1 Uku ni ko urugendo rw’Abisirayeli rwagenze uhereye igihe bava muri Egiputa bari mu migwi barongowe na Mose na Aroni. 2 Mose yandika aho baciye hose mu rugendo rwabo abitegetswe n’Uhoraho. Aha ni ho bagiye barahagarara:

3 Abisirayeli bavuye i Ramusesi ku musi ugira icumi na gatanu w’ukwezi kwa mbere, umusi wakurikira Pasika. Basohokana icubahiro imbere y’Abanyegiputa babaraba, 4 bariko barahamba imfura zabo, Uhoraho yari yahoneje; kuko Uhoraho yari yaciriye urubanza imana zabo.

5 Abisirayeli bava i Ramusesi bacumbika i Sukoti.

6 Bava i Sukoti bacumbika i Etamu, ku nkengera y’ubugaragwa.

7 Bava i Etamu, basubira inyuma baja i Pi Hahiroti, berekeye mu buseruko bw’i Bayali-Zefoni, baca bacumbika hafi y’i Migidoli.

8 Bava i Pi Hahiroti baca mu kiyaga bashika mu bugaragwa, bamaze kugenda imisi itatu mu bugaragwa bw’i Etamu, bacumbika i Mara.

9 Bava i Mara baja i Elimu, hari amariba icumi n’abiri n’ibigazi mirongo indwi, baca bacumbikaho.

10 Bava i Elimu bacumbika ku Kiyaga Gitukura.

11 Bava ku Kiyaga Gitukura bacumbika mu bugaragwa bw’i Sini.

12 Bava mu bugaragwa bw’i Sini bacumbika i Dofuka.

13 Bava i Dofuka bacumbika i Alushi.

14 Bava i Alushi bacumbika i Refidimu, aho abantu babuze amazi yo kunywa.

15 Bava i Refidimu bacumbika mu bugaragwa bw’i Sinayi.

16 Bava mu bugaragwa bw’i Sinayi bacumbika i Kiburoti Hatayava.

17 Bava i Kiburoti Hatayava bacumbika i Hazeroti.

18 Bava i Hazeroti bacumbika i Rituma.

19 Bava i Rituma bacumbika i Rimoni Peresi.

20 Bava i Rimoni Peresi bacumbika i Libuna.

21 Bava i Libuna bacumbika i Risa.

22 Bava i Risa bacumbika i Kehelata.

23 Bava i Kehelata bacumbika ku Musozi Sheferi.

24 Bava ku musozi Sheferi bacumbika i Harada.

25 Bava i Harada bacumbika i Makeloti.

26 Bava i Makeloti bacumbika i Tahati.

27 Bava i Tahati bacumbika i Tera

28 Bava i Tera bacumbika i Mituka

29 Bava i Mituka bacumbika i Hashimona.

30 Bava i Hashimona bacumbika i Mosera

31 Bava i Mosera bacumbika i Bene Yayakani.

32 Bava i Bene Yayakani bacumbika Hori Hagidugadi.

33 Bava i Hori Hagidugadi bacumbika i Yotubata

34 Bava i Yotubata bacumbika i Aburoma.

35 Bava i Aburoma bacumbika i Eziyoni Geberi.

36 Bava i Eziyoni Geberi bacumbika i Kadeshi, mu bugaragwa bw’i Zini.

37 Bava i Kadeshi bacumbika ku musozi Hori, ku rubibe rwa Edomu. 38 Aroni umuherezi aduga ku musozi Hori abitegetswe n’Uhoraho, ari ho yapfiriye ku musi wa mbere w’ukwezi kwa gatanu w’umwaka ugira mirongo ine Abisirayeli bavuye muri Egiputa. 39 Aroni yari amaze imyaka ijana na mirongo ibiri n’itatu igihe yapfira ku musozi Hori.

40 Umwami w’Umunyakanani yatwara i Aradi, yaba muri Negebu ho muri Kanani, yumva ko Abisirayeli bariko baraza.

41 Bava ku musozi Hori bacumbika i Zalumona.

42 Bava i Zalumona bacumbika i Punoni.

43 Bava i Punoni bacumbika i Oboti.

44 Bava i Oboti bacumbika i Iye Abarimu, ku rubibe rwa Mowabu.

45 Bava i Iye Abarimu bacumbika i Diboni Gadi.

46 Bava i Diboni Gadi bacumbika i Alumoni-Dibulatayimu.

47 Bava i Alumoni-Dibulatayimu bacumbika mu misozi y’i Abarimu, hafi y’i Nebo.

48 Bava mu misozi y’i Abarimu bacumbika mu biyaya vy’i Mowabu ku nkombe ya Yorodani, aharabana n’i Yeriko. 49 Bacumbitse hafi ya Yorodani mu biyaya vy’i Mowabu, kuva i Beti-Yeshimoti gushika i Abeli-Shitimu.

50 Mu biyaya vy’i Mowabu i ruhande ya Yorodani n’i Yeriko hakurya ya Yorodani Uhoraho abarira Mose ati: 51 "Vugana n’Abisirayeli ubabwire uti: ‘Nimwajabuka Yorodani muja i Kanani, 52 muze musohore ababa muri ico gihugu bose. Muze mumenagure ibishushanyo bibajwe mu mabuye canke bicuzwe mu butare vy’ibigirwamana vyabo, musambure n’ibibanza vyabo vyo gusengeramwo ku misozi. 53 Muze mufate ico gihugu mukibemwo, kuko ndabahaye ico gihugu ngo kibe icanyu. 54 Muze mugabuze ico gihugu ubufindo, nk’uko imiryango yanyu iri, ku mugwi munini muze mutange umugabane munini, n’umugwi muto muwuhe umugabane muto. Aho ubufindo buzokwerekana hazoba ari ahabo mukigabure mukurikije amazu ya ba sogokuruza banyu.

55 Ariko nimutirukana ababa muri ico gihugu, abo muzosigaza bazoba nk’amahwa mu maso yanyu no mu mbavu zanyu. Bazobateza amagorwa mu gihugu mugiye kubamwo. 56 Nanje nzokorera mwebwe ivyo niteguye gukorera abo.’ "