1 Ɛmɛɛ baŋ ɛ silana katenee gbɛɛ,

te ɛ ne kɛo Degbeŋgyoo, ɛ tei maŋ

Ɛ kɛɛ kpanaŋ keŋ man bɔɔ kpae ŋon lee,

na boya deyɛɛlɛe keŋ man bɔɔ lese ŋon lee.

2 Ɛ kɛɛ ɛ naana Aberaham

na Sara ŋon ɔ ba lola ŋon.

Ɔ yɛɛ dokoloŋ te me baake e,

te me hiraa e te me yelaa ɔ lolee bia burum.

3 Degbeŋgyoo waa fɛɛ Siyɔn wɔe

na waa wii ɔ donɔɔ keŋ kɔɔ wɔlɛɛ nɛ waraŋase.

Waa besena ɔ depampaa keŋ yɛɛ Edɛn wɔɔbii,

na waa yɛɛ ɔ tɛɛle dowolo ŋgba Degbeŋgyoo wɔɔbii nɛ.

Baa naa kenyaŋee na gyoŋ ɔ man,

na baa nyii karaŋ kefa na nɔɔneŋ kekpee yeesa.

4 <<Me balaŋ, ɛ tei maŋ,

me tɛɛlese, ɛ nyii maŋ.

Me nombia kawola gyae ka lee me maŋ,

Me nombia kedi kegbɛɛ dɔɔ gyae ka bese keŋmaŋee fa tɛɛlese ŋan.

5 Me katenee ne kɔŋ bileŋbileŋ,

ma nyeekelɛɛ dɔŋ gbɛɛ dɔɔ ne kɔŋ,

te me doŋ gyae ka mo nombiakedi kegbɛɛ dɔɔ kɔna tɛɛlese.

Tɛɛlese ŋan loŋ be kilisi ŋa nɛ ne kɛɛ me siaman,

te be loo gyakaa me doŋ dɔɔ.

6 Ɛ gyina ɛ sia kɛɛ adido,

ɛ kɛɛ tɛɛle dɔɔ.

Adidose gyae ke ŋaalaa ŋgba nyɔɔse nɛ,

tɛɛle gyae ke tirii ŋgba kanyaŋ nɛ,

te baŋ be kyaa ke man nɛ baa yekee ŋgba kyɔɔse nɛ.

Mɔna ma nyeekelɛɛ gyae ke doo kekpaakekpaa,

te me katenee be gyae ke taŋ ya.

7 << Ɛmɛɛ baŋ ɛ gyeŋ keŋ ke doona kegbɛɛ,

ɛmɛɛ balaŋ baŋ ɛ be lɛɛ me nombia kawola do ɛ konɔɔse man nɛ, ɛ nyii man.

Ɛ na yele deniwalaŋ ahiŋ nombia ka do ŋon gyakoloŋ,

yaa be tuubia ke yela ɛ ke seree ya.

8 Nawolo nyi paapaa waa tao wɔ ŋgba kanyaŋ nɛ,

feelii waa likii wɔ ŋgba dukurufa mpuu nɛ.

Mɔna me katenee gyae ke doo kekpaakekpaa,

ma nyeekelɛɛ doo kelii kalola kegyakaarese man.>>

9 Degbeŋgyoo doŋ, koro, koro

mo n doŋ kpaŋ!

Koro ŋgba weeya akaalaŋaŋ ŋan

ŋgba gyaŋgba keŋ nɛ.

Na nyaŋ keretiina Rahabe kpetekpete,

te n sɔɔ wonembukum ŋon ko yee?

10 Na nyaŋ yelela te ɛpo,

na loŋse ŋan dana lee nɛ yoowɔ

te n lese gbɛɛ ɛpo siiliŋ man

na baŋ n be lɛɛ wɔ nɛ ka toŋ yee?

11 Baŋ Degbeŋgyoo be lɛɛ wɔ nɛ baa bese kɔŋ.

Baa mo nɔɔneŋ gyoo Siyɔn.

Baa mo kenyaŋee kekpaakekpaa gyooro kotɔtɔɔ wuu ba nyeeya.

Baa di gyoŋ na baa nyaŋee,

te waraŋsa kedi na kemutii gyae ke yeu.

12 <<Maŋ, maŋ yɛna ŋon mɛɛ fɛɛ n wɔe.

Nyaŋ yɛna amɔte keŋ n ne yee deniwalaŋ,

deniwalaŋ baŋ be yɛɛ ŋgba ŋale nɛ,

13 te n wolee Degbeŋgyoo ŋon ɔ be yɛɛ neŋ,

ŋon ɔ be fɛlɛɛ adidose

te ɔ ba see tɛɛle mokɔɔ nɛ.

Te wee kamasɛ na n kyaa gyakoloŋ man

lee baŋ bɛɛ gyae baa wɔlɛɛ neŋ

te bɛɛ ŋere neŋ do nɛ baŋ dɔɔ?

Nde baŋ bɛɛ ŋere neŋ do nɛ baŋ keŋ?

14 Be gyae ke di weeya ya baa lese gyakoloŋtena baŋ bɔɔ tɔɔ do deni nɛ,

bɔɔ gyae baa yeŋ deni kyilimkyilim keŋ man,

yaa weenɛɛ kebɔ wɔ ya.

15 Nawolo nyi maŋ yɛna Degbeŋgyoo ɛ Wurubuarɛ,

ŋon ɔ ne saale ɛpo te kɛɛ gyɔ feliŋ nedoŋ.

ɔ yele yɛna Degbeŋgyoo Dekpataakpere.

16 Me ta mo me nombia do n nɔɔman,

te ma moo me nyiŋmaa wuluŋ wuu neŋ.

Maŋ yɛɛna adido see ka dedoi man,

maŋ seena tɛɛle mokɔɔ,

te me yako Siyɔn nyiaa, <<Ɛmɛɛ yɛna me balaŋ.>>>

17 Foŋ! Foŋ!

O Yerusalɛm, koro.

nyaŋ ŋon n be nyɔɔ lee Degbeŋgyoo nyiŋmaa man

baŋ leenɔɔ keŋ man nɛ,

nyaŋ ŋon n be nyɔɔ ke kerekere,

lee leenɔɔ keŋ kee yele balaŋ ne kpaŋte man nɛ.

18 Ɔ bia baŋ pou ɔ ba lolo man nɛ,

ŋolo be kyaa keŋ waa wola e gbɛɛ ya,

bia baŋ pou ɔ be kɛɛle man nɛ,

ŋolo be kyaa keŋ waa kyaŋ ɔ nyiŋmaa man ya.

19 Mena kewɔlɛɛ ala kɛŋa yalala n dɔɔ,

amɔte ne gyaela waa tale fɛɛ n konɔɔ?

kayeyɛɛ na kewɔlɛɛ, tanam na yoosila,

amɔte ne gyaela waa tale kolosi do neŋ.

20 N bia te gbalase,

Be doo donɔɔ kebɔtala kamasɛ man,

ŋgba kpelee ŋon kɔta be kyam nɛ,

Degbeŋgyoo baŋ nedoŋ keŋ te wulu wɔ,

kpuna n Wurubuarɛ kekalana keŋ.

21 Mena dɔɔ nyaŋ ŋon n ne kaa,

te n be dɛɛse, mɔna n te nyɔɔ waen ya nɛ, nyii kɛbo.

22 Nnɛ yaa Degbeŋgyoo Doŋ Pou Nyee,

n Wurubuarɛ ŋon ɔ na seŋ ɔ balaŋ wɔle nɛ, ne yako

<<Kɛɛ, ma te lɛo

leenɔɔ keŋ ne yele n ne kpaŋte nɛ lee n nyiŋmaa man,

n ba tekaa nyɔɔ

lee me baŋ leenɔɔ keŋ man bela ya.

23 Maa mo ke do baŋ bɛɛ naase neŋ diyem nɛ nyiŋmaa man,

Amɔte yakona neŋ nyiaa,

<Tenee doo tɛɛle man na dɛɛ ta n dɔɔ?>

Te n yɛɛ n maama ŋgba tɛɛle nɛ,

ŋgba abɔntere keŋ bɛɛ ta ke dɔɔ nɛ.>