pei de kung kera hangdi. Pharaoh kang ga kedime peciakne pecu nzang miedi, pe kilung ga hangkiame, Egypt deu ga mina kemlangme pelane, 8 Joseph kilungme peciakne, nah pe sinamedung, nah pe pei kilungme peciakne de nzang miedi. Dede penui namedung, penui gu kauhaudung nah penui gu ketumdung cai Goshen deuceu gage kai nzeudi. 9 Bagidung nah hekwen keteume de pecu ngngwa mie. Cide au mina hemaa disüt kecu ge. 10 Penui Jordan de mcwa kebam, Atad hecaipung ga gwang luge, penui suisiet kepui tei heei eh hap süt bamdi. Cika Joseph lang henane pe pei de heei eh kehap ge teilu. 11 Canaanme cipau deu ga lunghkebamme, Atad hecaipung ga heei eh hap kebam ngau luge, penui rangdi, "Aide au Egyptme ziemne helung sia süt kecu ting ge lie." Cide ziemne heni cide de Abel Mizraim lie eh qulu, cide au Jordan kah kepet ga. 12 Cine pe namedung Jacob ziemne pa penuide rang kebeu de nzwa teilu. 13 Pe namedung pe pau Canaan deu ga pung gwanglu nah pecu Mamre taiga Machpelah luh ga tsupop gage kungdi. Abraham tsupop luh kencüt de heraukie tei kerane luilu. Pa Hittitme pei Ephron dade cide luilu. 14 Pa pe pei de kung kedicai, Joseph pa, pe sinamedung de nzang lu eh, nah pecu pe pei de kekung ga nzang kemieme peciakne de ngngwa Egypt ga cailigwang di.

15 Joseph sinamedung penui pei tsai kedi ngaulu ge, penui rangdi, "Magade Joseph anuide pe rata bam eh anui peda kesia tei gai kedi pelane ziemne anuide hekum pei daicai dainzwalai?" 16 Cine penui Joseph dage sam langgai eh ranggai, "N pei tsai kedidwa marang diak eh ranggai, 17 ‘Joseph de aide rangbeu lulo, "Kehereide n siname hezai kemak ta tei kedide nah penui n dage kesia tei kegai dau penui mau kedide gibeulo."’ Cu kehereide n pei Tinggwang kilame mau gibeulo." Penui pe dage cide rang kegai dau Joseph hapdi. 18 Pe siname mie delwe pe dwa gade de keumie. Penui rangdi, "Ainie, anui au n kilamedung lie." 19 Dede Joseph penui sam keli eh, "Ngngi so. Tinggwang bam ga Ih bam ni? 20 Nnui au, acu teikeherei kera tei, dede Tinggwang cide teu makeyi teilu, henai nnui ngau kebam nzwa, mina kekiee ge teilung peu ringlu kerane. 21 Cu cine nnui ngngi so. Ih nnui nah nnui name mapielu zie." Ainzwa eh pa penui lung taumla beu delwe samkeyi le penui lung teinciep beu.

22 Joseph Egypt ga pe pei kelak de ngngwa lunghdi. Pa mmi haige kerei ge lungh. 23 Joseph Ephraim name ceheu pe kecumbe kecang ngaulu. Pa Manasseh napei Machir namedung Joseph ngkokpui gage kekaidung dede ngaulu. 24 Joseph pe sinamedung dade rangdi, "Ih tsaidi lauda; dede Tinggwang nnui da gwang bi zie, nah nnuide aipau deu gade ngngwa mpet delwe pa Abraham de, Isaac de nah Jacob de pwapeu kera sampet kelu deu ga ngngwa gwang beu zie."✝ 25 Pecai Joseph Israelmedung de peu sampet lu. Pa rangdi, "Tinggwang nnui da gwang bi zie. Cipau tingdau nnui a rahdung aikade pung mpet lu maisia."✝ 26 Iciu eh Joseph mmi 110 dau tsaidi. Penui pe paau keniaklu delwe pecu Egypt ga hepaaubung gage kainzeu di.