1 Ao Degbeŋgyoo, kpase adido man na n ke tisi kɔŋ,

na bulase ke seree n siaman!

2 Mena keŋ daase ne kyaŋee boalaŋ

te ne yele loŋ ne fiu nɛ,

tisi kɔŋ na ke yela n kɔlara ka gyeŋ n yele,

na ke yela tɛɛlese ke wosi n siaman!

3 Nawolo nyi debaŋ keŋ n be yɛɛ gyakoloŋ nombia keŋ de loo be gyakaa ya nɛ,

n tisiwɔ kɔŋ te bulase wosiwɔ n siaman.

4 Lenaŋ gyaŋgba keŋ nɛ, ŋolo te nyii ya,

deŋele daale te nyii ya,

sibii daale te naa Wurubuarɛ ŋolo kpuna neŋ,

ŋon ɔ ne kyɔ baŋ be loo gyakaa ɔ dɔɔ nɛ ya.

5 N na mo kenyaŋee kyɔ baŋ bɛɛ yɛɛ keŋ doo kegbɛɛ dɔɔ,

baŋ bɛɛ tɔɔse n gbɛɛneŋ nɛ.

Mɔna debaŋ keŋ de gyakaa dɛɛ yɛɛ dukum tia wɔ nɛ,

n gyeŋa baŋ.

Nɛnɛɛ sena yaa dɛɛ yɛɛ na dɛɛ nyiŋ kelɛɛ?

6 De popou yɛɛ ŋgba balaŋ baŋ bɔɔ do ba wose ayimɛɛ nɛ,

te de katenee pou yɛɛ ŋgba kakyeŋgbelaa keŋ dana ayimɛɛ nɛ.

De popou ta wolo ŋgba faareŋ nɛ,

te de dukum te kuu daa laŋ ŋgba feliŋ nɛ.

7 Ŋolo bɛɛ baake n yele,

yaa do kakyeŋ lɔ kyaŋ neŋ ya,

nawolo nyi n ta mo n sia weese daa,

te n moo daa fa de dukum.

8 Mɔna Degbeŋgyoo, nyaŋ yɛna de kya.

Daa yɛɛ degbaŋtɛɛle ke, te nyaŋ yɛɛna maare ŋon,

de popou yɛɛ n nyiŋmaa man tomse ŋa.

9 Naa gyeŋ baŋ gbaa ya,

naa tɔɔse de dukum kekpaakekpaa ya,

Ao, dɛɛ sola neŋ bo, gɛɛse kɛɛ daa,

nawolo nyi de popou yɛɛ n balaŋwɔ.

10 N donɔɔ fereŋkyeŋ keŋ ta bese depampaa,

Siyɔn koraŋ yɛɛ depampaa ke, te Yerusalɛm doo yakaa.

11 Be ta too,

de obuo na ɔsom deni fereŋkyeŋ keŋ man de naanaɔ na lese n yele nɛ,

te da abɔɔ kpaakpaa ŋan pou te wɔlɛɛ.

12 Kɛŋa pou wɔle na Degbeŋgyoo, n ke wɔŋ n wose lee wɔle?

N ke wuu n nɔɔ na n ke wɔŋ da deŋele beiŋ?