1 Uhoraho abarira Mose ati: 2 "Vugana n’Abisirayeli ubabwire uti: ‘Nimwinjira mu gihugu ngiye kubaha ngo mucegukire 3 nimwashikanira Uhoraho ikimazi co guturirwa, kivuye mu masho canke mu mikuku, nk’ubumote bwiza buhawe Uhoraho, yaba ari amashikanwa yo guturirwa canke ibimazi, vyaba ari ivyo gushitsa isezerano canke ivyo gushikana bitanzwe n’uwuvyishakiye canke amashikanwa y’imisi mikuru; 4 uwuzozana ishikanwa ryiwe aze ashikanire Uhoraho ishikanwa ry’ifu ringana n’ic’icumi c’ingero efa* y’ifu inoze neza ivanze n’ica kane c’ingero hini* y’amavuta. 5 Ku mwagazi w’intama wose utanzwe nk’ikimazi co guturirwa canke ikindi kimazi, muze mutegure ica kane c’ingero hini y’umuvinyu bibe ikimazi c’ibinyobwa.

6 Ku mpfizi y’intama yose muze mutegure ishikanwa ry’ifu ringana na bibiri vya cumi vy’ingero efa* y’ifu inoze neza ivanze n’ica gatatu c’ingero hini* y’amavuta, 7 hamwe n’ica gatatu c’ingero hini y’umuvinyu ngo bibe ishikanwa ry’ibinyobwa. Mubitange bibe ubumote bwiza bunezereza Uhoraho.

8 Nimwategura gutanga ishuri y’ikimazi co guturirwa canke ikindi kimazi, ryaba ishikanwa ryo gushitsa isezerano canke ikimazi c’ishimwe gishikaniwe Uhoraho, 9 muze muzane iyo shuri hamwe n’ishikanwa ringana na bitatu vya cumi vy’ingero efa* y’ifu inoze neza ivanzwe n’igice c’ingero hini* y’amavuta. 10 Kandi muze muzane n’igice c’ingero hini y’umuvinyu bibe ishikanwa ry’ibinyobwa. Rizoba ari ishikanwa riturirwa, rizana ubumote bwiza bunezereza Uhoraho. 11 Ikimazi cose kigizwe n’ishuri canke impfizi y’intama, umwagazi w’intama canke umwagazi w’impene iyo ari yo yose, bize bitegurwe muri ubwo buryo. 12 Bize bikorwe gutyo ku kimazi cose gitanzwe, nk’uko igitigiri cavyo kingana.

13 Umuntu wese w’imvukira yo muri mwebwe aze akore ivyo bintu muri ubwo buryo igihe cose azotanga ikimazi co guturirwa ngo kizane ubumote bwiza bunezereza Uhoraho. 14 Uko urunganwe ruzogenda rukuranwa n’urundi, umunyamahanga aba muri mwebwe canke umuntu wese wo muri mwebwe azotanga ikimazi co guturirwa ngo kibe ubumote bwiza bunezereza Uhoraho, aze abikore nk’uko namwe mubikora. 15 Mwese muze mwisunge amategeko amwe, yaba mwebwe imvukira canke umunyamahanga aba muri mwebwe. Iryo rize ribe itegeko rizokwamaho uko urunganwe ruzogenda rukurakuranwa n’urundi. Mwebwe n’umunyamahanga aba muri mwebwe muri co kimwe imbere y’Uhoraho: 16 Itegeko rimwe n’icagezwe kimwe ni vyo bizogenga mwebwe n’abanyamahanga baba muri mwebwe.’ "

17 Uhoraho abarira Mose ati: 18 "Vugana n’Abisirayeli ubabwire uti: ‘Nimwashika mu gihugu ngiye kubaha 19 hanyuma mugafungura ivyo kurya vy’ico gihugu, muze mukureko ico mushikanira Uhoraho. 20 Muze mukore umukate mw’ifu y’ingano zeze imbere y’izindi, muwushikane nk’ishikanwa ry’ifu mukuye mu ngano za mbere musekuriye ku mbuga. 21 Uko urunganwe ruzogenda rukurikirana n’urundi muze mwame mushikanira Uhoraho iryo shikanwa rivuye mu vyeze imbere y’ibindi.

22 Umuntu niyarenga kw’itegeko na rimwe muri ayo Uhoraho yahaye Mose; 23 ya yandi yose Uhoraho yabategeka ayacishije kuri we, kuva ku musi yatanguriyeko kuyabaha kandi n’ubu akaba akiyabaha gushika uko urunganwe ruzogenda rukurikirana n’urundi; 24 niyaba yabikoze atabishaka abantu bose batabimenye, abantu bose baze batange ishuri ikiri ntoya nk’ikimazi co guturirwa ibe ubumote bwiza bunezera Uhoraho, hamwe na rya shikanwa ry’ifu ryashinzwe na rya shikanwa ry’ibinyobwa, atange n’isuguru y’impene y’ikimazi c’ivyaha. 25 Umuherezi aze atangire ikimazi co gukurako icaha ubwoko bwose bw’Abisirayeli, na bo bazoharirwa, kuko vyakozwe atabigabiye kandi bakaba bashikaniye Uhoraho ikimazi co guturirwa n’ikimazi c’ivyaha ku bw’amakosa yabo. 26 Abisirayeli bose n’abanyamahanga baba muri bo bazoharirwa, kuko abantu bose bazoba bafatanije muri ico gicumuro cakozwe batabigabiye.

27 Ariko umuntu umwe wenyene niyakora icaha atabigabiye, aze azane umwagazi w’impene umaze umwaka umwe w’ikimazi c’ivyaha. 28 Umuherezi aze atangire imbere y’Uhoraho ikimazi gikurako ivyaha uwo muntu yacumuye atabigabiye, ico kimazi niyamara kugitanga, na we azoharirwa. 29 Iryo bwirizwa rimwe rizogenga abantu bose bacumuye batabigabiye, yaba ari imvukira y’Umwisirayeli canke umunyamahanga aba muri mwebwe.

30 Ariko umuntu niyakora icaha ibigirankana, ari imvukira canke umunyamahanga, azoba atutse k’Uhoraho, kandi uwo muntu aze akurwe mu bantu biwe. 31 Kuko azoba yakengereye ijambo ry’Uhoraho agacumura ku vyo yategetswe, uwo muntu ntaze abure gukurwaho; icaha ciwe kizomwomako.’ "

32 Igihe Abisirayeli bari mu bugaragwa, basanze umugabo ariko arasenya inkwi ku musi w’Isabato. 33 Abamufashe ariko arasenya bamuzanira Mose na Aroni n’ikoraniro ryose, 34 baca bamushira mw’ibohero, kuko batari bwamenye ico bomukorera. 35 Nuko Uhoraho abarira Mose ati: "Uwo muntu akwiye gupfa. Ikoraniro ryose nirimutere amabuye inyuma y’aho bacumbitse." 36 Nuko Ikoraniro ryose rimutwara inyuma y’aho bacumbitse bamutera amabuye maze arapfa, nk’uko Uhoraho yari yategetse Mose.

37 Uhoraho abarira Mose ati: 38 "Vugana n’Abisirayeli ubabwire uti: ‘Uko urunganwe ruzogenda rukurikirana n’urundi muze mwame mutera ubuyonga ku misozo y’impuzu zanyu, mushireko n’urunyuzi rw’ubururu ku buyonga bwose. 39 Namwe nimwaraba kuri ubwo buyonga muzokwibuka amategeko yose Uhoraho yabahaye, kugira ngo muyitondere ntimukwegwe n’ivyipfuzo vy’imitima yanyu n’amaso yanyu. 40 Nuko muzokwibuka kwumvira amategeko yanje yose muzobe mwegukiye Imana yanyu. 41 Ndi Uhoraho Imana yanyu, nabakuye muri Egiputa ngo mbe Imana yanyu. Ndi Uhoraho Imana yanyu.’ "