1 Minabe pe nau Eve de ngngwa nau hepei zai teidi nah pa tetlaklu delwe Cain de mna lu. Pa rangdi, "Ih RAMPAUBE ngha gade mipeina ge de lung luda." 2 Pecai Eve Abel sinabe de mna lu. Abel meurün kekwame ge teidi, dede Cain au heta ketame ge. 3 Cinzwadi eh matie mene Cain pe luhlüt mei kesa pung gwang RAMPAUBE de reca teibeu.✝ 4 Nah Abel cai, pe meurün ga de mciu kelu raitube nah pelui keyibe kesa pa teu gwang. RAMPAUBE Abel nah pe ratak de luulu,✝ 5 Dede pa Cain gu reca luulu tadi. Cine Cain pe rata sütti, nah pezu mneudi. 6 RAMPAUBE Cain dage rangdi, "Daitei nang n rata au no nah daitei nang n zu mneu bam no? 7 Nang petau be tei la cai, ncu luu mene ta zie ni? Dede nang magade petaube tei mecai, kemau n kimui ga kwabam nah n reu di neu zeu, dede nang cide swa ngkieng lu maisia." 8 Langnai ge Cain pe sinabe Abel de mpau. Nah cidau penai luhdung ga kela dau, Cain pe sinabe Abel de pe ratadi eh pecu teitsetdi. *

9 Ciciu eh RAMPAUBE Cain de keteu, "Daiga n sinabe Abel la no?" Pa rangdi, "Ih ci ma Ih a sinabe de kekwabe ni?" 10 RAMPAUBE rangdi, "Nang daitei di dino? N sinabe jai hangdeu gade a dage mra gai bam dida.✝ 11 Cu nang reset pung dida hangdeu gade, cide n ba gade n sinabe jai luulu kerane pe mui ngnga luda. 12 Nang hangdeu ga heta tei kegai dau, cu gade n ziemne magede lungcu beulak. Nang kideu ga n ki gah eh rwapwa kelame gedi zie da." 13 Cain RAMPAUBE dage rangdi, "A ziemne saja au Ih pung kebui swade hung dida. 14 Kesang, nang aipau hangdeu gade henai acu gwagi di zeu, nah Ih n zu gade acu kebai di zieda. Ih kideu ga a ki gah eh rwapwa kelame ge dizie da, nah acu kengaume keheibe de acu teitset dizie da." 15 RAMPAUBE pe dage rangdi, "Keheibe de Cain de teitset cai, cipau de de pia hena kiee ge hekum peei zie." Pecai RAMPAUBE Cain reu ga ge hegiak ge kaidi, ciciu de mi keheibe de pecu ngaulu lie de, cipau de pecu gwaketang melu kerane.

16 Cine Cain au RAMPAUBE kebam gade tetdi delwe Nod deu ga lunghdi, cide naimiak kepetle Eden ga. 17 Cain pe nau de cilu nah pa tetlak lu. Pa Enoch de mnalu. Pecai pa namdi ge teilu nah cide pe napei Enoch zi teu qulu. 18 Enoch pena Irad lung lu. Mehujael au Irad pei. Irad au Mehujael pei. Methushael au Lamech pei. 19 Lamech pe nau nauna teilu. Nau ge zi Adah, nah keda nau zi Zillah. 20 Adah Jabal de mnalu. Pa hekaune gui kelame nah paiki ga lung kelame pau teilu. 21 Pe sinabe pei zi Jubal. Pa lei keteime nah leibung nah nrina kwa kelame pelane pau. 22 Zillah ne, pa Tubal-Cain de mnalu, cipau de hetageu nah hegeu teu maleune teila Tubal-Cain sinabe pui zi cai Naamah. 23 Lamech penau kena da rangdi,

"Adah nah Zillah, a kwa kingnei lulo, nnai Lamech nau kena, Ih kerang de kingnei lulo.

Kedanemene acu tei rejam kedine Ih mina ge de teitset dida, rehangme ge de acu tei rejam kedine.

24 Cain kum pia hena peei cai, ciucai Lamech kum au pia riakhena-hena peei zie."

25 Adam pe nau de ngngwa nau hepei zai tei dailu, nah pa mipeina kedage mna lu. Pa pe zi Seth qulu, "RAMPAUBE acu Abel keleu gade mipeina kedage ha da, kedanemene Cain ne pecu teitset kedine."✝ 26 Seth pe na mipeina ge lungh lu nah pa pe zi Enosh qulu. Nah cipau tingdau minadung RAMPAUBE zi qu cudi.