1 ओमे पारवाड़ीइ नावे एं होय: पालामाआ वोल्यीइ हींवेएं जागे रोत ते हेतलोनोअ वाटेए वोल्याआ हमात काटोअ वाटे दमिश्क हाद्दीइ जागे हसर-एनान, ओ उगताम्यी-बुड्ताम्यी हींवेएं इलाखू, हमातोहो लागीत होय तो इलाखू दानाआ होय. 2 दानाआ हींवेएं जागे रोत लागीत उगताम्यू रोत ते बुड्तामाआ जागे जाआं आशेरोअ इलाखू होय. 3 आशेरोअ हाद्दीही लागीत जो उगताम्यू एक भाग होय तो नफ्तालीइ वाटू होय. 4 नफ्तालीइ हाद्दीही लागीत जो उगतामू-बुड्तामू इलाखू होय तो मनश्शेए एक वाटू होय. 5 मनश्शेए इलाखाहा लागीत उगतामू इलाखू एफ्राईमोअ एक वाटू होय. 6 एफ्राईमोअ इलाखाहा लागीत उगतामू-बुड्तामू जो इलाखू होय तो रूबेनोअ एक वाटू होय. 7 रूबेनोअ इलाखाहा लागीत उगतामू-बुड्तामू जो इलाखू होय तो यहुदाआ एक वाटू होय.

8 यहुदाआ हाद्दीही लागीत उगतामू-बुड्तामू पोसीही हाजार आथ पोलू आन बाकी पारवाड़ीइ एतुहू उगतामू-बुड्तामू नांबू भाग भेटेए जागू कोत आंगे कोअल्यू जागू रोय, तो पवित्र जागू रोय.

9 देवोअ काजे भेट कोत आंगे काड्ल्यू जो जागू रोय तो बुड्तामाआ वोल पोसीही हाजार आथ नांबू दाहा हाजार आथ पोलू जोवे. 10 ओ आंगे काड्ल्यू सोकू भाग पुंजारकाहा जोड़ुहूं जोवे; ओ पालामाआ वोल पोसीही हाजार आथ नांबू, बुड्तामाआ वोल दाहा हाजार आथ नांबू, उगतामाआ वोल दाहा हाजार आथ पोलू, आन देहामाआ वोल पोसीही हाजार आथ नांबू जोवे; यामेहें देवोअ काजे सोकु जागू रोय. 11 पुंजारकामेएं सादोक कुटूंबाआ माहें जें सोके कोआले होय, जियां माआ नियम पालन कोअयुहू आन जें लेवीइ होस इस्राएल कुटूंबाअरी नाहां भटक्येते, 12 तियांहां देशोअ वाटणीम रोत आंगे काडल्या भागोमेएं जो भाग लेवीइ काजे सोकू कोत काड्युहू तो आपुहूं जोवे. 13 आन पुंजारकाआं इलाखाहा लागीत पोसीही हाजार आथ नांबू आन दाहा हाजार आथ पोलू ओय तो भाग लेवीइ रोअहूं जोवे; तियाआ पुरो माप पोसीही हाजार आथ नांबो आन पोलो दाहा हाजार आथ जोवे. 14 तिहींमेऱ्युउ कोड्लुज भाग तियां वेसुहूं ने जोवे आन हाटाआ हाटे बी ने कोअहूं जोवे; आन तेहेंज कोइत देशोमेएं जें पेहले फलवे ओय तें बिहीरापोअ ने जाअहूं देअहूं जोवे; काहाके तें फलवे देवोअ काजे सोके होय.

15 तिया पोसीही हाजार भागोम रोत पास हाजार आथ पोलू भाग होयरोअ काजे पोन्सात्यू जागू कोत गावठाणाआं काजे आन डोगरा-बोकड़ाआं काजे मिकुहूं जोवे; तिहीं होयर तियाआ विसमेहें जोवे. 16 या आंगे काड्ल्या भागोहो लागीत उगरीइल्यू भाग जो रोय तिहीं वाईं होयरोम कामधंदू कोअनारा माअहोंअ काजे तिहींमेऱ्याआ उत्पन्नावाअहीं पेटोपांअयोंअ सोय ओवुहूं जोवे. 17 होयरोअ डोगरा आन बोकड़ाआं सोरीइलोअ जागू पालामाआ वोल आड़ी होव आथ, देहामाआ वोल आड़ी होव आथ, उगतामाआ वोल आड़ी होव आथ आन बुड्तामाआ वोल आड़ी होव आथ एतुहू जोवे. 18 या भेटेए काजे आंगे कोअल्या जागाहा लागीत बाकी उगीरल्यू जागू होय तिहींवाईं होयरोम कामधंदू कोअनारा माअहोंअ पोहवोण ओवुहूं जोवे. 19 इस्राएलोमेऱ्याआ आखी पारवाड़ीवाला कामधंदू कोअनारा माअहूं तिया जागाहा खेड़ुहूं जोवे.

20 आखू भेटेए काजे आंगे काड्ल्यू जागू पोसीही हाजार आथ नांबू आन पोसीही हाजार आथ पोलू जोवे; या सोका जागाआ शौथु भाग होयरोअ काजे आपुहूं जोवे.

21 तो होयरोअ काजे काड्ल्यू जागू आन तिहीं आगु-फाशु उगरीइल्यू जागू तिहींइं मुख्याआ आथोम जोवे; पारवाड़ीही वाटीत आपल्या जागाहा लागीत पोसीही हाजार आथ भेटेए काजे काड्ल्या जागाआ उगताम्यी हींवेपोअ आन पोसीही हाजार आथ बुड्ताम्यी हींवेपोऱ्युउ भाग तिहीं मुख्याआ काजे रोअहूं जोवे; आंगे काड्ल्यू भाग आन मंदीरोअ सोकू जागू यां बेनु भागोअ विसमेहें जोवे. 22 एहें कोइत लेवीइ जागू आन होयरोअ जागू मुख्याआ ताबामेऱ्याआ जागाम रोअहूं जोवे; ओ मुख्याआ जागू यहुदाआ इलाखू आन बिन्यामीनोअ इलाखाआ विसमेहें होय; ओ भाग मुख्याआ रोअहूं जोवे.

23 बाकी पारवाड़ीइ उगरीइल्यू भाग: बिन्यामीनोअ इलाखाअहें रोत बुड्तामाआ वोलेहे जाआं होय. 24 बिन्यामीनोअ इलाखाअरी लागीत उगतामा-बुड्तामा वोल्युउ जो एक भाग होय तो शिमोनोअ होय. 25 शिमोनोअ हाद्दीइरी लागीत उगतामा-बुड्तामाआ वोल्युउ जो एक भाग होय तो इस्साखारोअ होय. 26 इस्साखारोअ हाद्दीही लागीत उगतामा-बुड्तामू जो एक भाग होय तो जबुलूनोअ होय. 27 जबुलूनोअ हाद्दीइरी लागीत जो उगतामू-बुड्तामू भाग होय तो गादोअ एक भाग होय.

28 देहामाआ वोल गादोअ हाद्दी तामारेए जागे रोत ते मरिबा-कादेश यी जागऱ्याआ पांअयोंअ आन मिसर देशोअ खोबरीइ मेरे थेट वोडा दोऱ्याआ जागे जाआं पोते.

29 "ओ जागू तुमू इस्राएलोअ पारवाड़ीइरी वाटीत लेजा; ओज तियांआं भाग एहें कोत प्रभु देव कोहे."

30 "पालामाआ वोल होयरोअ बारथेए जागाआ माप हाड़ाशार हाजार आथ रोअहूं जोवे. 31 होयरोअ बाअणाआं नावे इस्राएलोअ पारवाड़ीइ डिठ जोवे: पालामाआ वोल तिन बाअणे जोवे: रूबेनोअ बाअणो, यहुदाआ बाअणो आन लेवीइ बाअणो. 32 उगतामाआ वोल्याआ इलाखाआ माप साड़े शार हाजार आथ जोवे; तिहीं तिन बाअणे जोवे: योसेफोअ बाअणो, बिन्यामीनोअ बाअणो आन दानोअ बाअणो. 33 देहामाआ वोल्याआ इलाखाआ माप साड़े शार हाजार आथ जोवे; तिहीं बी तिन बाअणे जोवे: शिमोनोअ बाअणो, इस्साखारोअ बाअणो आन जबुलूनोअ बाअणो. 34 बुड्तामा वोल्याआ इलाखाआ माप साड़े शार हाजार आथ जोवे; तिहीं बी तिन बाअणे जोवे: गादोअ बाअणो, आशेरोअ बाअणो आन नफ्तालीइ बाअणो 35 यी पद्दतीइ आखू मिलीत कोइत इलाखू आंठरा हाजार आथ जोवे; या होयरोअ नाव ओमे रोत आगाड़ी यहोवा-शाम्मा मोन्ज्ये ‘देव तिहीं होय’ एहेलोहो पोड़े."