1 Muling sumagot si Job,

2 "Hanggang kailan ninyo ako pahihirapan,

at sasaktan sa mga sinasabi ninyo?

3 Paulit-ulit ninyo akong iniinsulto.

Hindi na kayo nahiya

sa mga ginagawa ninyo

sa akin?

4 Kung talagang nagkasala ako,

problema ko na iyon.

5 Ang akala ninyoʼy mas magaling kayo

kaysa sa akin,

at ginagamit ninyo ang kahihiyan ko

bilang patunay na nagkasala ako.

6 Dapat ninyong malaman,

ang Diyos ang humatol sa akin

nang hindi tama.

At nahuli ako ng kanyang lambat

na nakapalibot sa akin.

7 "Tumawag ako

at humingi ng tulong

ngunit walang sumagot sa akin.

Humingi ako ng katarungan

ngunit walang nagbigay sa akin.

8 Hinarangan ng Diyos

ang dinadaanan ko

upang hindi ako makadaan.

Tinakpan din niya ito ng kadiliman.

9 Inalis niya ang aking karangalan

at sinira ang mabuti kong pangalan.*

10 Pinahirapan niya ako

saanman ako bumaling

na halos ikamatay ko na.

Inalis niya ang pag-asa ko

na parang punongkahoy na binunot.

11 Labis ang galit niya sa akin

at itinuring niya akong kaaway.

12 Pinadalhan niya ako ng mga sundalo

para salakayin at palibutan ang aking tolda.

13 "Inilayo niya sa akin

ang aking mga kamag-anak;*

at nilayuan na ako

ng aking mga kakilala.

14 Wala na ang lahat ng taong malapít sa akin.

Pati mga kaibigan koʼy nilimot na ako.

15 Hindi na ako kilala ng aking mga bisita

at mga babaeng alipin.

Itinuring na nila akong dayuhan.

16 Kapag tinatawag ko ang aking alipin,

hindi na niya ako pinapansin,

kahit makiusap pa ako.

17 Ang asawa koʼy nababahuan sa hininga ko

at ang mga kapatid kong lalaki

ay nandidiri sa akin.

18 Hinahamak ako kahit ng mga batang paslit.

Kapag nakikita nila ako,*

pinagtatawanan nila ako.

19 Lahat ng matalik kong kaibigan

ay nasusuklam sa akin.

Pati mga mahal ko sa buhay

ay lumayo na rin.

20 Butoʼt balat na lang ako

at halos mamamatay na.

21 "Maawa kayo sa akin,

mga kaibigan ko,

dahil pinahihirapan ako ng Diyos.

22 Bakit ninyo ako inuusig

tulad ng ginagawa ng Diyos sa akin?

Hindi pa ba sapat

ang pagpapahirap ninyo sa akin?

23 "Mabuti sana kung isinulat sa aklat

ang mga sinabi ko,

24 o di kayaʼy iniukit ito sa bato

upang hindi mabura magpakailanman.

25 Alam kong buháy ang aking Tagapagligtas

at sa bandang huli

ay darating siya dito sa lupa.

26 Pagkaalis ko sa katawang ito

at mabulok ang mga laman ko,

makikita ko na ang Diyos.*

27 Makikita ko siya nang harapan

at hindi na siya iba sa akin.

Labis na akong nananabik

na makita siya.

28 "Kung sasabihin ninyo,

‘Patuloy natin siyang paratangan

dahil siya mismo ang ugat

ng mga kaguluhan.’

29 Katakutan ninyo ang talim ng tabak,

sapagkat ito ay parusang nararapat

dulot ng kanyang matinding poot,

upang malaman ninyong may paghahatol."