1 Cu Sarai, Abram nau, hena ge de pecu mnabeu ma, dede pa kilapui bam, Egyptme ge, pezi Hagar lie kecuge.✝ 2 Cine Sarai, Abram dade rangdi, "Pielo, RAMPAUBE acu peu a na lung meda. Cine mie a kilapui de ngngwa zeulu. Iciu de pe a ziemne hename ge mna beu de cilak lu." Abram Sarai kwa kingneilu. 3 Cide au Abram canaan deu ga mmi kerei ge lungh kelu caine, Abram nau Sarai, Egyptme pe kilapui Hagar de pe nahpei nauseupui tei kera peu. 4 Cine Abram Hagar de ngngwa nau heipei zai teilu nah pa tetlakdi. Pa tetlak kedi cilu ge, pa pe mpaube pui de mapei tadi. 5 Pecai Sarai Abram dade rangdi, "Acu mapei ta kedi de n ziemne lie. Ih a kilapui de ncu nauseupui tei kera pwa peu nah pa tetlak kedi cilu ge, pa acu mapei ta dida. Peu RAMPAUBE de anai kakga tiak lulo caube petaubi kecu." 6 Dede Abram Sarai dade rangdi, "Aika pielo, n kilapui n kang lungh bam, nang cet lwe petau tube peda teigai lulo." Cine Sarai Hagar dade pezai sia süt gai, nah pa pe dade pakdi.

7 RAMPAUBE gwame ge hetaideu ga duireu gade pecu ngaulu, Shur lampui ga duireu kebam de gade. 8 Pa rangdi, "Hagar, Sarai kilapui, nang daiga de gwang lano nah nang daiga mie lai eh la no?" Ge pa rangdi, "Ih au a mpau pui Sarai dade pakla lie." 9 RAMPAUBE gwame pe dade rangdi, "N mpau pui da cailigwang cu, delwe pe kang ga lunghlu." 10 Pecai RAMPAUBE gwame pe dade rangdi, "Ih n leuhme kekiee ge peu zie, iciu eh penui kieezu eh pei kap gailak di zie." 11 RAMPAUBE gwabe pe dade rang si gai,

"Ainie, nang au tetlakla nah mipeina ge de mnalu zie,

nah nang pe zi Ishmael msiak luzie,

kedanemene RAMPAUBE n rei siulu delu.

12 Pa gada kekuube mina nzwa zie,

pa mi keheibe de de ngaurau zie,

nah mina leune pecu ngaurau zie,

nah pa pe sinamedung pelane dade lung tsam zie." 13 Iciu eh Hagar RAMPAUBE pecu kempaube de aipau zi de peugai, "Nang au acu ngau kela Tinggwang," Kedanemene pa rangdi, "Ih ngau bam reu ni, Pa acu ngau kelu caide?" 14 Ciziemne tekwa de Beer Lahai Roi lie qudi; ainie, cide Kadesh penai Bered kakga bam.

15 Hagar Abram napei de mnalu nah Abram pe napei, Hagar ne mna kebeube de Ishmael lie qulu. 16 Hagar Ishmael de mna kelu dau, Abram mmi riakheset-herok di.