1 Jacob pepei lung kebam deu ga lungdi, Canaan deu ga. 2 Aidung de Jacob kibaume hadung. Joseph, rehang mege mmi kereiehena kauge, pe swacingme de ngngwa meurünhau de kwabamla. Pa pe pei nau kena Bilhah nah Zilpah napeidung de ngngwala. Joseph penui heta kesia ketei hadung teugwang penui pei dage rangbeu. 3 Israel pena kedame de swa Joseph de ku ki la, kedanemene pecing cai ne pecu mna kelune. Pa pecu ncwa yisüt kecu ge teibeu. 4 Pe swacingmedung penui pei Joseph de penuide swa ku ki kecu ngaudi. Penui pecu ngkau sütti nah sam keyi de pecu resiu tadi.

5 Zeuziu ge Joseph hemang ge mmidi, nah pa pe swacingme de cipau de paulia. Penui pecu nkau gwadi. 6 Pa penui dage rang eh, "Ngaunggia eh aipau mang Ih mmi de kingnei gailou. 7 Ainie, anui pelane hereibuidung luh gade kang hekwa bam nah ainie, agu hereibui cuhlu delwe sap dung bam, nah ainie, nnui gu buidung gwang twagwa lu nah keumie bam agu hereibui da." 8 Pe swacingmedung pe dage rang eh, "Nang anui reu hegwangtei lau ni? Nang anui reu di kesang lau ni?" Penui pecu nkau gwa di pemang ziemne nah pesamdung ziemne. 9 Pe cai pa pe mang keda mmi dai nah cide pe swacingmedung da ranglia. Pa rang eh, "Ainie, Ih amang kedage mmi: Tingnaimiak nah hekei nah hegidung kereieket ada keumie." 10 Pa pe swacingmedung dage kerang nzwa pe pei dage ranggai, ge pe pei pecu kesiudi. Pa pe da rang eh, "Nang kemmi mang de daipai mang ge de no? N pui nah Ih nah n swacingmedung hangdeu ga nda ge keumie kera gwang kesang zieni?" 11 Pe swacingmedung pecu periak di, dede pe pei cide pepeu sui ga ladi.

12 Tingnai ge pe swacingmedung penui pei gu hekaune hau ma pie zie lie Shechem ga mie. 13 Israel Joseph dage rangdi, "N swacingmedung Shechem ga hekaune hau ma piela me ni? Gwang lu, Ih ncu penui dage langgai zie." Joseph pe dade rangdi, "Ih mtei luda." 14 Jacob Joseph dade rang eh, "Mie cu, delwe n swacingmedung nah hekaune hau yi la mi mie pielo, nah ada sam teu gwang beulo." Cine Jacob pecu Hebron langkam gade lang mpet gai, nah Joseph Shechem ga mie di. 15 Ge mipei ge Joseph de ngaulu. Ainie, Joseph luh ga hui la. Mina be pecu keteu, "Nang daipai peei la no?" 16 Joseph rang eh, "Ih a swacingmedung de peei la. Kehereide acu ranglia lo penui daiga ketumhau de piela bi." 17 Mina be rang eh, "Penui aipau bam gade tetdi da, Ih penui rang cu siuda, ‘Anui Dothan ga mie go.’" Joseph pe swacingmedung cai zuimie nah penui de Dothan gade ngaulu.

18 Penui pecu kemdei gade ngaugai, nah pa penui da gwang cang kemakne, penui pe dage teigai kera heciem peeidi pecu teitset kera. 19 Pe sinamedung hangge ge dade rangdi, "Pielo, hemang kemmibe de gwang la da. 20 Cu gwanglu, anui pecu teitsetdi go nah hekwaki ge gage kai di go. Anui rang zie, ‘Renaam kau ge ne pecu tui di delie.’ Anui pie zie pe mangdung dainzwa dizie bi kecu." 21 Reuben cide siulu nah penui ba gade pecu kelibeu. Pa rang eh "Anui pe teilung keudi me lugo." 22 Reuben penui dage rangdi, "Tei rejam so. Hetaideu ga kebam hekwaki de gage keliengai di pecu, dede pereu gage nnui ba kaiso," iciulude pa penui ba gade pecu keli lwe pepei dage ngngwa cailigwang beu lu kera. 23 Cinzwadi eh Joseph pe swacingmedung da gwang canglu ge, penui pe ncwa keyi de lwak lu. 24 Penui pecu tui lu nah pecu keliengai di hekwaki gage. Hekwaki cide mtaku eh dui de ga bam.

25 Penui matyei kera ntumlu. Penui ngang cu nah piegai, nah, ainie, Ishmaelme gu Caravan ge Gilead gade mbeuh gwangla, penui utdung ga mosala nah tsing ca nah myrrh püt teipungla. Penui mbeuh la cidungde Egypt ga pungmie lai eh. 26 Judah pe sinamedung dage rangdi, "Anui daige ngau lu lai no magade anui anui caiheriebe de teitset nah pe tsit hekim kelu le? 27 Gwanglu, nah anui pecu Ishmaelme dage zwa beu di go nah anui ba pecu kai mene. Kedanemene pa anui sinabe, anui teijai lu." Pe sinamedung pecu kesuizwa lu. 28 Midianme heli keteime kah gwang. Pe sinamedung Joseph de teu ncuhlu delwe pecu hekwaki gade teumpet lu. Penui Joseph de Ishmaelme dage rangkang geu ngkai gade zwadi*. Ishmaelme Joseph de Egypt ga pung gwangdi.✝

29 Reuben hekwaki ga cailigwang, nah, ainie, Joseph hekwaki ga bam ma. Pa pesuisia eh pe paidung hietdi. 30 Pa pe sinamedung da cailigwang nah rang, "Mipeinabe aika galie! Nah Ih, dai ga mie lai?" 31 Penui hemeu ge daptsetlu nah pecai Joseph ncwa keulu nah cipau jai gage mpunglu. 32 Pecai penui cide teugwang penui pei da nah rang eh, "Anui aide ngaulu. Kehereide pielo aide n napei ncwa mi mebi kecu." 33 Jacob cilu nah rangdi, "Aide a napei ncwa da. Renaam kaune ne pecu teitset dida. Joseph de teu rak takcai dida." 34 Jacob pesuisia eh pe paidung hietdi delwe pe kia reu ge rosopai balu. Pa peting ketie ge pe napei de hei eh hap. 35 Pe napeimedung nah pe napuimedung pelane pelung tei nciep kera cuhlu, dede pa pelung tei nciep kera lulu tadi. Pa rangdi, "Kesang Ih ana de hei hap eh Sheol ga hung zie da." Pe pei pe ziemne hap ladi. 36 Midianme pecu Egypt gade zwa Potiphar dage, Pharaoh gu kedibe, reketme gu muiteube.