1 <<Ma somere ŋon mɔɔ do e doŋ nɛ yaa,

ŋon mɔɔ lese e te ɔ na gyoo me sia,

maa mo me feliŋ do ɔ man,

na waa mo nombia kedi ke gbɛɛdɔɔ fa tɛɛlese.

2 Ɔ be gyae waa fae yeesa yaa waa wii,

yaa baa nyii ɔ woya abɔnterese man ya.

3 Ɔ be gyae waa tekeri moro keŋ be gɔŋase nɛ ya,

te ɔ be gyae waa ko kanea keŋ ka ŋmeleŋ na lee nyɔɔse nɛ ya.

Waa mo anokoare di nombia ke gbɛɛdɔɔ,

4 ɔ wose be gyae ke tekerii e yaa ke yɔkɔse e ya,

kelii debaŋ keŋ waa baŋ nombia kedi ke gbɛɛdɔɔ nae tɛɛle dɔɔ.

Baŋ be kyaa tɛɛlese ŋan loŋ be kilisi ŋa man nɛ baa mo be loo gyakaa ɔ kawola dɔɔ.>>

5 Nnɛ yaa Degbeŋgyoo Wurubuarɛ,

ŋon ɔ be yɛɛ adido te ɔ be wɔŋ ke man,

te ɔ be fɛlɛɛ tɛɛle na abɔɔ ŋan pou be tuu ke man,

ŋon ɔ be fa ke balaŋ weesɛɛ,

te ɔ be fa baŋ bɛɛ tɛɛ ke dɔɔ nyeedoŋ nɛ ne yako,

6 <<Maŋ Degbeŋgyoo baakena neŋ katenee man.

Maa lɔ kyaŋ n nyiŋmaa,

maa kɛɛ n dɔɔ na maa yela,

n ke yɛɛ nɔɔkebakesee fa balaŋ baŋ,

na keŋmaŋee fa tɛɛlese,

7 na n ke gyuusu siayɛlɛɛsatena sia,

na n ka lese baŋ bɔɔ kyam tɔ deni,

na baŋ be doo bɔɔ kyilimkyilim man nɛ lee detiŋtɛɛ man.

8 <<Maŋ yɛna Degbeŋgyoo, ma yele kenaŋ!

Mɔɔ gyae maa mo me gyoorobiiri fa ŋolo,

yaa ma yele kalese fa bɛɛneŋ ya.

9 Kɛɛ, gyaŋgba nombia ŋan kɔŋawɔ mena,

te nɛnɛɛ mɛɛ toro nombia wɔlɛɛ yako,

pɛ ŋa ke kɔŋ na

ma te gyɔ ŋa dekpeŋkpeŋ fa ŋon,>>

10 Ɛmɛɛ baŋ ɛ ne tisi gyu ɛpo man na ŋan pou doo ke man,

ɛmɛɛ tɛɛlese ŋan loŋ be kilisi ŋa na baŋ be kyaa ŋe man,

ɛ kpee nɔɔneŋ wɔle fa Degbeŋgyoo,

ɛ lese ɔ yele lee tɛɛle ɔto,

11 Depampaa na donɔɔse ŋan kyaa ŋe man baa gyina ba woya,

donɔɔse ŋan man Kedare kyaa nɛ baa nyaŋee.

Baŋ be kyaa Sela baa kpee nɔɔneŋ nyaŋee,

Baa fae yeesa lee bulase nyeeya man.

12 Baa mo gyoorobiiri fa Degbeŋgyoo,

na baa gyɔ ɔ yele kalese dekpeŋkpeŋ tɛɛlese ŋan loŋ be kilisi ŋa nɛ dɔɔ.

13 Degbeŋgyoo waa lee ŋgba baalebu nɛ,

waa wose ɔ wose ŋgba yoonɔɔte nɛ,

waa gyina ɔ woya fae yoo yeesa,

na waa yoodi ɔ kɔlara dɔɔ.

14 <<Me wuu me nɔɔ te kyare,

me yɛɛwɔ yididi te me kyaŋa ma wose.

Mɔna nɛnɛɛ maa keŋee ŋgba alo ŋon ɔ na doŋee nɛ,

maa lɔ nɔɔ na maa lee weesɛɛ foofoofoo.

15 Maa yɛlɛɛ bulase na bulasebia,

na maa yela ŋe ŋalese laŋ pou ka yekee.

Maa yela booneŋ ka bese tɛɛlese ŋan loŋ be kilisi ŋa,

na maa yela apaase pou ka yoo.

16 Maa mo siayɛlɛɛsatena ta gbɛɛneŋ ŋan bɔɔ gyeŋ ya nɛ dɔɔ,

ta detɛese ŋan bɔɔ gyeŋ ya,

maa yela detiŋtɛɛ ka bese keŋmaŋee be siaman,

na maa kyalase botɔɔse ŋan be kyalasɛɛ ya nɛ.

Kɛŋa yɛna abɔɔ ŋan maa yɛɛ,

mɔɔ gyae maa yela wɔ ya.

17 Mɔna baŋ bɛɛ mo ba wose lɔ bɛɛneŋ dɔɔ,

te bɛɛ yako dinɔɔse nyi, <Ɛmɛɛ yɛna de wurubuarɛse> nɛ,

baa mo desɛŋ dinaa bese be wɔle.

18 <<Ɛmɛɛ deŋela atɔɔsatena, ɛ nyii,

ɛmɛɛ siayɛlɛɛsatena, ɛ kɛɛ, na ɛ kena.

19 Amɔte sia yɛlɛɛla ŋgba ma somere nɛ,

te ɔ deŋela tɔɔwɔ ŋgba me kpilare ŋon mee kpili nɛ?

Amɔte sia yɛlɛɛla ŋgba ŋon daana e be bakenɔɔsee,

te ɔ sia be yɛlɛɛ ŋgba Degbeŋgyoo somere nɛ?

20 N naa abɔɔ burum, mɔna n ta mo ŋa yɛɛ kolo ya,

n see deŋele, mɔna n te tei ya.>>

21 Ka gyoo Degbeŋgyoo sia,

lee ɔ katenee dɔɔ,

nyi waa yela ɔ mmaraa ke lɛɛ yele na kenyiŋ obuo.

22 Mɔna kei yɛna balaŋ baŋ bɔɔ kuu te bɔɔ ŋmɛɛle ba abɔɔ,

be popou te dɔɔ bɔɔ man,

yaa ba yoɛ deni ketɔ man.

Be ta bese baŋ bɔɔ kuu wɔ laŋ,

keŋ ŋolo be kyaa waa lɛɛ wɔ ya,

ba te ŋmɛɛle wɔ laŋ,

keŋ ŋolo be kyaa waa yako nyi, <<Ɛ besena wɔ ta ya.>>

23 Ɛ man woŋti ne gyaela waa tei kei,

yaa waa see deŋele nideli debaŋ keŋ gyae kekɔŋ nɛ?

24 Amɔte moona Yakɔbe fa ŋgba ŋmɛɛleŋ abɔɔ,

na Iserae fa baŋ bee kuu balaŋ abɔɔ nɛ?

Na Degbeŋgyoo,

ŋon dɔɔ yɛɛ dukum tia e nɛ yee?

Nawolo nyi be te sila ɔ gbɛɛneŋ ya,

be te di ɔ mmaraa dɔɔ ya.

25 Mena dɔɔ te ɔ lese ɔ baŋkum,

na yoo man kayeyɛɛ wola wɔ.

Ɔ yelaa boalaŋ laakemse kilisi wɔ, mɔna be te nyii ke man ya,

ke kpaa wɔ, mɔna be ta mo yɛɛ kolo ya.