1 Ciu eh Judah samdung siukelu dau Joseph pekatei pecu ketip gailak di pe kilamedung pelane petai ga sap kebamme dwa gade. Pa sahbak eh rangdi, "Mileune a dade mbai di lu." Cine Joseph pe ha pe sinamedung dage rang kelia dau kilame migede petai ga sap ma. 2 Pa hap mtei sütdi eh Egyptmedung cide siulu, nah Pharaoh kiga cide ci gwang cangdi. 3 Nah Joseph pe sinamedung dage rang eh, "Ih au Joseph. Apei ring bam reu ni?" Pe sinamedung pesam kelilu tadi, kedanemene pedwa gade penui de keheu süt kedine. 4 Ge Joseph pe sinamedung dage rangdi, "Kehereide, atai ga gwang mna lulo." Penui gwang mnalu. Pa rangdi, "Ih Joseph nnui sinabe, nnui Egypt gage zwagai kedibe deda.✝ 5 Nnui lung keherei diso mede nnui katei nnui de mmau so acu aika zwa gai kedine, kedanemene Tinggwang nnui teilung kelilu kerane acu nnui dwa lang nswa gai beu delu.✝ 6 Aipau mmi kena ge hangdeube ga herakum kumdi nah mmi mengei si zie reu cidau pu mede rum delak.✝ 7 Tinggwang acu nnui dwa lang nswa gai, ai nzwa eh nnui de kideu ga peu bang kelume tei lu kerane, nah miswakega aikenzwa gade nnui de peu ringbam lu kerane. 8 Cu cine aika ge acu lang kegai de nnuine ma dede Tinggwang ne, nah pane acu peu Pharaoh gu kedibe tei beuda, peki pelane mpaube, nah Egypt deu pelane ga kengking. 9 Cuhlu nzet eh a pei da gwangcu nah peda rang beulo, ‘Aide n napei Joseph ne ainzwa rang au lie, "Tinggwang ne acu Egyptme pelane reu kedibe teibeu da. Ridi mene, ada gwang lulo.✝ 10 Nang Goshen deuceu ga lungh luzie, nah nang a taiga bam luzie, nang nah n name nah n tsame nah n kaunedung nah n meuründung, nah n mabam kebam pelane. 11 Ih ncu cika rengei beuzie, kedanemene mmi mengei herakum kum kera bam reu, ciu de peu ncu mzeu bam dilak, nang, n kilungme, nah n mabam pelane de.’"✝ 12 "Pielo, nnui miak gade ngau da, nah a sinabe Benjamin miak gade de, amui gade nnui dage sam kerangdung da. 13 Nnui a pei dage rang beulo, Egypt ga a kendu pelane ha, nah nnui ngau kelu pelane. Nah nnui nzet tu gade a pei de aika ngngwa gwanglu." 14 Pa pe sinabe Benjamin de tuipwa lwe hap, nah Benjamin pecu tui lwe hap. 15 Pa pe sinamedung pelane de kemam lwe hap. Cipau cai pe sinamedung pecu mpau bam di.

16 Makie sam be Pharaoh kiga ranglia gai: "Joseph sinamedung gwang bam lie." Pharaoh nah pe kilamedung cide pesuiyi sütdi.✝ 17 Pharaoh Joseph da rangdi, "N sinamedung dage rang lo, ‘Aide teilu: Penui kaune dung püt tei lwe Canaan deu ga mie culo. 18 N pei nah n kilungme dung de ngngwa ada gwang lulo. Ih ncu Egypt ga hangdeu keyi hazie, nah nang hangdeu ga taktyei yitube tyei zie.’✝ 19 Cu ncu ajah peula, ‘Aide teilu, Egypt gade garidung de teugwang lu n namedung ziemne nah nnui naudung ziemne. Nnui pei de ngngwa lwe gwanglu.✝ 20 Nah nnui mabam gidi kerane nnui lung keherei so, kedanemene Egypt deu keyi pelane nnui gu delu.’"

21 Nah Israel namedung cinzwa teilu. Joseph penuide bagidung habeu, Pharaoh aja kai kebeu nzwa, nah penui beuma ziemne taktyeidung de penuide peu. 22 Penui pelane de pa penui paini kereleu ket ket peu, dede Benjamin de pa rangkanggeu haicum nah paini kereleu mengei peu. 23 Pepei ziemne pa aide langgai: Egyptme gu ma yitubedung gada kerei püt; nah mei, tangku, nah taktyei keda si eh gadapui kerei püt teilwe pe pei ziemne nah hebeu ziemne langgai beu. 24 Cine pa pe sinamedung de lang gidi nah penui tetdi. Nah pa penui dage rangdi, "Nnui hebeu tei kela dau kesamlim helo." 25 Penui Egypt gade tet pwa Canaan deu ga gwanglu, penui pei Jacob da. 26 Penui peda rang eh, Joseph ringbam reu, nah pa Egyptme deu pelane reu kengking teu kebam ranglia beu. Ge peswa gadi, kedanemene penui pecu kerang de pa nlum gailak di. 27 Penui Joseph penui dage kerang samdung de pelane peda rang beu. Cidau Jacob pecu pung kera Joseph bagidung lang kegai ngau luge, penui pei Jacob rabe mrak cu dailu. 28 Nah Israel rangdi, "Aide cangda. Joseph a napei cude ring bam. Ih mie pecu ngau zie Ih tsai di kemak dwa."