1 Nutsɔ, moo bu ye pɛɛ kpami ɔ tue. I ye anɔkuale nɛ i pee nɔ́ nɛ da, lɔ ɔ he je ɔ, moo ye ye sane ɔ ha mi. Moo bu ye ngmlaa kpami ɔ tue. 2 Moo wo mi nguɔ ngɛ ma hɛ mi, ejakaa dami sane yelɔ ji mo. 3 O ka mi nɛ o hyɛ ha nɛ o na kaa i hi. O ba slaa mi nyɔ mi be mi nɛ o na kaa i be yi mi tomi yaya ko ngɛ ye mi, o na kaa i tu anɔkuale. 4 I ye o mlaa amɛ a nɔ nɛ i kɛ yayami peeli bɔɛ. 5 Ye nane tlɛ kɛ ji o blɔ ɔmɛ a nɔ.

6 Oo Mawu, mɛni he je nɛ i ngɛ sɔlee kikɛ ɔ? Ejakaa i le kaa o ma ha mi heto. Moo bu ye sɔlemi ɔ tue! 7 Mo je o suɔmi nɛ nya wa a kpo kɛ tsɔɔ mi ngɛ nyakpɛ blɔhi a nɔ, mo Yiwamihelɔ nɛ jeɔ nihi kulaa kɛ jee a he nyɛli a dɛ mi. 8 Moo baa ye yi kaa a baa hɛ ngmɛ yi. Moo gba bu ye nɔ nɛ o wo mi ngɔ laa ngɛ o pɛli sisi bɔ nɛ pee nɛ he nyɛli a nine nɛ ko su ye nɔ.

9 Ejakaa muɔ sɛ ye he nyɛli ɔmɛ a hɛ mi nɛ a hɛ tsu wo ye he. 10 Mɔbɔ nami ko be a mi, nɛ a woɔ a he nɔ. Hyɛ bɔ nɛ a ngɛ fiãe ha! 11 Jehanɛ ɔ lɛɛ a po sá wo ye he nɛ a nu mi ta. E piɛ nɛ a ma wo mi ngɔ fia si. 12 A ngɛ kaa jatahi nɛ ngɛ hlae nɛ a gba ye lo, aloo jata bimɛ nɛ wo ka ngɛ mlɛe nɛ a maa nu lohwe.

13 Nutsɔ, tee si kɛ kpee mɛ. Moo tsiɛ mɛ kɛ ya se nɛ o poo mɛ kɛ pue si. Ba nɛ o ba he mi kɛ je je mi bi nɛ ɔmɛ nɛ je mi ní nami pɛ ji a kɔmɔ ɔ a dɛ. 14 Nimli nɛ ɔmɛ nɛ mo nɔuu nɛ o dloo mɛ níhi slɔɔtohi, nɛ o ha nɛ a bimɛ kɛ a bibimɛ na ni nɛ a na he jɔmi ɔ.

15 Ami lɛɛ je nɛ ɔ mi ní nami pee we mi akɔnɔ; nɔ́ nɛ hia mi ji kaa i kɛ mo wa kpɛti nɛ da, nɛ ke i pue ngɛ hiɔwe hwɔɔ se ɔ, ma na o hɛ mi. Enɛ ɔ mohu nɛ ma ha mi bua jɔmi.