1 Cu Jacob Egypt deudi ga hetsiu kebam cilu ge, pa pe napeidung dage rang eh, "Daitei nnui hangge gede pie bamno?" 2 Pa rangdi, "Pielo aika, Ih siu da Egypt ga mei bamlie kecu, cika mie cu, delwe nnui ziemne luilu cikade iciu eh anui nzeu tsaidi melu kerane nah ringlu kerane."✝ 3 Joseph sinapeidung hangkerei mei lui kerane Egypt ga miedi. 4 Dede Jacob Joseph sinabe Benjamin de lang gai ma, pe sinamedung dage, kedanemene pa rangdi, "Peda keherei gwang dilu kera Ih hing kecune." 5 Israel napeidung mei lui kera kegwangme kak ga ngngwa lwe gwanglu, kedanemene Canaan deu ga herakum kum kedine.✝ 6 Joseph ne cu deuceudi tei bam Egyptme deu reu. Pa ne hangdeu pelane ga minadung dage mei zwa beu bam. Joseph sinamedung gwang pe dwaga keumie penui zu hangdeu gage bamdi. 7 Joseph pe sinapeidung de ngau lwe penui de cilu, dede pa penui de peu pecu cima delwe pa penui dade pekwa hu eh marang. Pa penui dage rang eh, "Dai gade nnui gwang la no?" Penui rang eh, "Canaanme deu gade taktyei lui kerane." 8 Joseph pe sinamedung de cilu, dede penui pecu ci luma. 9 Ge Joseph pe mang kiedung nsunglu, pa penui de mmi kecu mang de, nah pa penui dage rang eh, "Nnui reulimme! Nnui anui deu kemneidung de pie lai eh lada." 10 Penui pedade rangdi, "Ma a mpaubo. N kilamedung taktyei lui kera gwangla. 11 Anui pelane au pei ge napeidung. Anui au ma kesangme. N kilamedung au reulimme dung ma." 12 Pa penui dage rang eh, "Ma, nnui anui deu kemneidung de pie lai eh lada." 13 Penui rangdi, "Anui n kilamedung anui sinamedung hangkereikena, Canaan deu ga mi hangge napeidung lie. Pielo henatube cudau anui pei da bam, nah sinabe hangge ringbam meda." 14 Joseph penui dage rang eh, "Ih nnui dage kerang de da; nnui au reulimmedung. 15 Aide le nnui de kedak pie zie. Pharaoh teilung gade, nnui aikade tet gailak da, nnui sinabe henatube aika gwang kemaktane. 16 Nnui kakgade hangge de langgai eh peu mie nnui sinabe de ngngwa lulo. Nnui hebaangki ga bam zie, iciu eh nnui kerang samdung de kesang mi mebi kecu ci nci lu kerane. Maige, Pharaoh teilung gade au, nnui reulimme bi geda." 17 Pa penui pelane de langcumne hebaangki gage kai zeu di.

18 Joseph penui dage rang eh langcumne benai, "Aide tyei lwe ring lu, kedanemene Ih Tinggwang mie hinglu. 19 Nnui masang kecume liecai, peu nnui sinabe hangge de hebaangki ga bamlu, dede nnui tet cu, mei pung lu herakum kum kebam nnui kelakdung ziemne. 20 Nnui sinabe henatube de ada ngngwa gwang lu ciu eh nnui samdung de kesanglie kecu nci lu zie nah nnui tsai di lak." Ciu eh penui cide teilu. 21 Penui hangge ge dade rangdi, "Anui mau süt dida ndaa anui caihereibe dage tei kegai de ziemne pa pe ngngia anui da kie kecudau pa pelung keherei süt kedi anui ngauda dede anui kingnei meda. Ciziemne anuida keherei aide gwang bam dida." 22 Reuben penui de keligai, "Ih nnui dage rang meni, ‘Henanabe reu gage kemau tei gai helo eh,’ Dede nnui kingnei luma? Cu, pielo, pe jai anui reu ga gwang dai au da." 23 Joseph penui kerang de ci dede penui cide cima, kedanemene penui kakga pauswa kedine. 24 Joseph penui de nreu tetdi delwe hap bam di. Pa penui da cailigwang dailu delwe marang dai. Pa penui kakga de Simeon de teu lu delwe penui miak dwa gade pecu kanglu. 25 Ciciu eh Joseph pe kilamedung dage pe swacingmedung püt mei le tei pui beu lo, nah penui püt rip gage rangkang kaidai beu lo, nah penui beu ziemne taktyei peu lo aja kaigai. Ge penui ziemne cinzwa teibeu.

26 Penui sinamedung mei le penui gadadung püt tei lu nah cika de tetdi. 27 Penui cipauziu kezeuni gade mige gada pok tei zie lie pe püt letlu, ge pa pe rangkang ngaulu. Ainie, pe püt peu gade. 28 Pa pe sinamedung dage rang eh, "A rangkang kaidai beu pwa bam lie. Pie gailo cide a püt ga bam." Penui lung keherei di nah penui mbeu eh nreu hangge ge da ge ranggai, "Aide dai no Tinggwang anui dage tei kegai?" 29 Penui Jacob da gwang, Canaan deu ga penui pei da nah penui dage matei kedi pelane pe dage ranggai, penui rangdi, 30 "Deuceudibe, hangdeu mpaube, anui dage pe sam hungsüt eh nah anui de hangdeu cika reulimme lie eh cet di. 31 Anui pedage rang eh, ‘Anui au makesang minadung. Anui au reulimme ma. 32 Anui siname hang kereiekena, nah pei ge na. Hangge au ringbam meda, nah henatube henai dau anui pei da bam Canaan deu ga.’ 33 Hangdeu mpaube minabe, anui dage rangdi, ‘Aide le Ih nnui makesangme lie kecu cilu zie. Nnui sinabe hangge de adage kai zeu lu, mei punglu delwe herakum kum kebam nnui kilungmedung ziemne, nah nnui lampui ga tet cu. 34 Nnui sinabe henatube ada ngngwa gwang beu lu. Iciu de Ih nnui reulimme kemak, dede nnui mina makesangme lie kecu cilu zie. Iciu cai Ih nnui sinabe de nnui de peu dai zie, nah nnui hangdeu aika heli tei lubui.’"

35 Cinzwadi eh penui penui pütdung ligai ge, ainie, penui keheibe de rangkang penui püt riep bam. Ge penui nah penui pei penui pütdung ga rangkang ngau lu ge, penui ngngi di. 36 Penui pei Jacob penui dage rangdi, "Nnui acu peu a namedung pelane de tei nggadi. Joseph au ringbam meda, Simeon gah da, nah nang Benjamin de ngngwa tetdi lau ni. Aidung pelane gade Ih ne rei tu be da." 37 Reuben pe pei de marang eh, ranggai, "Ih Benjamin de nda ngngwa caili gwang dai mecai a napei kena de nang teitset di lu. Aba gage pecu kailu, nah Ih pecu nda ngngwa gwang dai beu zie." 38 Jacob rang eh, "A napei nnui de nzang mie lak. Pe swacingbe tsai dida nah pa rünne dida. Magade nnui lampuiki ga kemie dau kerehim peda gwang cai, iciu eh nnui a peu tam puu kedi caine alungrei tei beu eh ketsai kecang lubui."