1 Cinzwa di eh, Shinar gwangpei, Amraphel, Ellasar gwangpei, Arioch, Elam gwangpei, Kedorlaomer, nah Goiim gwangpei, Tidal penui ting dau, 2 Penui Sodom gwangpei, Bera, Gomorrah gwangpei Birsha, Admah gwangpei, Shinab, Zeboyim gwangpei Shemeber, nah Bela (Zoar de de qula) gwangpei de ngngwa hereu tei. 3 Hegwang kekambe mengei aidung de Siddim Langkam (Mcai Jaaidi dede qu kela) gade kemaacüt lu. 4 Penui mmi kereiekena Kedorlaomer gwa teilu, dede mmi kereiekecumbe kum ga penui keregidi. 5 Pecai mmi kereiemdaibe kum Kedorlaomer nah hegwangmedung pecu nzang kelame gwang eh Astheroth Karnaim ga Rephaimme, Ham ga Zuzitme, Shaveh Kiriathaim ga Emitme, 6 nah Horitme de penui hangdeutu deudi Seir gade, cide hetaideu taiga kebam El Paran ga kecang gwaketangdi. 7 Pecai penui nreugwanglu nah En Mishpat (Kadesh lie dede qu kela) ga gwanglu, delwe Amalekitme deudi pelane de ngamlu, nah Amoritme Hazezon-Tamar nam ga lungh kebamme de de si eh.

8 Iciuge Sodom gwangpei, Gomorrah gwangpei, Admah gwangpei, Zeboyim gwangpei nah Bela gwangpei (Zoar de de qu kela) tet petlu delwe Siddim Langkam gade hereu tei kera mteilu 9 Elam gwangpei Kedorlaomer, Goiim gwangpei Tidal, Shinar gwangpei Amraphel, Ellasar gwangpei Arioch penui de regi kera; hegwang mdaidung hegwang mengei de de keregi. 10 Cu Siddim Langkam au kehania hom kecukdung le puihbam, nah Sodom penai Gomorrah gwangpei pak kecu dau penui cika cakmiedi. Kedamedung cai Moab lamlwatudung gage pak gaidi. 11 Cine hegwangmedung Sodom penai Gomorrah gu mabamdung pelane nah penui taktyeidung de keulu, delwe penui lampui ga tet gaidi. 12 Penui kemie dau, penui Abram sinabe napei Lot, Sodom ga lung kebambe dede, pe mabamdung pelane si eh ngngwa teu tetdi.

13 Mige pak kelume ge gwang eh Hebrewme pei Abram dage aipau ha de paubeu. Pa Amoritme pei Mamre gu mhu bang taiga lunghbam, Pa au Eshkol penai Aner sinabe, penui pelane de Abram de ngngwa yi ciau. 14 Cu Abram pe kibaume de ngauraume ne tui pwa kedi siu luge, pa pe mina hereu ketei ciem keci 318, pe ki gade lungh kelume de teuswalu delwe pa penui de Dan nam ga kecang zuimie. 15 Tingmui gage Abram pe minadung de penuide regi kera nzilu delwe penuide gwaketanglu, delwe Hobah nam, cide Damascus tingtünle bie ga kecang penuide zuimie. 16 Pecai pa mabamdung pelane pung cailigwang dailu, nah pe kibaume pei Lot nah pe mabamdung de teugwang dailu, mipuidung nah mina kedadung de si eh.

17 Abram Kedorlaomer nah hegwangme pecu nzang kela me de ngamlu eh cailigwang kelu cai, Sodom ga hegwangpei Shaveh Langkam (hegwangpei langkam dede qula) ga pecu redau kera pet. 18 Salem gwangpei Melchizedek, tangku nah zau teu gwanglu. Pa au Hutube Tinggwang cingkupei. 19 Pa pecu samlam beu eh ranggai,

"Hutube Tinggwang, tinggim nah kideu teikegaibe, ne Abram de samlam kebeube tei lulo!

20 Hutube Tinggwang n ba gage n ngauraume de kaigai kebeube da twa lulo."

Pecai Abram mangau kelube pelane gade zi kereizige pecu peu di.* 21 Sodom gwangpei Abram dade rangdi, "Mabamdung nkatei ziemne kelu nah minadung de acu peu lulo." 22 Abram Sodom gwangpei dade rangdi, "Ih RAMPAUBE, Hutube Tinggwang, tinggim nah kideu Teikegaibe da a ba pwa cuh gaila, 23 ciu eh Ih helangria nage, mede picum ria nage de, mede ngu makeheibe de keu lak, ciu de nang, ‘Ih ne Abram de tei mahei beu’ de madaude rang gailak. 24 Ih rehangme ne tyei kelu de nah minadung acu ngngwa mie kecume mzi de rünne gwale magade lu lak. Peu Aner, Eshkol nah Mamre de penui qwa keulu."