Ezequiel 23

सिनालो कोअनारी बेन बोअह्हीं

1 यहोवाआ ओं वसन माआ जागे पोतो: 2 "ए मोनवीइ पोऱ्या, बेन बोईं ओती, ते बेनू एकीज आयहीइ पोऱ्यी ओती. 3 ते कोवली जुवानीइंज रोत रांडीइ काम कोई वोल्यी; ते मिसर देशोम एहलोहो कोइलोअ टेवाअयी, तियीं माट्योहो तियींइं बुजाहा आथ लागाड़ुहूं देदो आन रांडी बोणीत गोयी. 4 तियीं पोऱ्यीइ एकीइ नाव ओहला आन बिहीरीइ नाव ओहलीबा ओतो. ते बेनू माआ बोणीत गोयी आन बेनुउं बी पोऱ्ये ओवे. तियींइं नावोअ पुरमाणे ओहला शोमरोन होय आन ओहलीबा येरुसालेम होय. 5 ओहला माआ ओती, तेबी ते बिहीराअरी साली वोल्यी, तियीही तियीइ दोस्ती गोमा वोल्या आन तियीइ जागेवाला, ते आश्शूरवाला सेयनिक ओता. 6 ते तोम निल्ले आंगड़े पेवीत गोमे एहेलाहा जुवान ओता, ते आधिकारी आन मुख्या ओता, आन कोड़ापोअ बोहीत ओता. 7 तियांअरीज तियीइ सिनालोअ कामे कोअये जे आखा आश्शूरोअ आधिकारी ओता. ते आखा हाजाम हाजा सेयनिक ओता. तियीही तेज गोम्या. तियांआं मुर्तीही पुंजीत कोइत ते एठी पोड़ीत गोयी. 8 मिसर देशोम रोत जें सिनालोअ कामे टेवाअयी, तें ने सोड़्ये; काहाके हानी तोयोंओंज मिसरवाला माट्यों तियीही आथ लागाड़ी देदू, तियीइ बुजे सापली देदे. तियीइरी सिनालो कोई देदो. 9 तियाहा काजे मी बी तियीही तियां आश्शूरवाला दोस्त्योंअ आथोम पाड़ी देदी जे तियीही गोमताते. 10 तियां तियीही नागरी कोअयी; तियीइ पोऱ्यान-पोऱ्यीही बुउसीत लेदे आन तियीही तारवाइ वाअहीं माइत टाक्यी. एहें कोइत तियीही डोंड जोड़्यू आन बोईंमेहें तियीइ नाव बिगड़ीत गोयो.

11 "तियीइ बोअह्ही ओहलीबा बी ओं देखीत रोडवाअयी आन सिनालो कोई वोल्यी आन ओहोला रोत उनकीत आगाड़ी सोरकीत गोयी. 12 ते तियीइ जागेवाला आश्शूरवालाअरी साली वोल्यीते, जे आखा बाहरी बाहरी आंगड़े पोवित कोड़ापोअ बोहनारा जुवान, आधिकारी आन मुख्या ओता. 13 ताहां मी देख्यो के तेबी एठी पोड़ीत गोयी; तियीं बेनु बोअह्हींइं एक सोभाव सारकुज ओतू.

14 "पोन ओहोलीबा सिनालोअ पापोम जाअखी आगाड़ी वोदीत गोयी. ताहां ते हेंदुरो वाअहीं रोंगीत बोणावल्या खास्द्याआं सित्रे पाल्ये. 15 जे आखान आखा कंबरेमेहें फेटा बांदीत आन मुंडीपोअ सोन्गावाली पागड़ी पोवित रोताहा आन ते आखा तियांआं खास्द्याआं देशोम मोन्ज्ये बाबेलोम रोनाराआं होस देखाअताते. 16 ताहां ते तियांहां देखीत पोटाइत गोयी आन तियी खास्द्याआं देशोम खबऱ्या मोकल्या. 17 ताहराआ बाबेलवाला तियीइ होबाड़ल्या आथरुउ जागे आया, तियीइ इज्जत लुटीत बिगाड़ी देदी , जेहेलाम ते लुटात गोयी तेहेलाम तियांहां तियीइ सीस लागी वोल्यी. 18 तेबी ते आखाआ सामने आंगड़े उतारती आन सिनालो कोअतीज रोयी, ताहां माआ मोन बी तियीइ वोल रोत फिरीत गोयो, माहूं सीस लागी वोल्यी आन जेहें कोइत तियीइ बोअह्हींइं वोल रोत आंय मुउड़ात गोयू तेहेंज कोइत यीइ वोल रोत बी मुउड़ात गोयू. 19 ते बी पेल मिसर देशोम सिनालो कोअतीते तोंज ओर कोइत ओमे बी जाअखो जाअखो कोअती गोयी. 20 आन एहेलां दोस्त्योंअरी तियीइ साल्यो, जियांआं आब्रू गोदड़ाआ होस, आन उमरपाईं कोड़ाआ होस ओतो. 21 एहें कोइत जेहेलाम मिसरवाले माअहें ताआ बुजाहा टिबलीइतेते, तेहलाम ताआ जुवानीमेऱ्याआ महापापोअ ओर कोअयी."

हानीइली बोअह्हींहीं देवोअ डोंड

22 तियाहा काजे ए ओहलीबा, यहोवा देव ताहूं एहें कोहे: "पाल, जियां दोस्त्योंअहें ताआ मोन फिऱ्योहो, आंय तियांहां खिजवाड़ीहीं आन तियांहां ताआ विरुद्दाम शारु सोमकीर उबा कोअहीं. 23 मोन्ज्ये बाबेलवालाहां आन आखा खास्द्याहां, आन पकोद, शोआ आन कोआ वाला माअहोंहों; आन तियांअरी आखा आश्शूरवालाहां लेतावीहीं जे आखान आखा कोड़ाप बोहोनारा गोमता जुवान कुन्बी, आन जुदा-जुदा प्रतिनिधी, आधिकारी आन नावलाअता माटी होय. 24 तें आथ्यारे, गाडे, साकावाले वाहने जुदा-जुदा माअहोंअ टोला लेतावीत ताअरी लोड़ाय कोए आवे; तें ढालेन टोपा पेवीत ताहूं सोमकीर केंडीत लेय; आंय तुमुहूं तियांआं आथोम होपी देहीं, ताहां तियांआं कायदाआ परमाणे तें न्यायनिवाड़ू कोए. 25 आंय तापोअ माआ खोत मेकीहीं, ताहां ताहूं खिजवाय, तें ताआ नाकेन कान वाडीत टाके; जें बाकी रोय तें तारवाइ वाअहीं मोए; तें ताआ पोऱ्यान पोऱ्यीही गुलाम कोइत लेत जाते रोय, आन बाकी रोय तियांहां जिवतेज आगीम पेटाड़ी देय. 26 तें ताआ आंगड़े ओसकीत जाते रोय आन ताआ गोवणो बुउसीत लेत जाते रोय. 27 एहें कोइत ताआ सोगदाय आन रांडाआ कामे जें तु मिसर देसोम रोत टेवाअयीही तें आंय बोंद कोअहीं, ताहां तु तियांहां फिरीत बी ने पालही आन मिसर देसोअ ओर बी ने कोअही."

28 प्रभु यहोवा कोहे, "पाल, जियी गोठीइ ताहूं सीस लागेहे तियाआज आटालाम ताहूं पाड़ीहीं, जियांअरी तु ओसवाअयीही तियांआंज आथोम कोई देहीं; 29 तें ताअरी खिजवाअलेज ताआ आखी कामाय हुलकीत लेत जाते रोय आन ताहूं नागी कोइत सोड़े; इंहीं वाअहीं ताआ सोगदाय आन रांडीइ कामे खुल्ले ओत जाय. 30 तु सिनालो कोइलोअ काजे बिहीरा देसोअ फाट लागी, तियांआं मुर्ती वाअहीं सोताहा विट्लीत गोयी, तिहीं वाअहीं ओं आखो तापोअ आवीत पोड़्यो. 31 तु ताआ बोअह्हींइं होस साल्यी कोत ताहूं बी तोज कोटीवरु आपीहीं."

32 प्रभु यहोवा कोहे,

"ताआ बोअह्हींइं होस वोडान पोला गिलासोम पीहे तेहेलोहो तु पिही,

तियाआ माप वोडो होय तिहीं वाअहीं ताहूं आखे माअहें ओहें.

33 तु नशा वाअहीं आन दुखोवाअहीं साकीत जाही.

तु ताआ बोअह्हीं शोमरोनोअ वाटकाहा,

मोन्ज्ये तुदड़ू आन उजाड़ कोअनाराहा पीत कोइत साकीत जाही.

34 तियाहा तु निखवी निखवीइ पिही,

आन तियाआ खापाहा बी सावीही आन ताआ सातीही दुखाड़ीत लेही;

काहाके आंय ओं कोयोहो, एहें कोइत प्रभु यहोवा कोहे."

35 "तुमे माहूं विहीरावी देदुहू आन ताआ सोब माअहें रोत मुउड़ीत लेदीही, तियाहा काजे तु सोताहाज ताआ महापापोअ वोजू आखलीही, एहें कोइत यहोवा देव कोहे."

बेनू बोअह्हींहीं देवोअ डोंड

36 फाशोअ यहोवा माहूं कोयो, "ए मोनवीइ पोऱ्या, तु ओहला आन ओहलीबाआ न्याय कोअही के? ताहां तियांआं घाण कामे तियांहां देखाड़ी दे. 37 काहाके तियां सिनालो कोअयोहो, आन तियांआं आथोअरी रक्त लागोहो; आन तियां सोताआ मुर्तीइरी सिनालो कोअयो, आन तियींइं पोऱ्याहां तियीं मुर्तीइ आगाड़ी आरवीइलाआ कोअते सोड़वी देदे, जे मावाअहीं उब्ज्येते. 38 तियां फाशोअ माअरी एहेलोहो बी वेवारो कोअयो के तियां तियेज दिही माआ पवित्र जागू एठु कोअयू आन माआ आरामोअ दिही बी बिगाड़्यू. 39 काहाके तियीं तियींइं पोऱ्याहां माइत कोइत ते तियींइं मुर्तीही सोड़व्ये, ताहां तेदिहींज ते माआ पवित्र जागू एठु कोइलाआ कोअते तियाम आवयी; पाला, माआ मंदिरोम तियीं एहेलोहो वेवारो कोअयो.

40 "तियीं सेटेए माट्योहों हादाड़्या, आन ते आवया बी. तियांआं कोअते तु उंगल्यी, आन डोआमेहें काजली लागाड़्यी, गोवणो पेवीत कोइत; 41 तु हाजी बी पोलांगीपोअ बोहीत रोयी; ताआ सामने टेबल मांडीत तियापोअ माआ धुप आन तेल मिक्यो. 42 ताहां तियीइरी मोज्यादान कोअनारा माअहुंउं गोर्दी हासवाअयी, आन तियां सादा माअहुंउरी जंगलोम रोत साकट्ये माअहें बी आयेते; तियां तियीं बेनू बोअह्हींइं आथोम बांगड़्यी पोवाड़्यी, आन तियींइं मुन्कापोअ बाहरी एतुज टोपू पोवाड़्यू. 43 ताहां जे सिनालो कोइ कोईइ डायी ओत गोयीते, तियीइ बाप्तिम आंय कोनु वोल्यू, ओमे ते तें तियाअरीज सिनालो कोए. 44 काहाके ते तियीइ जागे एहेलाहा गोया जेहेलेहे माअहें रांडीइ जागे जातेहे. तेहेंज कोइत ते ओहला आन ओहलीबा नावोअ महापापी बोईंइं जागे गोया. 45 तियाहा काजे धर्मी माअहें सिनालीइं आन खुनीइ लायक तियीइ न्याय कोअहूं जोवे; काहाके ते सिनालीइं होय, आन तियींइं आथोअरी रक्त लागोहो."

46 तिहींइं काजे यहोवा देव एहें कोहे: "आंय तियीं पोअ जाअखीलाहा माअहुंउं ताड़ मोकलीहीं आन ते तियींहीं बिवाड़े आन लुटीत लेय एहेलोहो कोअहीं. 47 तियी ताड़ेए माअहें तियीं पोअ डोणाटीत तियांहां तारवाइ वाअहीं साटकावीत टाके; ताहराअ ते तियींइं पोऱ्याहां माइत कोइत तियींइं कोएं बी आगीवाअहीं फुकी देय. 48 एहें कोइत आंय महापापोहो देसोमेहें रोत सेटे कोअहीं, आन आखी बोईं हिक सेलीत कोइत तुमाआ होस महापाप कोइला वाअहीं वासात रोय. 49 तुमाआ महापाप तुमाआज बोसी पोड़े; आन तुमू नक्की तुमाआ मुर्तीइ पुज्याआ वोजू आखलाहा; आन ताहां तुमुहूं मुंदू जाय के आंय यहोवा देव होय."