1 "Job, kahit humingi ka ng tulong,

walang tutulong sa iyo.

Kahit ang mga anghel*

ay hindi ka tutulungan.

2 Ang sama ng loob

ay pumapatay sa hangal,

at ang paninibugho

ay pumupuksa sa taong mangmang.

3 Ayon sa aking nakita at nalaman,

maaaring umunlad ang pamumuhay

ng isang hangal,

ngunit bigla na lang isusumpa ng Diyos

ang sambahayan niya.

4 Ang mga anak niyaʼy

walang malalapitan

at wala ring magtatanggol

sa kanila sa hukuman.

5 Ang ani niyaʼy kakainin ng iba.

At kahit ang mga bungang nasa tinikan

ay kukunin ng mga taong gutom.

Ang kayamanan niyaʼy aagawin

ng mga taong uhaw

sa mga ari-arian.

6 Ang kahirapan ay hindi galing sa alikabok

at ang kaguluhan

ay hindi umuusbong sa lupa.

7 Ngunit likas sa tao

ang ipanganak sa kaguluhan,

tulad ng tilamsik ng apoy

na pumapailanlang.

8 "Kung ako sa iyo,

lalapit ako sa Diyos.

Sasabihin ko sa kanya

ang aking kalagayan.

9 Sapagkat gumagawa siya

ng mga kahanga-hangang bagay

at mga himalang hindi kayang

unawain o bilangin.

10 Nagpapadala siya ng ulan sa mundo

at pinatutubigan niya ang mga bukirin.

11 Itinataas niya

ang mga nagpapakumbaba

at kinakalinga ang mga nagdadalamhati.

12 Sinisira niya ang plano

ng mga mandaraya,

upang hindi sila magtagumpay.

13 Hinuhuli niya ang marurunong

sa kanilang katusuhan,

at hinahadlangan ang plano

ng mga mapanlinlang.

14 Hindi sila nakakakita

kahit maliwanag,

at nangangapa sa kadiliman

kahit na katanghalian.

15 Inililigtas ng Diyos ang mga dukha

mula sa kamatayan

at sa mga taong makapangyarihan

na umaapi sa kanila.

16 Kaya may pag-asa ang mga dukha,

ngunit ang masasama

ay kanyang sinasaway.

17 "Mapalad ang taong itinutuwid ng Diyos

ang pag-uugali.

Kaya huwag mong mamasamain

ang pagtutuwid

ng Diyos na Makapangyarihan sa iyo.

18 Sapagkat ang sinusugatan niya

ay kanya ring ginagamot.

Ang kanyang sinasaktan

ay kanyang pinapagaling.

19 Palagi ka niyang ililigtas

sa mga salot at panganib.

20 Ililigtas ka niya sa kamatayan

sa panahon ng taggutom at digmaan.

21 Iingatan ka niya

kung sisiraan ka ng iba,

at wala kang katatakutan

kung dumating man

ang kapahamakan.

22 Tatawanan mo

ang taggutom at kapahamakan,

at ang mababangis na hayop

ay hindi mo katatakutan.

23 Makikipagkasundo ka sa mga bato sa parang

at sa gitna ng mga mababangis na hayop

ay mamumuhay kang may kapayapaan.

24 Mamumuhay ng payapa

ang sambahayan mo

at walang mawawala

sa iyong mga hayop.

25 Dadami ang iyong angkan

na parang kasindami ng mga damo sa lupa.

26 Hahaba ang buhay mo

at hindi ka mamamatay

nang hindi sa tamang panahon.*

27 "Ayon sa aming nalaman

at naranasan,

ay aming napatunayan

na talagang totoo ang lahat ng ito.

Kaya dinggin mo ito

at isabuhay para sa ikabubuti mo."