1 Ma aidungde cai RAMPAUBE sam Abram da marengei ge gade gwang eh ranggai, "Ngngi so, Abram! Ih au ncu kegumbe nah n ziehi au disüt samzai ketei ziemne" 2 Abram rangdi, "RAMPAUBE Tinggwang, nang daipai pwa acu peu laino, kedanemene Ih a na gah eh bamdi delu, nah a ki mabam kegumbe au Damascusme Eliezer.?" 3 Abram rangdi, "Nang acu a leuh ge de peu kemakne, pielo, a ki gade lungh kelu hange ne a mapwa teizie." 4 Cidau, ainie! RAMPAUBE sam pe da gwanglu eh ranggai, "Aipau peide n maa kegumbe lak lie; dede nkatei n pum gade gwang lai eh kebambe ne n mapwa tei zie." 5 Pecai pa pecu hegwale ngngwa mpetlu, delwe pe dade rangdi, "Tinggim lebie pie gailo, nah hegidung de peilo, magade nang cidung de pei lu bui cai." Delwe pa pe dade rangdi, "N leuhme de ci kieege zie."✝ 6 Pa RAMPAUBE de nlumlu, nah aide ziemne pa pecu masang lie eh luulu.✝ 7 Pa pe dade rangdi, "Ih au RAMPAUBE, hangdeu aide ncu pwa peu eh cide gum lu kerane, Chaldeame nam Ur gade ncu ngngwa mpet kelube." 8 Pa rangdi, "Rampaubo RAMPAUBE, Ih dainzwa cilu lai cide Ih gumlu zielie kecu?" 9 Cidau Pa pe dade rangdi, "Acu ketumlei ge mmi kecum, hemeupui ge mmi kecum, nah meurünseu ge mmi kecum cum kecu nah tamhau ge nah ruipuine ge teugwang beulo." 10 Pa aidungde peciakne pecu keu gwang beu, nah pa cidungde dum zina teilu, delwe pempie ket de kedabe pempie de mcwa eh kailu, dede pa nruinedung de mzi ntsam ma. 11 Heraruidung tsai kebam hekaunedung reu ga tyei kera hung kecu dau, Abram cidung de de gwa gidi.

12 Pecai tingnaimiak nlwet kezeu dau, Abram zip zing miedi, nah ainie kengngi nah hingsüt kecu kemui pe lung puidi. 13 Cidau RAMPAUBE Abram dage rangdi, "Ci gapte lulo, n leuhme hangdeu penui deu kemak ga sangme ge tei eh lung zie, nah hebaang tei zie nah mmi hai mdai ge ziemne keherei süt zie. 14 Penui heleuh gwa tei lai eh kebam leuh de de Ih penui tutiak zie, nah cipaucai penui mahei kekiee teu eh mpet zie.✝ 15 Dede nang nlung ziune eh n paume da mie zie, nah nang lungh tie süt kedi caine tsai zie. 16 Ceheu pemdaibe dau ne penui aika gwang dai zie, kedanemene Amoritme penui kesia penli ga hang cangdi mereulu." 17 Tingnaimiak nlütdi nah muidi ge, ainie! Mika lige nah miheu kebaa ge makaune teihdung kak ga tetkah gwang. 18 Cipau nai RAMPAUBE Abram de ngngwa samkak lu eh ranggai, "N leuhme de cine Ih aipau deu de pwa peu la, Egypt reuki Shihor deugumrai gade Euphrate reuki kedi de kecang, 19 Kenitme, Kenizzitme, Kadmonme, 20 Hittime, Perizzitme, Rephaitme, 21 Amoritme, Canaanme, Girgashme nah Jebusiteme."