1 Sumagot si Job,

2 "Kung matitimbang lamang

ang dinaranas kong pagtitiis

at paghihirap,

3 mas mabigat pa ito

kaysa sa buhangin

sa tabing-dagat.

Iyan ang dahilan

kung bakit nagsalita ako ng padalos-dalos.

4 Sapagkat ang mga pana*

ng Diyos na Makapangyarihan

ay nakatusok na sa akin;

at ang lason nitoʼy kumalat

sa buo kong katawan.

Ang mga nakakatakot

na pana ng Diyos

ay nakaamba na sa akin.

5 Umaatungal ba ang asnong-gubat

kung may damo itong kakainin,

o umaangal ba ang baka

kapag may makakain?

6 Makakain ba ang pagkaing walang lasa

kung walang asin?

May linamnam ba sa puti lamang ng itlog?*

7 Ako man ay wala ring ganang

kainin iyan,

upang akong masusuka.

8 "Nawaʼy makamtan ko

ang aking kahilingan.

Sanaʼy ipagkaloob ng Diyos

ang aking inaasam-asam,

9 na mas mabuting durugin ako ng Diyos;

bawiin na lang ng kamay niya

ang aking buhay.

10 At kapag itoʼy nangyari,

masaya pa rin ako,

dahil sa kabila ng aking paghihirap

hinding-hindi ko itinakwil

ang mga salita ng Banal na Diyos.

11 "May lakas pa ba ako

para akoʼy umasa pa?

May mahihintay pa ba ako,

para akoʼy magtiis pa?

12 Kasingtigas ba ako ng bato

at gawa ba sa tanso ang katawan ko?

Hindi!

13 Wala na akong lakas

upang iligtas ang sarili ko.

Wala na rin akong pagkakataong

magtagumpay pa.

14 "Bilang mga kaibigan

nais kong damayan ninyo ako

sa paghihirap kong ito,

kahit na sa tingin ninyoʼy

wala akong takot

sa Diyos na Makapangyarihan.

15 Ngunit kayong mga itinuturing kong kapatid

ay hindi pala maaasahan;

para kayong sapa

na kung minsaʼy umaapaw

at kung minsan namaʼy tuyo.

16 Itoʼy umaapaw kapag puno ng tunaw

na nyebe o yelo,

17 at sa tag-init itoʼy natutuyo;

sa init ng panahon itoʼy naglalaho.

18 Kapag dumaan doon

ang mga naglalakbay,

wala silang tubig na maiinom,

kaya pagdating nila sa ilang

namamatay sila.

19 Ang mga mangangalakal

na nagmula sa Tema at Sheba

na naglalakbay

ay umaasang makakainom sa sapa,

20 ngunit nabigo sila.

Umaasa silang may tubig doon

ngunit wala pala.

21 Ang sapa na iyon ang katulad ninyo.

Wala rin kayong naitutulong sa akin.

Natakot kayo nang makita ninyo

ang nakakaawa kong kalagayan.

22 Ngunit bakit? Humingi ba ako

ng regalo sa inyo?

Nakiusap ba akong tulungan nʼyo ako

mula sa inyong kayamanan,

23 o iligtas ako mula sa kamay

ng aking mga kaaway,

at sagipin ako sa pagkakahawak

ng mga mararahas?

24 "Turuan nʼyo ako

at kayoʼy aking pakikinggan,

ipakita sa akin

ang aking kamalian.

25 Hindi baleng masakit

ang sasabihin ninyo

bastaʼt iyon ay totoo.

Ngunit ang ibinibintang ninyo sa akin

ay hindi totoo

at hindi ninyo mapatunayan.

26 Gusto ninyong ituwid ang mga sinasabi ko,

dahil para sa inyo,

ang aking sinasabi

bilang desperadong tao

ay walang kabuluhan.

27 Bakit, kayo baʼy matuwid?

Nagagawa nga ninyong

ipaalipin ang isang ulila,

o di kayaʼy ipagbili ang isang kaibigan!

28 "Tingnan ninyo ako.

Sa tingin ba ninyoʼy

magsisinungaling ako sa inyo?

29 Tigilan na ninyo ang paghatol sa akin,

dahil wala akong kasalanan.

30 Akala ba ninyo

ay nagsisinungaling ako,

at hindi ko alam kung ano

ang tama at mali?"