1 Abareyubeni n’Abagadi, ari bo bari bafise amasho menshi n’imikuku myinshi, babona ko intara za Yazeri na Gileyadi zari nziza ku bitungwa. 2 Nuko baza aho Mose, Eliyazeri umuherezi n’abakuru b’abantu bari bari, baravuga bati: 3 "Ibisagara vy’i Ataroti, Diboni, Yazeri, Nimura, Heshiboni, Eliyalehi, Sebamu, Nebo na Beyoni; 4 intara Uhoraho yagabuye mu maboko y’Abisirayeli, ni ahantu heza ku bitungwa, kandi twebwe abasavyi banyu turafise ibitungwa. 5 Nitwaba tugiriwe ubuntu imbere yanyu, twemerere aha hantu hatwegukire nk’umugabane wacu. Twebwe ntitujabuke hakurya ya Yorodani."

6 Mose abarira Abagadi n’Abareyubeni ati: "Abanyu boja mu ntambara namwe mwiyicariye ngaho? 7 Ni kuki mugomba guca intege Abisirayeli ngo ntibajabuke mu gihugu Uhoraho aduhaye? 8 Ivyo ni vyo ba so bakoze igihe nabarungika turi i Kadeshi Baruneya ngo bagende gutata ico gihugu. 9 Bamaze kuduga bajanye akabande k’i Eshikoli bararaba ico gihugu, bagarutse baciye intege Abisirayeli ngo ntibinjire ico gihugu Uhoraho yabahaye. 10 Ishavu ry’Uhoraho ryaraduze aca ararahira kuri uwo musi ati: 11 ‘Kuko batankurikiye n’umutima wose, nta n’umwe mu bantu bafise imyaka mirongo ibiri n’iyirenga yavuye muri Egiputa azobona igihugu nasezeraniye Aburahamu na Isaka na Yakobo; 12 nta n’umwe atari Kalebu mwene Yefune Umunyakenizi na Yosuwa mwene Nuni, kuko bakurikiye Uhoraho n’umutima wose.’ 13 Ishavu ry’Uhoraho ryaraziririnze ku Bisirayeli atuma bayerera mu bugaragwa imyaka mirongo ine, gushika aho urunganwe rwose rw’abari bakoze ibibi mu nyonga ziwe ruherengetera.

14 None ehe raba namwe, mwa kagwi k’abanyavyaha, muhagaze mu kibanza ca ba so mugomba gutuma Uhoraho ashavurira Abisirayeli mbere birengeje. 15 Nimwamutera umugongo, azosubira ate iri hanga ryose muri ubu bugaragwa, kandi ni mwebwe muzoba mubaye impamvu y’uguhona kwabo."

16 Nuko basubira kuza aho ari baravuga bati: "Twagomba kwubaka impongore z’ibitungwa vyacu hano n’ibisagara vy’abagore bacu n’abana bacu. 17 Ariko turiteguye kwambara ibigwanisho no kuja imbere y’Abisirayeli gushika tubashikanye iwabo. Muri ico gihe abagore bacu n’abana bacu bazoba baba mu bisagara vyubakiwe inzitiro, kugira ngo bakingirwe abantu b’iki gihugu. 18 Ntituzotaha ngo tuje mu mazu yacu gushika aho Umwisirayeli wese azoba amaze kuronka umugabane wiwe. 19 Ntituzoronka umugabane hamwe na bo hakurya ya Yorodani, kuko umugabane wacu uzoba uri ngaha mu buseruko bwa Yorodani."

20 Nuko Mose arababarira ati: "Nimwakora uko, nimwambara ibigwanisho imbere y’Uhoraho mukagwana, 21 nimwajabuka Yorodani mwese mwambaye ibigwanisho imbere y’Uhoraho gushika yirukanye abansi biwe, 22 igihugu nicafatwa imbere y’Uhoraho, mushobora kugaruka mukaba abidegemvya imbere y’Uhoraho n’imbere y’Abisirayeli. Kandi aha hantu hazobegukira imbere y’Uhoraho.

23 Ariko nimutakora mutyo, muzoba mucumuye k’Uhoraho; kandi mumenye ko icaha canyu kizobakurikirana. 24 Nimwubake ibisagara vy’abagore banyu n’abana banyu n’impongore z’ibitungwa vyanyu, ariko muze mushitse ivyo mwasezeranye."

25 Abagadi n’Abareyubeni babarira Mose bati: "Twebwe abasavyi bawe tuzokora nk’uko Uhoraho abidutegeka. 26 Abana bacu n’abagore bacu n’amasho yacu n’imikuku yacu bizoguma hano mu bisagara vy’i Gileyadi. 27 Ariko abasavyi bawe, umugabo wese yambaye ibigwanisho, tuzojabuka tugwane imbere y’Uhoraho, nk’uko wabivuze nyakwubahwa."

28 Maze Mose atanga amategeko aberekeye ayaha Eliyazeri umuherezi na Yosuwa mwene Nuni n’abakuru b’imiryango y’Abisirayeli. 29 Arababarira ati: "Abagadi n’Abareyubeni, umugabo wese niyambara ibigwanisho, bakajabukana namwe Yorodani imbere y’Uhoraho, igihe igihugu kizoba kimaze gufatwa, muze mubahe igihugu c’i Gileyadi nk’umugabane wabo. 30 Ariko nibatajabukana namwe bambaye ibigwanisho, baze bemere basangire namwe umugabane i Kanani."

31 Abagadi n’Abareyubeni barishura bati: "Abasavyi bawe tuzokora nk’uko Uhoraho yavuze. 32 Tuzojabuka muri Kanani imbere y’Uhoraho kandi twambaye ibigwanisho, ariko umugabane wacu uzoba hakuno ya Yorodani."

33 Nuko Mose aha Abagadi, Abareyubeni n’igice c’Abamanase bakomoka kuri Yosefu ubwami bwari ubwa Sihoni umwami w’Abamori n’ubwami bwa Ogi umwami w’i Bashani; igihugu cose n’ibisagara vyaho n’intara zihakikije.

34 Abagadi basubira kwubaka Diboni, Ataroti, Aroweri, 35 Aturoti-Shofani, Yazeri, Yogibeha, 36 Beti-Nimura n’i Beti-Harani nk’ibisagara bizitijwe inzitiro, kandi bubaka impongore z’ibitungwa vyabo. 37 Abareyubeni na bo basubira kwubaka i Heshiboni, i Eliyalehi, i Kiriyatayimu, 38 i Nebo, i Bayali-Meyoni (aya mazina yarahinduwe) n’i Sibuma. Ibisagara basubiyemwo baciye babiha ayandi mazina.

39 Abakomoka mu ruvyaro rwa Makiri mwene Manase baja i Gileyadi, barahafata basohora Abamori bari ngaho. 40 Nuko Mose aha Gileyadi Abamakiri, bakomoka kuri Manase, baca barahaba. 41 Yayiro, wo mu ruvyaro rwa Manase, afata ibigwati vyaho aca avyita Havoti Yayiro risobanurwa ngo ibigwati vy’i Yayiro. 42 Noba afata i Kenati n’ibigwati bihakikije aca ahita Nobati nk’uko izina ryiwe ryari.