1 Pecai Jacob pe napeidung de qulu delwe rangdi:

"Nnui gwang ngkwa ncüt lu,

ciu de gwangkela ting ga nnui da daipai gwang ziebi Ih ranglia lu kerane.

2 Nnui gwang ngkwa lwe kingneilu, nnui Jacob napeidung.

Nnui pei Israel sam kingneilu.

3 Reuben, nang au a neraibe, a kengkieng

nah a kengking bangdwabe,

herüt peulu kebui gade yitume ge nah kengkieng gade yitume ge.

4 Duihia kemie kam gaikelak nzwa,

nang nlangtu be lak,

kedanemene nang n pei zeu ga gwang kedine.

Pecai nang cide tei heradi delwe nang a zeu ga gwangdi.*

5 Simeon penai Levi au sina.

Penai kingtiedung au kenggi reunetdung da.*

6 O a keringria, penai ngkiem ga ngngwa hemaa ncüt so;

penai kangbaudung ga ncüt so,

kedanemene cide a nlung suibe ma,

kedanemene penai rata gade penai minadung de teitsetdi kecune.

Penai renga ziemne hetumseudung pi tei telwadi.

7 Peu penai lunghop reset dilu,

kedanemene cide sia süt lu, nah penai rata ga, kedanemene cide pezai sia lu.

Ih penaide Jacob leuhme kakga nzi dizie nah penaide Israel kakga tei zangra dizie.

8 Judah, n siname ncu twa zie.

N ba n ngauraume ngwang gage kai zie.

N siname ndwa keumie zie.

9 Judah au hingho na ge. A na,

nang n taktyei teitset lwe cailigwang luda.

Pa keu henamie, pa hingho ge nzwa ngguizeu, hingho lei ge nzwa.

Cauge ne pecu tei mrak lai no?✝

10 Judah dade hegwang tuitie de nzia dilak,

mede kedime tuitie de pepi kak gade de nzia dilak,

Shiloh gwang kemaktane. Heleuhdung pe sam mzai zie.✝

11 Pa pe gada de kubebang gage keulu eh,

nah gadana de kubebang yitube gage,

pa pe niadung zau gage hetaa luda,

nah pe pai kubetsi dui kegiedung gage.

12 Pe miak zau kegie nzwa gie zie, nah pe gei au tungdui swade ha.

13 Zebulun jaaidi kung ga lungh zie.

Pa limdung ziemne limtaubam ge zie,

nah pe deuraih Sidon namceu ga kecang zie.

14 Issachar au gada kengkiengbe nzwa, meurün ki kena kak ga zeu bam.

15 Pa kemtak bam keyi ge nah hangdeu keyi ge ngaulu.

Cine pa pe hekeutu hepüt kerüt de gage keumie gai zie,

delwe heta ziemne kila ge teilu zie.

16 Dan pe minadung tutiak zie,

Israel leuhdung kak de heleuh ge tei eh.

17 Dan au lampui kung ga henei ge zie,

lampui ga henei kerabe ge

hekwen pideu nsau kelabe,

ciciu eh hekwen teu kelabe de pecaile ge kaugai zie.

18 RAMPAUBO, Ih n kelikelu de kwa bam.

19 Gad, süt ketyeime ne pecu gwaketang zie,

dede pa penui de kekamle de zui eh gwaketang zie.

20 Asher taktyei au keyibe zie,

nah pa hegwangme taktyei keyidung peu zie.

21 Naphtali au heti lie ge pak kelabe nzwa;

pa pe nadung hezukeyi lunghlu zie.

22 Joseph au tsingkiak pe tsi bui kebambe ge,

duilet taiga tsingkiak keyibe ge,

pe kiakdung au herie reu kahpetla.

23 Lakpi kekapme pecu gwaketang zie

nah pecu kap nah pecu teikeherei zie.

24 Dede pe lakpi au ntip eh bam zie,

nah pe ba kena de au ngkieng zie,

Jacob gu Kengkieng Tinggwang ba kena de ziemne,

Israel Tsurabe, Meurün Kekwabe zi de ziemne.

25 N pei Tinggwang ncu ngha zie

nah Ngkiengtube Tinggwang ncu samlam beu zie,

ting nreule samlamdung de teu,

hangdeu kang kecuk ga kebam samlam de teu,

nah hekaune kekiee nah hena kekiee samlamdung de teu eh.

26 N pei samlamdung au

ndaa lamlwatudung samlam swa de di

mede ndaa hangdeutudung *ga ma keyibedung swade.

Peu cidung de Joseph peu ga bam lulo,

pe sinamedung reu kedibe peurwa reu ga gade.

27 Benjamin au heneu kenzeube nzwa.

Tingcang pa pe kautui tyei luzie,

nah tinghegi pa süt kelude nzi zie."

28 Aidungde au Israel leuhme kereiekenadung. Aide au penui pei penuide samlam kebeu dau penuide kerang sam. Pa samlam petautube teu penui hangge gede samlam beu.

29 Pecai Jacob penui dage maranglia eh penui dade rangdi, "Ih au a minadung da gwangdi lauda. Acu Hittime pei Ephron luh tsupop ga a paumedung de kekung gage kung lulo,✝ 30 Machpelah luh ga tsupop kebam gage, cide au Canaanme deu ga Mamre taiga, Abraham luh cide Hittime pei Ephron dade heraukie tei kerane luilu. 31 Cika ge penui Abraham nah pe nau Sarah de kungdi; cika ge penui Isaac nah pe nau Rebekah de kungdi nah cika ge Ih Leah de kungdi. 32 Luh nah tsupop cika kebam de Heth name dade luilu." 33 Jacob ma aidung de pe namedung dage ranglia cangdi ge, pa zeu ga zeu dai lu, delwe tsaidi nah pe leuhmedung da gwangdi.✝