1 Cu heneibe RAMPAUBE Tinggwang hangdeu ga makaune tei kegaidung kak de mriak tube. Pa mipui de dade rangdi, "Tinggwang rang kesang deni: ‘Ncu hegurie ga tsingbang keheibe tsi de tyei helo’?" 2 Mipuibe henei dade rangdi, "Anai hegurie ga tsingbangdung tsi de tyei lubui, 3 dede hegurie sum ga kebam tsingbang tsi de ziemne, Tinggwang rangdi, ‘Nnai cide tyei so, mede nnai cide tung de so, mecai nnai tsai zie.’" 4 Henei mipui da rangdi, "Nang tsaidi lak. 5 Kedanemene Tinggwang ci bam nnai cide tyei kelu benai gade nnai miak nraklu zie, nah nnai Tinggwang nzwa dizie, keyi kesia ci eh." 6 Mipuibe tsingbang cide ketyeipok ziemne yi kecu, nah cide ngau hezu keyi, nah tsingbang cide mide maci peu kela ngau luge, pa matsi kesa keulu delwe cide tyeilu. Pecai pa pe nahpei pecu ngngwa kebam de de kesa peu gai, nah pa cide tyeilu.✝ 7 Penai hangna na miak nrak lu, nah penai paula kebam penai cilu. Penai nzüt neidung herui ncütlu delwe penai katei ziemne cum kerabedung teilu. 8 RAMPAUBE Tinggwang tinghegi kengkung tingdau ge hegurie ga tetkela kwa penai siulu, cine minabe nah pe nau RAMPAUBE Tinggwang dwa gade hegurie tsingbangdung kakga penai mbaidi.

9 RAMPAUBE Tinggwang minabe de qugai eh pe dade rangdi, "Nang daiga lano?" 10 Minabe rangdi, "Ih hegurie ga n kwa siulu, nah Ih au ngngi di, kedanemene Ih paula kebam ne. Cine Ih mbaidi." 11 Tinggwang rangdi, "Caune nang paula kebam ncu ranglia no? Ih ncu tyei helo rang kebeu tsingbang de gade nang tyei di dini?" 12 Minabe rangdi, "Nang acu ngngwala kera kepeu mipui de ne, tsingbang de gade matsi pa acu peu, nah Ih cide tyei dida." 13 RAMPAUBE Tinggwang mipuibe de keteu eh, "Nang daitei aiciu dino?" Mipuibe rangdi, "Henei ne acu cwa di eh Ih cide tyei dida."

14 RAMPAUBE Tinggwang henei dage rangdi,

"Nang aide tei kedi* ziemne,

kauruine pelane kak de nang rünne reset pung zie

nah hangdeu ga renaam kaune pelane kak de.

N za le lia eh nang tet zie,

nah n teilung pelane nang tangdei tyei zie.

15 Ih peu mipui nnai kakga kengaurau bam zie

nah pe name nah n name kakga.

Pa ne n peu tei pang zie, nah nang pe pideu nsau zie"

16 Pa mipui dage rangdi,

"Nang hena mna kecu dau Ih n rei tei ngkiee beuzie;

ciu eh nang keherei eh hena mna luzie.

Nang n nahpei de hengim lazie, dede pa n reu di zie."

17 Pa Adam dage rangdi,

"Kedanemene nang n nau kwa kingnei kedine,

nah Ih ncu tyei helo de rang kebeu tsingbang gade tyei dida,

de ranggai, ‘cide gade nang tyei so,’

n ta aide ziemne hangdeu be reset pung dizie da;

N teilung pelane gade nang keherei eh n pok peei tyei zie.✝

18 Nah hangdeube n ziemne ceheidung nah hetudung lungh pet beu zie,

nah nang renaamkang ga mabangdung tyei zie.

19 N zu nlup duile nang npuk peei tyei zie,

ncu tei kelu hangdeu be ga nang cailigwang dai kemaktane, kedanemene ncu cika de tei kelune.

Kedanemene tangdeile ncu teilu, nah nang tangdei mmi dai dizie."

20 Minabe pe nau zi Eve msiak lu, kedanemene pa mina pelane pui kecu ziemne. 21 RAMPAUBE Tinggwang Adam penai pe nau de makaune geu pwa paiheni teilwe penai de cum beu.

22 RAMPAUBE Tinggwang rangdi, "Minabe cu au anui hangge nzwa dida, keyi kesia maci bam dida. Cine cu pecu peu pe ba ketwa pet eh, ring kela tsingbang gade keu eh, cide tyei lakta, nah kelungta ring lakta." 23 Ciziemne RAMPAUBE Tinggwang pecu Eden gurie gade gwa mpetdi, pecu peu ndei pecu tei kelube hangdeu gade tatyei kerane. 24 Cine Tinggwang minabe de hegurie gade gwadi, nah pa Eden gurie naimiak kepetle gage cherubim de kailu, nah kiengtie mzaipei kecu pelane lam nreu gwanglu kebam ge kaizeu di, cinzwa eh kering cailihei bang kwalu kerane.