1 Sumagot si Bildad na taga-Shua,

2 "Makapangyarihan ang Diyos

at kagalang-galang.

Pinaghahari niya

ang kapayapaan sa langit.

3 Mabibilang ba ang kanyang hukbo?

May lugar bang hindi nasisinagan

ng kanyang liwanag?

4 Paano makakatayo ang isang tao

sa harapan ng Diyos

at sasabihing siya ay matuwid?

Mayroon bang taong ipinanganak

na walang kapintasan?

5 Kung ang buwan at mga bituin

ay hindi maliwanag sa kanyang paningin,

6 di lalo na ang tao

na parang uod lamang."