1 Isaac Jacob de qulu, delwe pecu samlam beu, nah pecu ajah kaibeu, "Nang Canaanme pui de nau kera luu helo. 2 Cuhlu, Paddan Aram, ga n pui pei Bethuel ki ga miecu, delwe cikade n nau releime hang ge de luulu, n pui sinabe Laban napui hang ge de. 3 Kengkieng Tinggwang de peu ncu samlam beulu, delwe n name kekiee ge peulu, iciu eh nang heleuh kekiee ge pei teilu kerane. 4 Pecu peu Abraham samlam de ncu pwa peu kelube tei lulo, nda, nah n cai n leuhme gwang dai kerame da, iciu eh nang lungh kebam deu de gumlu kerane, Tinggwang Abraham de pwa kepeu de." 5 Cine Isaac au Jacob de lang gaidi. Jacob Paddan Aram ga Arameanme Bethuel napei Laban, Jacob penai Esau pui Rebekah heibe da miedi.

6 Cu Isaac Jacob de samlambeu eh cika de pe nau pei kera lang pwa Paddan Aram gage langgai kedi Esau ngaulu. Pa Isaac pecu samlam kebeu ngaulu nah pecu ajah peu eh, ranggai, "Nang Canaanme pui kak de nnau luu helo." 7 Esau Jacob pe pei penai pe pui sam mzai kecu nah Paddan Aram ga mie kedi ngaulu. 8 Esau Canaanme pui pe pei Isaac suiyi teilu kemak ngaulu. 9 Cine pa Ishmael da mie delwe, pa pe naudung kebam de cai, Abraham napei, Ishmael napui Mahalath, Nebaioth tipui de pe nau kera luulu.

10 Jacob Beersheba pütdi nah Haran lam gwangdi. 11 Pa heni gega gwanglu nah cika tingmui pelane bamdi, kedanemene tingnaimiak nlüt kedine. Pa cipau heni de gade tangtsu ket keulu delwe pe peu kangga kailu, nah zip kerane cipau heni dega zeu mielu. 12 Pa pemang lam de takswa ge kideu gage tei pwa kebam ngaulu. Petün tinggim hang tung canglu delwe Tinggwang gwame cipau reuga nghang nghung bam. 13 Ainie, RAMPAUBE cipau reu ga saplu eh rangdi, "Ih au RAMPAUBE, n pei Abraham Tinggwang nah Isaac Tinggwang. Nang zeu kebam deu de, Ih ncu nah n leuhme de peu zie. 14 N leuhme kie pwa kideu ga rebui nzwa zie, nah nang tingnaimiak kenlütle, tingnaimiak kepetle, tingtünle, nah tingbangle lam de teimdi luzie. N dade nah n leuhme dade kideu heleuh pelane de samlambeu zie. 15 Ainie, Ih ncu ngngwala zie, nah nang kegwang leune ga Ih ncu gum zie. Ih aipau deu gage ncu ngngwa cailigwang dai beuzie; kedanemene Ih ncu pütdi laklu. Ih n dage a sam pet kebeudung Ih pelane teibeu zie."✝ 16 Jacob pa zip kebam gade mraklu, delwe pa rang eh, "RAMPAUBE au heni aika bam kesang, nah Ih cide cilu ma." 17 Pa ngngi di eh rangdi, "Aipau heni de daikenzwa gede mi hingno! Cide Tinggwang ki au zie da. Cide tinggim kegwang rieki da."

18 Jacob tingcang nuge cuhlu nah tangtsu pa ngkum kelude keulu. Pa cide tsusum ge sumlu delwe pa maca cipau reu gage ruigai. 19 Pa cipau heni zi de Bethel qulu, dede cipau namdi zi de nda Luz lie la. 20 Jacob sampet gai eh, ranggai, "Tinggwang a beu ma aide ga acu ngngwala lie cai nah Ih tet kegwang ga acu gumbeu nah acu tangku tyei kera nah pai kai kera peu zie cai, 21 Ih a pei kiga kwak eh cailigwanglu cai, iciu cai RAMPAUBE de a Tinggwang teizie. 22 Pecai tangtsu aide Ih sum kelude pwa ncu kerecani tei zie. Nang acu pwa kebeu keheibe gade de, Ih zikerei zige ncu peu dai bi zie."