1 Pecai Tinggwang Noah nah pe napeidung de samlam beu, nah penui dade rangdi, "Hena kekiee lunghlu, lungh hing petlu, nah kideu lungh hamlu. 2 Kideu ga ring kela makaune pelane, ting ga nruine pelane, hangdeu ga bwa mlai kela pelane, nah jaaidi ga hekadung pelane n mie hing eh lungh zie. Penuide n kengkieng kang gage kaibeu dida. 3 Mlai eh lungh kebam pelane n ziemne taktyei tei zie. Mabang kemdiakdung Ih ncu kepeu nzwa, cu Ih ma pelane ncu peu la.✝ 4 Dede nang hetei pe kering ria kebambe tyei lak, cide cai pejai, kebam be.✝ 5 Dede n jai ziemne, n jai ga keringria kebam de, Ih pemi luuzie. Makaune pelane gade Ih cide luu zie. Mina keheibe ba gade, cide cai, pe sinabe de daptset kedibe de ba gade, Ih cipau pei de keringria de ziemne saja peu zie.

6 Keheibe de mina de daptset cai, mine pecu de daptset zie,

kedanemene mina de Tinggwang rehi gade Pa mina de tei kelune.✝

7 Nnui ziemne au, hena kekiee lunghlu nah lungh hinglu, kideu pelane reu lungh hamlu nah cide reu lungh hinglu."

8 Ciu eh Tinggwang Noah de mpau nah pe napeidung peda kebamme dage ranggai, 9 "Aziemne au, kingneilu! Ih nnuide nah nnui leuhme lungh leu gwang kerame de ngngwa samkak zeu da, 10 nah nnuide ngngwa ring kela makaune pelane de, nruinedung de, kauruine de, nah kideu ga makaune pelane, nnuide ngngwa keladung de, liem gade mpet kelu pelane gade, kideu ga ring kela kaune pelane kecang. 11 Ih aidung de teu eh nnuide ngngwa samkak la, madaude kau kengngi leune de duinai gele ngkap dai lakta. Madaude kideube de duinai ne ngkap dai lakta."

12 Tinggwang rangdi, "Aide samkakkelu marehi de Ih tei kebam anui kakga nah kaukengngi pelane nnuide ngngwa kela, nah gwang dai kera ceheudung peciakne ziemne: 13 Ih agu tangningnaria hemwa gage kaigaila, nah cide kideube anai kakga samkak kelu marehi ge zie. 14 Ih hemwa teu kideu gumlu de nah tangningnaria hemwa ga ngau kecu dau, 15 ciu de Ih nsunglu zie a samkakkelu, anui kakga nah kaukengngi pelane kakga kebamde. Duidung madaude duinai mmi dai lakta mina leune de ngkap kera. 16 Tangningnaria hemwa ga pet zie nah Ih cide ngau zie, iciude kideu reu ga kaukengngi pelane nah Tinggwang kakga kelungta samkakkelu de nsunglu kerane."

17 Cidau Tinggwang Noah dage rangdi, "Aide samkakkelu marehi ge Ih nah kideu ga kaukengngi pelane anai kakga samting kelu lie kecu."

18 Noah napeidung liem gade mpet kelume cai Shem, Ham, nah Japheth. Ham cai Canaan pei da. 19 Aipau hangcum de Noah napeidung da, nah aidung de dade kideu pelane ga heleuh hinglu.

20 Noah heta ketame ge teidi, nah pa kube luh talu. 21 Langnai ge Noah zau kesa saklu eh miedi. Pa paini radi delwe pe paiki ga paula zeubam di. 22 Ciciu eh Ham, Canaan pei, pe pei paula kebam ngau lwe, nah pesinabe kena hegwale kebam dage rang beu. 23 Cine Shem nah Japheth pai teulu nah penai hekeutu gage kailu, nah caisim lüt penai pei paula kebam de haa lu. Penai zu kedale nreu lwe, iciu de penai pei paula kebam de penai ngau melu kerane. 24 Noah pe zau sakmie gade mcing luge, pa pe napei henatube pe dage daipai tei gai bi cilu ge. 25 Cine pa rangdi,

"Canaan reset punglu.

Peu pecu pe sinabe kilame kila tei lulo." 26 Pa rangsi eh,

"Peu RAMPAUBE, Shem Tinggwang, de peu Samlam pung kelube tei lulo,

nah Canaan de peu pe kila tei lulo.

27 Peu Tinggwang de Japheth, tingdeu tei mdi beulo,

nah peu pecu Shem paiki gage pe kilung tei lulo.

Peu Canaan de pe kila tei lulo."

28 Duinai cai, Noah mmi haicum eh riangngei lunghlu. 29 Noah teilung pelane cai mmi hai hekui riakngei, nah pecai pa tsaidi.