1 Abram mmi riakhekuiehekui di ge, RAMPAUBE pecu peu ngau gai nah pe dade rangdi, "Ih au Kengkieng Tinggwang. Adwa ga tet lu, nah kemzuibe teilu. 2 Ciucai Ih anai kakga a samkak kaizeulu zie nah ncu n leuhme kieesüt kecu pwa peu zie." 3 Abram keu hena mie pe zu hangdeu tunglu eh, Tinggwang pecu mpau eh, ranggai, 4 "A ziemne au, ainie, a samkak de n da la. Nang heleuh kekiee ge pei tei zie. 5 N zi Abram si lakta, dede Abraham dizie da, kedanemene Ih ncu heleuh kekiee ge pei tei kera kedetlu delu. 6 Ih ncu n leuhme kekiee pwa peu zie, nah Ih ncu peu heleuhmedung teizie, nah n leuh gade hegwangme lungh gwang zie. 7 Ih anai kakga nah n cai n leuhme dage, nah penui ceheudung leune ga bam mui kela samkak kelu a samkak de kaipwa la zie, n Tinggwang kera nah n cai n leuhmedung lungh gwang kerame Tinggwang kera. 8 Nang lungh kebam deu de Ih ncu nah n cai n leuhme lungh gwang kerame de peu zie, Canaan deu pelane de kelungta nnui gu tei kera, nah Ih penui Tinggwang zie."

9 Pecai Tinggwang Abraham dade rangdi, "N ziemne au, nang ada samkakkelu de mzai bilu maisia, nang de nah n cai n leuhme lungh gwang dai kera penui ceheudung leune de. 10 Aide agu samkak kelu, nang mzai bilu maisia, anai kakga nah n cai n leuhme lungh gwang kera kakga: Mipeina keheibe de nnui kakga hegeurum bilu maisia. 11 Nang n pumteih geutün ga hegeurum lu maisia, nah aide anai kakga samkakkelu zasi de keulia la luzie. 12 Nnui kakga mipeina keheibe de de pa lang heset ne dide hegeurum bi lu maisia, n minadung ceheudung leune ga. Aide n kilung gade mna kelube nah sangme keheibe dade nnui leuhme kemakme gede rangkang le luilu kelube de de si zie. 13 N kilung gade mna kelu keheibe de nah n rangkang le lui kelu keheibe de hegeurum bi maisia. Ciu eh a samkakkelu de n teih ga kelungta samkakkelu ge zie. 14 Hegeurum kemak mipeina keheibe de pe geutün de gade hegeurum kemakbe de pe mina kakgade peu keugi di zie.* Pa acu samkak de kaizeu kemakne."

15 Tinggwang Abraham dage rangdi, "Dede n nau Sarai de, Sarai lie qu si tadi lu. Meliene, pe zi Sarah dizie. 16 Ih pecu samlam beu zie, nah Ih pe dade de ncu mipeina ge peu zie. Ih pecu samlam beuzie, nah pa heleuhdung pui tei zie. Peda de mina hegwangdung lungh cu zie." 17 Pecai Abraham keumie pe zu hangdeu tung lu eh nuidi, nah pe lung gade rangdi, "Mige mmi hai kedi ge da hena ge de lungh lubui ni? Dainzwa Sarah, pa mmi riakhekui kedi caine pe na lungh lu lai no?" 18 Abraham Tinggwang dade rangdi, "Oh Ishmael de peu n dwa ga lunghlu lie cai!" 19 Tinggwang rangdi, "Lak, dede n nau Sarah ncu mipeina ge mnabeu zie, nah nang pe zi Isaac msiak maisia. Ih pe dage a samkakkelu kaipwa lazie pe cai pe leuhme de kelungta samkakkelu ge eh.✝ 20 Ishmael ziemne au, nang kekie de Ih siu da. Ainie, Ih pecu samlam beu dida nah pe leuhme kekiee tei beu zie nah pe leuhme kieesüt zie. Pa au hegwangna kereiekena pei zie, nah Ih pecu peu heleuh kedi ge teibeu zie. 21 Dede Ih Isaac de ngngwa a samkakkelu de kaizeu zie, pecu Sarah ne ngkikum aipau hi dau ncu mna beu zie."

22 Pa pe dage marang cangdi ge, Tinggwang Abraham de gidi eh tetdi. 23 Pecai Abraham pe napei Ishmael de ngngwalu, nah pe kilung gade lungh kelumedung pelane de, nah pa rangkang le lui kelumedung pelane de, Abraham kilungme kakga de mipeina keheibe de, delwe cipau nai de gage penui teih geutün hegeurum kecu teilu, Tinggwang pecu rang kebeu nzwa. 24 Abraham pe teih ga geutün hegeurum kelu dau pa au mmi riakhekui-hekui di. 25 Pe napei Ishmael mmi kereiekecum di pa pe teih ga geutün hegeurum kelu dau. 26 Abraham nah pe napei Ishmael cipaunai gage hangna na hegeurum lu. 27 Pe kilung ga kebam mipei pelane pecu nzang eh hegeurum lu, kilung gade lungh kelume nah sangme ge dade rangkang le luikeludung de si eh.