1 Degbeŋgyoo Doŋ Pou Nyee ŋon feliŋ gyakaa me dɔɔ,

nawolo nyi ɔ te tiu maŋ nuŋ,

nyi maa gyɔ ɔ nombia kpaakpaa ŋan dekpeŋkpeŋ fa ayematena.

Ɔ te kpila maŋ nyi maa yakodo baŋ nombia be takaa wɔ nɛ,

na maa toro yako yoogbeŋa nyi be te nyiŋ ba wose,

na maa lese baŋ bɔɔ kyaŋ tɔ deni nɛ lee detiŋtɛɛ man.

2 Na maa gyɔ Degbeŋgyoo kaboele kulutoo keŋ dekpeŋkpeŋ,

na de Wurubuarɛ nombia kedi wee keŋ,

na ke fɛɛ baŋ bee di waraŋsa nɛ wɔe,

3 na maa fa baŋ be kyaa Siyɔn te bɛɛ mutii nɛ abɔɔ,

na maa wuu wɔ gyooro kotɔtɔɔ

na ka seŋ tɔŋ nae man,

kenyaŋee nuŋ

see waraŋsa nae man,

yele kalese kegba

see waraŋase kedi nae man.

Baa baake wɔ nyi katenee kpeli daase,

ŋan Degbeŋgyoo be duu,

na waa lese ɔ gyoorobiiri wola.

4 Baa desina baŋee gyaŋgba donɔɔse ŋan be yɛlɛɛ nɛ,

na baa besena botɔɔse ŋan be wɔlɛɛ beneŋ beneŋ nɛ seŋ,

baa desina donɔɔse dinaana ŋan be yɛlɛɛ nɛ,

na ŋan be wɔlɛɛ nɛ see kalola kegyakaarese.

5 Ŋɔɔla ne gyaela baa kɛɛle ɛ namense,

baŋ ne gyaela baa yɛɛ tom ɛ wɔɔse na gerepo wɔɔse man.

6 Mɔna baa baake ŋon nyi Degbeŋgyoo saese,

na baa do ŋon yele nyi Wurubuarɛ somera.

Ɛ kedi tɛɛlese agyapadɛɛse,

te ba wosekenyiŋ te ɛ ka mo gate ɛ wose.

7 Desɛŋ nae man nɛ,

ɛ ke nyiŋ dedii akpeŋ ala,

desɛŋ nombia nae man nɛ,

ɛ ke nyaŋee ɛ dedii keŋ man.

te ɛ ke nyiŋ ɛ tɛɛle akpeŋ ala,

na ɛ ke nyaŋee kekpaakekpaa.

8 <<Nawolo nyi maŋ, Degbeŋgyoo ne gyae nombia kedi kegbɛɛ dɔɔ,

mɛɛ kɔla abɔɔ kelɛo doŋ man na nombia kumɛɛ keyɛɛ.

Maa tɔ me balaŋ kom lee ma anokoare kedi man,

na daana wɔ ke yɛɛ nɔɔkebakesee kekpaakekpaa.

9 Be duuluŋman balaŋ baa lɛɛ yele tɛɛlese man,

na be bia balaŋ man.

Baŋ pou baa naa wɔ nɛ baa gyeŋ,

nyi be yɛɛ balaŋ baŋ Degbeŋgyoo be hiraa wɔ.>>

10 Me sia na gye nideli Degbeŋgyoo man,

ma woo ne nyaŋee me Wurubuarɛ man.

Nawolo nyi ɔ ta mo nyeekelɛɛ kegba do maŋ

te ɔ moo ɔ katenee kegba wurikyim do maŋ,

ŋgba mena keŋ alowɔle baale ne desina ɔ nyee ŋgba sae,

te alowɔle na mo wa agbaragbarase desina ɔ wose nɛ.

11 Nawolo nyi mena keŋ tɛɛle ne yele abɔɔbia ne tuu,

te wɔɔbii ne yele abɔɔbia na bee nɛ,

mena te Degbeŋgyoo Doŋ Pou Nyee waa yela ɔ katenee

na ɔ yele kalese ke bɛɛ lee tɛɛlese pou siaman.