1 Degbeŋgyoo kpa nyiaa <<Baake keŋkeŋ, naa tina yela ya.

Gyina n woya ŋgba kaberɛ nɛ.

Toro me balaŋ deŋele doŋ nombia,

na Yakɔbe duuluŋman balaŋ dukum yako wɔ.

2 Bɛɛ kɛo maŋ wee kamasɛ,

bɛɛ yɛɛ ŋgba bɛɛ gyae baa gyeŋ me gbɛɛneŋ nɛ,

ŋgba tɛɛle keŋ kɛɛ yɛɛ keŋ ke doona kegbɛɛ,

te ba te bɛɛ be Wurubuarɛ mmaraase ya nɛ.

Bɛɛ gyae nombia kedi na kegbɛɛ dɔɔ lee me gyaŋ

te bɛɛ yɛɛ ŋgba bɛɛ gyae Wurubuarɛ ka benaa wɔ nɛ.

3 Bɛɛ yako nyiaa, <Weera dɔɔ te de bake de nɔɔ,

te n te naa ya?

Woŋ dɔɔ te de yɔkɔse da wose,

te n ta gyene ya.>

<< Mɔna wee keŋ ɛ be bake ɛ nɔɔ nɛ, ɛ ne yɛɛ keŋ ɛ ne gyae bo

te ɛ na ŋere ɛ tom yɛɛra pou do.

4 Kale na nombia kewɔŋee te ɛ na moo tɔ ɛ nɔɔkebake nɔɔ,

na akpanyanyaŋ akɔtase kegyɔ dɔŋa.

Ɛ be tale bake nɔɔ nnɛ

na baa nyii ɛ kefane adido ya.

5 Kei yɛna nɔɔkebake keŋ mɛɛ gyae,

nyi balaŋ ke yɔkɔse ba wose wee dokoloŋ pɛ?

Ke yɛɛ nyee kegɔŋase ke ŋgba moro nɛ

na titire kamo wuu wose na tɔŋ man kedoo ke?

Kei yaa ɛ ne baake nyi nɔɔkebake,

na wee keŋ na gyoo Degbeŋgyoo sia nɛ?

6 Na nɔɔkebake keŋ mɛɛ gyae yɛna nyi,

ɛ ka lese agbaragbarase ŋan ŋe bɛɛ di nombia kegbɛɛ dɔɔ ya nɛ,

na ɛ ke booli kasolɔse ŋmeeseŋ

na ɛ ke fa baŋ bɔɔ ŋere wɔ do nɛ wosefɛɛreŋ

na ɛ ke wɔlɛɛ kasolɔ kamasɛ yee?

7 Na keŋ yɛna nyi ɛ ke kpala ɛ weenɛɛ fa ŋon tanam na ko e nɛ,

na ɛ ke fa diyemte ŋon ɔ dɔŋ ɔ ne kili nɛ dedoi,

na ɛ ka do ŋon ɔ dɔŋ deteŋteli nɛ kegba,

na ɛ ke kɛɛ ɛmɛɛ gbagba ɛ loŋtona dɔɔ yee?

8 Botɔɔ te ɛ keŋmaŋee gyae ke bɛɛ lee ŋgba tɛɛ kena nɛ,

na ɛ ke nyiŋ kawee kekyɔ bileŋ

mena na ɛ katenee*58:8 Yaa ŋon ɔ tenɛɛ nɛ gyae ke ta ɛ siaman,

na Degbeŋgyoo gyoorobiiri ke gyee ŋon nideli.

9 Kenaŋ na ɛ ke baake Degbeŋgyoo, te waa kpa ŋon,

ɛ ke wii baake e nyi waa kyɔ ŋon, te waa yako nyiaa, Maŋ yaa.

<< Nyi akpaa ɛ lese baŋ bɔɔ ŋere wɔ do nɛ kasolɔse,

kpuna nyiŋmaase kamo wola balaŋ na balaŋ kewɔlɛɛ,

10 te akpaa ɛ mo ɛ weenɛɛ fa ŋon tanam na ko e,

te ɛ kyɔ baŋ bɔɔ ŋere wɔ do na,

kenaŋ na ɛ keŋmaŋee gyae ke bɛɛ lee detiŋtɛɛ man,

te ɛ nelim gyae ke yɛɛ ŋgba weese teŋteŋ nɛ.

11 Degbeŋgyoo waa wola neŋ gbɛɛ debaŋ kamasɛ,

waa yela ɛ ke nyiŋ keŋ ɛ ne gyae tɛɛle dowolo dɔɔ

na waa do n ŋɔɔ doŋ.

N ke yɛɛ ŋgba wɔɔbii keŋ bɛɛ do ke loŋ nideli nɛ,

ŋgba boŋobiinyee keŋ ke bɛɛ yoo ya nɛ.

12 Ɛ balaŋ baa desina be donɔɔse ŋan ŋɔɔ wɔlɛɛ nɛ

na baa bese baŋ gyakaa gyaŋgba mokɔɔse ŋan dɔɔ,

baa baake ŋon nyi Ŋon ɔ ne desina Akyaŋ ŋan ŋɔɔ tekeri

na ŋon ɔ ne desina lese gbɛɛneŋ balaŋ akyaese man nɛ.

13 Nyi akpaa n te waalaa ma kefɛɛfo wee keŋ ya

te n te yɛɛ n kegyae ma wee fereŋkyeŋ keŋ ya,

akpaa ma kefɛɛfowee keŋ da gyoo n sia,

te n mo obuo fa Degbeŋgyoo wee fereŋkyeŋ keŋ,

nyi n mo ɔ obuo fa ke te n te yɛɛ ke nyaŋ gbagba n gbɛɛ dɔɔ ya,

te n te yɛɛ ke mena keŋ n ne gyae yaa n te kolosi nɔɔwoya ŋan taŋ tɔnɔɔ ya nɛ,

14 kenaŋ na n ke nyaŋee Degbeŋgyoo man,

te maa yela n ke lɛɛ yele tɛɛle keŋ dɔɔ

na n ke di n kya Yakɔbe dedii.>>

Degbeŋgyoo kolosila.