1 "Dahil ditoʼy kumakabog ang dibdib ko

at tumatalon-talon ang puso ko.

2 Pakinggan ninyo ang dagundong

ng tinig ng Diyos,

ang ugong na nagmumula

sa kanyang bibig.

3 Pinapakawalan niya ang kidlat

sa buong kalawakan,

at pinaaabot ito hanggang sa dulo ng mundo.

4 Pagkatapos ay maririnig

ang dagundong ng kanyang tinig

na parang isang kulog.

Hindi niya ito pinipigilan.

5 Kagila-gilalas ang dumadagundong

na tinig ng Diyos.

Gumagawa siya

ng mga kahanga-hangang bagay,

mga bagay na hindi natin kayang unawain.

6 Inuutusan niya ang yelo

na pumatak sa lupa,

ganoon din ang ulan

na bumuhos nang malakas,

7 upang ang taoʼy makapagpahinga

sa kanilang mga ginagawa

at makapagbulay-bulay

sa mga ginawa ng Diyos.

8 Nagtatago ang mga hayop

sa kanilang mga taguan

at nananatili roon kapag may bagyo.

9 Dumadating ang bagyo

at ang hanging malamig

mula sa kanilang taguan.

10 Sa pamamagitan ng hininga ng Diyos

nabubuo ang yelo,

at nagiging yelo ang malalawak

na bahagi ng tubig.

11 Pinupuno niya ng tubig ang mga ulap

at pinakikidlat ito.

12 Sa kanyang utos,

nagpapaikot-ikot ang mga ulap

sa ibabaw ng mundo.

At ang kanyang nais

ay kanilang ginagawa.

13 Ginagamit niya ang mga ito

upang ituwid ang tao,

o ipadama ang kanyang pag-ibig.

14 "Job, pakinggan mo ito,

at pagbulay-bulayan

ang mga kahanga-hangang bagay

na ginagawa ng Diyos.

15 Alam mo ba kung paano

inuutusan ng Diyos ang ulap,

at kung paano siya

nagpapakidlat mula rito?

16 Alam mo ba kung paano lumulutang

ang mga ulap?

Ang lahat ng itoʼy kahanga-hangang gawa ng Diyos

na ang dunong ay walang hangganan.

17 Ikaʼy pagpapawisan

dahil sa mainit na hangin mula sa timog,

18 matutulungan mo ba ang Diyos

na ilatag ang kalawakan

at patigasin na parang tansong salamin?

19 "Kaya sabihin mo sa amin

kung ano ang dapat naming sabihin sa Diyos.

Hindi namin alam kung paano

kami mangangatwiran

dahil kulang ang aming kaalaman.

20 Hindi ko gugustuhing makipagtalo sa Diyos,

dahil baka akoʼy kanyang ipahamak.

21 Walang sinumang makakatitig sa araw

na nagliliwanag sa himpapawid,

pagkatapos mahawi ng hangin

ang mga ulap.

22 Mula sa hilaga, darating ang Diyos

na nagniningning na parang ginto

at ang kanyang liwanag

ay kagila-gilalas.

23 Hindi natin lubos na maunawaan

ang Diyos na Makapangyarihan na napakadakila.

Lubos siyang makatarungan,

matuwid at hindi nang-aapi,

24 kaya iginagalang siya ng mga tao.

Hindi niya pinapansin

ang mga taong nagsasabing

sila ay marunong."