1 Cinzwadi eh minadung kideu ga lungh hing petlu ge nah penui da releimedung lungh luge, 2 Tinggwang namedung* mina napuidung hezukeyi ngaulu. Penui penui katei penui suibe keheibe de penui nau teilu. 3 RAMPAUBE rangdi, "A rabe mina da kelungta la si lakta, kedanemene penui au tsaidi kerame lu. Penui mmi 120 lungh zie." 4 Cidau ting nah pecai de kengkiengme, kideu ga lungh. Aide Tinggwang napeimedung nah mina napuimedung ngngwa lung kecu gade penui hename lunghlu. Nah aidung de mina ndaa kengkieng nah mina kemlangme.

5 RAMPAUBE kideu ga minadung daikenzwage nlien bi kecu nah daikenzwa gede penui lungcet leune au kesia kemau rünne jüja labi kecu ngaulu.✝ 6 RAMPAUBE nnungta di, pa minadung de kideu gage tei gai kedine, nah pa pe lung siadi. 7 Cine RAMPAUBE rangdi, "Ih mina damkegai de tei nggah dizie kideu reu gade; minadung de de nah makaune kedidung de nah bwa kela kaunedung nah tinggimdung nah nruinedung de, kedanemene Ih penuide tei kegai mnung tadi delu." 8 Dede Noah RAMPAUBE miak ngau gade pe suiyi teilu.

9 Aidungde Noah rasamdung. Noah mina makesang mege, nah pa minadung kak gade peting dau kemau tei ma. Noah Tinggwang de ngngwa hekang eh lungh. 10 Noah pena mipeinadung hangcum lungh lu: Shem, Ham, nah Japheth. 11 Kideube Tinggwang dwa gade siadi, nah zaisiet le puidi. 12 Tinggwang kideube de ngaulu; ainie, cide sia dida, kideu ga minadung pelane kesia lampui ga penui la dida.

13 Tinggwang Noah dage rangdi, "Ih mina pelane de peu peting penlih di kera ngau dida, kedanemene kideube zaisiet le penui da puipung bam kedine. Kesang, Ih penuide tei nggah di zie kideube de si eh. 14 Nziemne cypress tsing keyi pwa liem ge tei lu. Liem ga kibungdung tei lu, nah cide hegwale de helungle de tsingcam le cum lu. 15 Aide nzwa eh nang cide tei zie: Liem pe tie cubit hai cum; pedi cubit riakngei, nah pehu cubit camrei. 16 Liem be ziemne kipai ge teilu, nah hebaki penai pe mbie kakga heni cubit ge kainzeulu. Liem mbie gage kikam ge teilu nah cide set cum teilu. 17 Kingnei lu, Ih kideu reu gage duinai langgai lai zeu, tinggim kang ga kebam pe ngyi ketei ring kela leune de ngkap di kerane. Kideu ga kebam mapelane tsai dizie. 18 Dede Ih ncu ngngwa samkak ge tei zie. Nang liem ga nlüt zie, nang, nah n napeidung, nah n nau, nah n napeime naudung ncu ngngwa nlüt zie. 19 Makaune ring kela pelane, kena ketsamtsam nang liem ga teu nlüt lu maisia, penuide peu ncu ngngwa ringlu kerane, pepui nah perie si eh. 20 Nruinedung penui kenzwabe, nah makaune kedibedung penui kenzwabe, hangdeu ga bwa kela kaunedung penui kenzwabedung, ketsamtsam kena ncu ngngwa eh nlüt lu, penuide peu ring bam lu kerane. 21 Taktyei ketsamtsam hekwa lu tyei kelabe nkatei n ziemne hekwalu, ciciu eh n ziemne nah penui ziemne tatyei bam lu kerane." 22 Cine Noah aide teilu. Tinggwang pecu aja pelane kai kebeu nzwa, cine pa teilu.