1 Jacob ngang cuh piegai eh, ainie, Esau mina hai mdai de nzang eh gwangla. Jacob hename de Leah, Rachel, nah kilamepui kena kakga mzilu. 2 Pecai pa kaibeu kilamepui kena nah penai name de kerai gage, pecia be Leah nah pe name, nah pecia be Rachel nah Joseph kamtu gage. 3 Pa pekatei penui dwa rai gwang. Pa pe swacingbe de nna gwanglu kemaktane, pa hangdeu ga pia hena keumie. 4 Esau pecu redau kera pak gwang, pecu tuilu, pe ngwang tuilu delwe kemam gai. Ciu eh penai hapdi. 5 Esau ngang cuh pie kegaidau, pa mipuidung nah hename de ngaulu. Pa rangdi, "Ncu ngngwa keladung de caudung no?" Jacob keligai, "Tinggwang pe zaiyi eh n kilabe de kepeu hename lie." 6 Pecai kilamepuidung penui name de ngngwa gwang, nah penui keumie. 7 Pecai Leah nah pe name gwang eh keumie. Kamtu be Joseph penai Rachel gwang eh keumie. 8 Esau rangdi, "Ih keredau kecu maa aidung leune pekie dai no?" Jacob rangdi, "Ih a mpaupei dwade pe suiyi tei lu kerane." 9 Esau rangdi, "Ih bam süt, a caihereibo. Nang kebam be nziemne kaizeu lulo." 10 Jacob rangdi, "Lak, kehereide, magade Ih n dwa de n suiyi tei lu ni, ciucai a ba gade a mapeu de luulu lo, kedanemene, Ih n zu ngauda, nah cide au Tinggwang zu kengau nzwa da, nah nang acu nsuilu da. 11 Kehereide a mapeu nda teugwang kebeu de luulu, kedanemene Tinggwang adade pe zaiyi eh, nah kedanemene Ih teu mai kesia leune bam." Ciu eh Jacob pecu peu bi di nah Esau cide luulu. 12 Pecai Esau rangdi, "Anui tet kera mteilu cu go. Ih nnui cai suilu zie." 13 Jacob pe dage rangdi, "A mpaupei hename mnei kecu cibam, nah meurün nah hetum penui nadung de peu tung kebam de. Penui de tingnai ge gage gwa mteigai cai, makaune pelane tsai di zie. 14 Kehereide a mpaube de peu pe kilame dwa nswa mie lo. Ih tei sünne eh tet gwang zie, hekaune a dwa kela de nzang eh, nah hename de nzang eh, Seir ga a mpaube da Ih gwang canglu kemaktane." 15 Esau rang eh, "Peu a mina kang ge acu ngngwa kelame n dage kaidiak lo." Dede Jacob keli eh, "Daitei cide tei lai? Peu acu a mpaube dwade pesuiyi teilo." 16 Cine cipau nai Esau au Seir ga cailigwang kera pa tetcuh gai. 17 Dede Jacob Succoth ga mbeu mie, pekatei ki ge teilu, nah pe kaunedung ziemne kemtak ki teilu. Ciziemne heni zi de Succoth lie qudi.

18 Jacob Paddan Aram gade gwang keladau, pa Canaan deu ga kebam, Shechem namdi ga kwak eh gwanglu. Pa namdi taiga ramzeuki teilu. 19 Pecai pa hangdeu keceuna ge rangkanggeu haige le lui lu, Shechem pei, Hamor napeidung dade, cikage pa pe ramzeuki tei lu.** 20 Pa cika ge recabam ge teilu nah cide EI Elohe Israel msiaklu.