1 RAMPAUBE Abraham de peu Mamre ga mhubangdung pi gade pecu ngaugai, pa ting lum peri dau pa paiki kimui ga ntum kebam dau. 2 Pa ngangcuh piegai nah, ainie, pa mi hang cum pe dwa ga sap kebam ngaulu. Pa penui de ngaulu ge, pa penui de redau kerane paiki kikam gade pakpet delwe hangdeu le keu hena mielu. 3 Pa rangdi, "A Rampaubo, magade Ih n miakngau gade nsuibe teilu liecai, kehereide n kilabe ki tetkahdi helo." 4 Peu dui nage de pwa gwanglu eh nnui pi hui lo, nah tsingbang de kang ga nnui mtak lulo. 5 Nnui nnui kilabe da gwang kelu nzwa, peu acu taktyei kecam nage de teugwang lo, iciu eh nnui de tei nring lu kerane. Aipaucai nnui nnui lampui ga tetgai lubui. Penui keligai, "Nang kerang de nzwa teilu." 6 Pecai Abraham zette paiki ga nlwet Sarah dade rangdi, "Kelwalu, tokkui keyibe seahs kecum* keulu, cide henet lu delwe tangku rulu." 7 Iciu eh Abraham ketumhau da pakgwang eh ketumna kemdui nah pelui keyi nage teulu eh kilabe de cide peudi, nah pa cide lamlui kera kelwalu. 8 Pa tungduikang, tungdui nah ketumna mtei pwa kebam de pwa lwe, taktyei penui dwa ga kaibeu. Delwe penui ma ketyei dau pa penui taiga sap eh tsingbang kangga kwabam.✝

9 Penui pedade rangdi, "N nau Sarah daiga bam no?" Pa keligai, "Cika paiki ga bam lie." 10 Penui hangge keteu, "Ih heriaktingdau gwang dai bi zie, nah pielo, n nau Sarah mipeina ge de mna luzie." Pecai ga kebam, paiki kimuiki ga de Sarah kingnei bam.✝ 11 Cu Abraham penai Sarah au cing di, lungtiee süt nah Sarah mipui hena lung lu kebui ting be de kahdi.✝ 12 Cine Sarah pe katei pecu nuidi, pekatei pe dage rang eh, "Ih ta kedi cai ne nah a mpaube cing kedi caine, Ih cu de hena nepam kecu suiyi de ngau lubui reu ni?" 13 RAMPAUBE Abraham dade keteu, "Daitei Sarah nui eh rang no, ‘Ih cing kedi cai ne hena lungh kesang lubui reu ni?’ 14 Keheibe de RAMPAUBE ziemne tei pa ham zie ni? Ih ne riem kegai dau, heriakting dau, Ih n da cailigwang zie. Nah aipau tinghi ngkiekum Sarah mipeina ge de mnalu zie." 15 Cidau Sarah mlaidi nah rangdi, "Ih nui ma," kedanemene pa ngngi kedine. Pa samkeligai, "Ma, nang nuida."✝

16 Pecai mina cidung hangcum tet kerane cuhlu delwe Sodom lebie pie ngkeigai. Abraham penui de ngngwa miedi penui de penui lampui ga tet kecu pie kerane. 17 Dede RAMPAUBE rangdi, "Ih tei lai eh kebam de Abraham dade Ih kebaidi zieni, 18 kedanemene Abraham leuhme kedi ge nah kengkieng ge tei zielu, nah pe dade kideu ga heleuh pelane de samlambeu zielu?* 19 Kedanemene Ih pecu kedetlu da iciu de pa pe name nah pe kilungme de ledeu pwa pe caide RAMPAUBE zai de kaizeu lu kerane, masang nah kemzeu be teilu kerane, iciude RAMPAUBE Abraham dage rang kebeu de teicang lu kerane." 20 Pecai RAMPAUBE rangdi, "Ih Sodom penai Gomorrah namdidung de kemmau ha sui süt bam kedine, nah penui mau dizu kedine, 21 Ih cu cika nghung pie zie nah pecu mmau kebam ada kegwang de penui tei kesang mi me bi kecu pie zie. Magade cinzwa melie cai, Ih cilu bui."✝

22 Cine mina cipau kena cika de tet nreu pwa Sodom lambie miedi, dede Abraham, RAMPAUBE dwa de cuh sap bam di. 23 Pecai Abraham RAMPAUBE da nreu gwang delwe rangdi, "Nang makesangme de kemaume de si eh ngkapdi dizie deni? 24 Magade makesangme riakngei namdi ga bam cai. Nang peciakne de ngkap dizie de ni nah makesangme riakngei cika kebamme ziemne cipau ni de kelibeu lak deni? 25 Nang cikenzwa ta tei dilak, makesangme de kemaume de si eh teitset kera, iciu eh makesangme dede kemaume dage tei kegai nzwa tei teigai kera. Nang cikenzwa au tei di lak! Kideu pelane tu ketiakbe kemzuibe teilak ni?" 26 RAMPAUBE rangdi, "Ih Sodom namdi ga makesangme riakngei ngau lu cai, Ih penui ziemne namdi pelane de mbai beu zie." 27 Abraham samkeligai eh rangdi, "Pielo, Ih a Rampaube de resiu kera acu tiaklu, Ih au rebui nah mimütdung ge swa si meliede. 28 Magade cika hang mengei riakngei swa makesangme cam bam lie cai dainzwa lai? Nang hang mengei cam kedi ne namdi pelane de ngkap dizie deni?" Pecai pa rangdi, "Ih riakdai mengei ngau lu cai, Ih ngkap di lak." 29 Pa pecu mpau dai eh rangdi, "Magade cika riakdai bam cai?" Pa keligai, "Ih riakdai de ziemne cide ngkap dilak." 30 Pa rangdi, "Kehereide n rata diso, Rampaubo, ciu eh Ih rang silu kerane. Magade cika camrei bam cai." Pa keligai, "Ih cide tei lak, Ih cika camrei ngaulu cai." 31 Pa rangdi, "Pielo, Ih a Rampaube de resiu kera tiak luda! Magade cika ngkai ngaulu cai." Pa keligai, "Ih ngkai de ziemne cide ngkap di lak." 32 Pa rangdi, "Kehereide n rata di so, Rampaubo, nah Ih pia ge kamtube samrang zie. Cika hang kerei ge au ngau lu zie." Ge pa rangdi, "Ih kerei de ziemne ngkap dilak." 33 Abraham de ngngwa mpau cangdi herizi, RAMPAUBE pe lampui gage tet gaidi nah Abraham kilung cailigwangdi.