1 Cinzwa eh aidungde cai, Egypt gwangpei piak kepwabe nah hegwangpei tangku kerube penai mpaupei Egypt gwangpei suisiet teidi. 2 Pharaoh pe gwa ketei kedibe kena de pe rata di, hepiak kepwa kedibe nah tangku kerube kedibe de. 3 Pa penai de kedibe ki ga hegwangpei baangme ki gage kaidi, Joseph de kai kenzeu hebaangki de gage. 4 Hebaangki ga kedibe Joseph de peu penuide pie rengei, nah pa penui gwatei. Penui peting ketie ge hebaangki ga bamdi. 5 Penai pe mang riep mmi, Egypt ga hegwangpei piak kepwabe nah tangku kerube hebaangki ga baang kenzeube kena, zeuziu ge gage penai hangna na de penai mang riep mmi, nah hemang kena na de pekie ketsamtsam. 6 Joseph tingcang penai da gwang nah penai de ngau. Ainie, penai sui sia bam. 7 Pharaoh gwa ketei kedime pecu ngngwa pe mpaube ki baangki ga kebambe kena de pa keteu, "Daitei henai nnai suisia süt bam no?" 8 Penai pe dage rang eh, "Anai hangna na de hemang ge riep mmi nah cide migede pekie ranglu kera galie." Joseph penai dage rang, "Tinggwang hemang kieh siaklu kelabe melui ni? Adage rang gailo, kehereide."

9 Hepiak kepwa kedibe Joseph dage pemang ranglia. Pa pe dage rang eh, "Amang gade, ainie, kubebang ge adwa ga bam. 10 Kubebang ga pekiak kecum bam. Peneidung bwa herizi, pepadung pa pet lu nah kubetsidung meudi. 11 Pharaoh piak a ba ga bam. Ih kubetsidung keulu nah Pharaoh piak gage tui gai lu, nah Ih Pharaoh ba gage hepiak be habeu di." 12 Joseph pe dage rang eh, "Aide pekie da. Pekiak kecum de tingba zie lang cumne. 13 Lang cumne gage Pharaoh n peu teucu beu zie nah peu ncu nta ga tei daizie. Nang Pharaoh piak pwa pe ba gage kai zie, nang ndaa pe piak pwa kecudau nzwa. 14 Dede acu nsung gailo nang lung reluikelu dau, nah kehereide acu keku pwa lialo. Pharaoh dage aha ranglo nah acu hebaangki aika de keumpet beulo. 15 Kesangbe acu Hebrewme deu gade tui teuh mpet. Nah Ih aikade de mage de penui acu hangdeukang baangki aide gage kai kera ta tei ma."

16 Tangku kerube kedibe hemang kie rang kegai dau ngau pesui lu, pa Joseph dage rang eh, "Ih de amang mmi, nah, ainie, tangku rak kecum apeu ga bam. 17 Perak reu ga Pharaoh ziemne ru kelu tangku ketsamtsam pwala, dede nruinedung ne cidung tyei bam a peu reu pungkela rak gade." 18 Joseph keligai nah rang, "Aide pekie da. Tangku raak kecum de lang cumne da. 19 Lang cumne gage Pharaoh ncu lungmpet beu zie nah ncu tsingbang gage kezu luzie. Nruinedung ne n teih tyei luzie." 20 Cinzwa eh lang cumne cai Pharaoh de kemna tingba. Pa pegwa keteime peciakne ziemne taktyei teleilu. Pa hepiak kepwabe kedibe nah tangku kerube kedibe de lung mpet beu, pegwa keteimedung kak gage. 21 Pa hepiak kepwabe kedibe de nda ta gage kaidai beu, nah pa Pharaoh ba gage hepiak pwa gai dai. 22 Dede pa tangku keru kedibe de gwaktsetdi, Joseph penui dage rang kebeu nzwa eh. 23 Dede hepiak kepwa kedibe Joseph de nsung lu ma, dede pecu nsung tadi.