1 Cipau nai tinghegi tinggimgwame kena Sodom ga gwang, Lot Sodom kirie ga ntum kebam dau. Lot penaide ngaulu eh, cuh lwe penaide redau kera mie di, nah keumie pe zu hangdeu tung di. 2 Pa rangdi, "A mpaubo kehereide, Ih nnaide n kilabe ki ga gwang lulo kie lalie, nnai pi hui lu, nah tingmui bam lu. Pecai tingcang nnai cuh zi lubui nah nnai lampui le mie lu." Penai keli eh, "Lak, anai heziu namceu lung ga hegwale zeu zie." 3 Dede pa penai de kecung bidi, cine penai de pecu ngngwa mie pe ki ga gwanglu. Pa tangku cehi kai mene ru beu delwe taktyei keyi mteilu, nah penai cide tyeilu. 4 Dede penai zeu ga gwang kedi dwa, namdi minadung, Sodomme, hecing hena, namdi tu leune gade minadung pelane ki cide twagwalu. 5 Penui Lot de qu lwe pedage ranggai, "Heziu nda gwang kebam mina de daiga bam no? Penaide anui da teu mpet beulo, ciude anui penai da kemmha ta tei lu kerane." 6 Cine Lot kikam gwale de penui da pet delwe pecai pekatei kikam ngkuidi. 7 Pa rangdi, "A zangmedung, Ih nnui da a nggia kie la, kenlien ai kenzwa ta teiso. 8 Ainie, Ih relie kemci a napui hangna bam reu. Ih a nggia kiela, peu acu penaide nnui da ngngwa gwang beulo, nah nnui suibe penai dage teikeneube teigai lulo. Dede aipau pei kena dage magede teigai so, kedanemene penai a ki siu ga gwang bam di de lu." 9 Penai rangdi, "Caisim dilu!" Penui rang si di, "Nang sangme tei eh aika lung kera gwang, dede pa cu anui gu tu tiak pei tei! Cu anui penai de swade ndade siaki kecu tei gaizie." Penui minabe de nia ketang, Lot de nia ketang nah kikam de teipang di kera tei cudi. 10 Dede tinggimgwame kena penai ba ketwa pet Lot de penai taigai kilung ga ngngwa nlütlu delwe kikam be ngkuidi. 11 Lot giame kena ne hecing hena heki kikam gwale kebam mina pelane miak tei citdi, iciu eh penui kikam peei la cudau, penui leu sütdi.

12 Pecai tinggimgwame kena Lot dage ranggai, "Nang aika mi keheibe de bam ni? N napui nahpeime, n napeidung nah n napuidung mede namdi ga n kibaume keheibe de bam cai, penui de aika de peu mpet dilu. 13 Kedanemene anai heni aide ngkapdi lai zeu da, kedanemene RAMPAUBE dwa gade aidungde de kemmau sam kekiee siu kedine, pa anuide cide ngkap di lo eh langgai lie." 14 Lot pe napui nahpei kena, pe napui de lu zie lie sampet kebeu kena da gwang marang eh ranggai, "Kelwalu, aika de nzet tet dilu, kedanemene RAMPAUBE namdi de de ngkapdi lai eh bam dida." Dede pe napui nahpei kena de ziemne au pa henui tei kebam nzwadi.✝ 15 Tingcang baareirang ge, tinggimgwame Lot de kecung eh, ranggai, "Tet cu, n nau nah n napui kena aika kebam de de ngngwa lwe mpet lu, iciude namdi de saja kepeu dau nnuide de ngkapdi melu kerane." 16 Dede pa lunghaudi. Cine minabe kena pe ba teulu nah pe nau ba teulu, nah pe napui kena ba teulu, kedanemene RAMPAUBE pecu ngau ngngia kecune. Penui penui de nzang mpetlu, delwe penui de namdi gwale ge peu bamlu.✝ 17 Penai penui de deudi gade ngngwa mpet luge, hangge paube rangdi, "Ringlu kerane pak lu! Nreu gwang pie so, mede hangdeu langkie kehei gade mtak so. Lamlwatudung gage pak gailu, iciude nnuide ngkapdi melu kerane." 18 Lot penai dage rangdi, "Ciu so, kehereide, a kedibo! 19 N kilabe n miak ngau gade n suibe tei luda, nah nang acu n ngaugia kedi keulia eh a teilung kelikebeu da, dede Ih lamlwatudung pak kah gai lak, kedanemene kengkap acu mzu pwa di zie, nah Ih tsai di zie. 20 Pielo, cipau namdi cika kebam de au pak mielu kera mna bam, nah cide au namdi keceu nege. Kehereide acu peu cika ge pak gaidi lulo (cide au namceu nage meluini?), nah a teilung kwak lu zie." 21 Pa pe dage rang eh, "Petauda, nang nggia kie kegaide Ih tei beuzie nah nang kerang namdi de Ih ngkapdi lak. 22 Kelwalu! Cika ge pak gailu! Kedanemene nang cika gwang canglu kemaktane Ih magede tei gailak." Cine namdi cide de Zoar qulu.

23 Lot Zoar gwang canglu ge tingnaimiak kideu reu ga cudi. 24 Cidau RAMPAUBE Sodom penai Gomorrah reu gage heu kebam sulfur rui ngkei gai nah Tinggim gade RAMPAUBE dade miheu ruigai.✝ 25 Pa namdi cidung de, langkie pelane, nah keringria kebam namdi leune nah tsing ceheibwa hangdeu ga lungh kebam leune tei ngkap di. 26 Dede Lot nau, pecai ga bam cudau, caili gwang nreu pie gai, nah pa mcai cia mmidi.

27 Abraham tingcang nuge cu lu delwe, pa RAMPAUBE dwa ga kesap ni de ga mielu. 28 Pa Sodom penai Gomorrah nah kideu langkie pelane ga pie ngkei gai. Pa piegai nah ainie pa pie kebam dau, hangdeu gade mika, miheukedi mika ge nzwa eh cu kecu ngau.

29 Cine Tinggwang langkie ga kebam namdidung ngkapdi cu dau, Tinggwang Abraham de nsung lu. Pa Lot kelungh namdidung kengkap dau, pa Lot de kengkapdung kak gade lang mpetdi.

30 Dede Lot pe napui kenade nzang lwe Zoar gade tet pwa lamlwatu lebie lung kera tet cu lu, kedanemene pa au Zoar ga lung bam hing kecune. Cine pa tsupop ga lunghdi, pa nah pe napui kenade. 31 Pe neraibepui pe caihereibe pui dage rangdi, "Anai pei cing dida, nah kideu ga mipei gede anai de kideube zai gade ngngwa zeu beu kera gada. 32 Gwanglu, anai pei de peu sakmielu delwe anai pecu ngngwa zeu go, ciu eh anai anai pei leuh peu lunghlu kerane." 33 Cine penai cipau ziu de penai pei de peu zau sak lu. Ge kecingbe pui lütlu delwe pe pei de ngngwa zeudi; pa pe napui daidau zeu mie bi, mede daidau pa cu dai dibi kecu cima. 34 Pecai benai neraibepui pe caihereibe pui dage rangdi, "Kingnei lu, Ih aika nzie ziu a pei de ngngwa zeuda. Anai heziu de pecu peu zau sak kera kaibeu rie go, ciu eh nang lütlu delwe pecu ngngwa zeu lu maisia, Ciu eh anai anai pei na lunghlu kerane." 35 Cine cipau ziu penai pecu peu sakmie dailu, delwe henabe pui pecu ngngwa mhadi. Pa sakmie ham kedine daidau pa zeu nah cuh bi kecu de cima. 36 Cine Lot napui hangnana penai pei na tetlak ladi. 37 Kecingbe pui mipeina ge mnalu nah pezi Moab msiak lu. Pa henai kecang de Moabme paube da. 38 Henabe pui de au mipeina ge mna lu, pa pezi Ben-Ammi msiaklu. Pa cu Ammonme pau be da henai kecang.