1 Cinzwadi eh cipau ting dau Judah pe sinapeidung de pütdi nah Adullamitme ge de ngngwa bamdi, pe zi caige Hirah. 2 Pa cika Canaanme pei pe zi Shua lie kecube napui de redaulu. Pa pecu luulu delwe pecu ngngwa zeu di. 3 Pa tetlaklu nah mipeina ge lungh lu. Pezi Er msiaklu. 4 Pa tetlak dailu nah mipeina lunglu. Pa pezi Onan msiaklu. 5 Pa mipeina ge lungh dailu nah pezi Shelah msiaklu. Kezib gade pa pecu mnalu 6 Mmi kiee ge cai Judah pe neraibe Er ziemne penau pei beu. Nah pe zi cai Tamar. 7 Er, Judah neraibe, RAMPAUBE dwa gade pezai sia. RAMPAUBE pecu teitsetdi. 8 Judah Onan dage rang eh, "Mie n sinabe nau de ngngwa zeu lu. Pe dage pe nahpei sinabe kecu ta nsam be tei gailo, nah n swacingbe ziemne hena lungbeulu." 9 Nah Onan hena cide pegu kelak ci. Pa pe swacingbe nau de ngngwa henau hepei zai ketei ramsangne, pa hangdeu gage henatsi leuh tei tangra gi dila, ciude pe swacingbe ziemne pa hena lungbeu melu kerane. 10 Pa tei kegaide au RAMPAUBE dwa gade kesia ge. RAMPAUBE pecu de teitsetdi. 11 Pecai Judah pena nau, Tamar dage rang eh, "N pei kiga gwang hemipui teibam lulo, a napei Shelah, ngking cu kemaktane." Kedanemene pa hing di, "Pe swacingbe kena nzwa, pa de tsai di kera." Cine Tamar tetdi nah pe pei ki ga lungdi.

12 Peting tie kedicai, Shua napui, Judah nau tsaidi. Judah helung ncieplu nah Timnah ga pe meurün mai bietkebamme da hang, pa nah pe zangpei Hirah, Adullamitme. 13 Tamar dage rangbeu, "Pielo, n nahpei pei Timnah ga mie pe meurün mai biet lai zeu." 14 Pa pe hemipui paini de lwakdi nah pecu pe pai le gumlu delwe pecu kezuilu. Enaim kirie ga pa ntum bam, Timnah ga kemie lampui de ga. Kedanemene pa ngau da Shelah cu au rehang dida dede pecu peu penau tei kera ha beu mene bam la. 15 Cidau Judah pecu ngau lu eh pa cetdi pecu helipui ge lie kedanemene pa pezu gum kedine. 16 Pa lampui kung ga peda mie nah rangdi, "Gwang lu, ngau nggia acu peu ncu ngngwa zeulo," kedanemene pa au pe na nau lie kecu ci kemakne, nah pa rangdi, "Nang acu dai peu lai ciu eh nang acu ngngwa zeulu kerane?" 17 Pa rangdi, "Ih ncu hekaune hau gade hemeuna ge langgai beuzie." Pa rangdi, "Nang cide langgai kemak dwa cide nding gade nang acu mage peu cai?" 18 Pa rang eh, "Dai pe nding gade Ih ncu peu lai?" Pa keligai, "Ngu kaugiak nah cide kekangria, nah n ba ga kela tuitie de." Pa cidung de pecu peudi nah pa pecu ngngwa nauhepei zai teidi, nah pa pe na tetlakdi. 19 Pa cuhlu delwe tetdi. Pa pe pai keugidi nah pe hemipui pai ni kai lu. 20 Judah pe zangbe Adullame pei da hemeuna langgai ciu eh mipui be ba gade pe guniadung de pa ngau dailu kerane, dede pa pecu ngau lu tadi. 21 Pecai Adullamitme pei mina cipau bam ga kebam de keteu, "Recaki helipui Enaim lampui kung ga kebam de daiga lano?" Penui rangdi, "Aika madaude recaki helipui bam lama." 22 Pa Judah da cailigwang nah rangdi, "Ih pecu ngau lu ma. Nah, cika minadung kebamme rangdi, ‘Aika madaude recaki helipui bam lama.’" 23 Judah rang eh, "Peu pecu maniadung keulu, ciu eh anui de hengam tei melu kerane. Kesang, Ih hemeuna aide langgai, dede nang pecu ngaulu ma."

24 Cinzwadi eh matie mene keicum cai Judah dage rang beu, "Tamar n napei nau helipui ge nzwa heli li dida, nah kesang pa au cide ziemne tetlak dida." Judah rangdi, "Pecu aika ngngwa pet lwe ru tset di lu." 25 Pecu ngngwa pet luge, pa pe nahpei pei dage sam lang gai, "Aipau mania mpaube pei ne acu tei tetlak dida." Pa rang eh, "Aidung cau gu bi ngau ngngia pie lulo, kaugiak nah pe kangria nah hetui tie." 26 Judah cidung de cilu nah rang eh, "Pa au a swade petau gwalie, kedanemene Ih pecu a napei Shelah nau tei kera pwa peu kemak ne." Pa madaude pecu ngngwa zeu si tadi. 27 Cidau pa mna kera ting gwang cang di ge, ainie, nedui peza ga bam. 28 Cipau ting dau pa mna kebam dau hangge peba ketwa mpet, nah kelamluibe pui helangria kegie ge keulu nah cide pe ba gage kanggai nah rangdi, "Aide de mna mpet rai luda." 29 Iciu de pa peba keu caili nlüt daidi, nah, ainie, pe sinabe de mna rai lu. Kelamluibe pui rang, "Nang dainzwa mpet luno!" Cine pezi Perez msiaklu. 30 Pecai pe sinabe de mna lu, peba gage helangria kegie kang pung kelabe de, nah pezi Zerah msiaklu.