1 Oo Mawu, hyɛ bɔ nɛ matsɛ ɔ bua jɔɔ e he ngɛ o he wami ɔ nya. Bɔ nɛ e ngɛ nyae, ejakaa o he e yi wami. 2 O ha lɛ níhi nɛ e bi mo ɔ, nɛ o ha e tsui nɔ e mi.

3 O wo lɛ ngɔ hi matsɛ sɛ ɔ nɔ, nɛ o dloo lɛ ní kpakpahi kɛ nɔ yami. O bu lɛ matsɛ pɛɛ nɛ a kɛ sika tsu kpakpa pee. 4 E bi wami se kɛmi kɛ si himi kpakpa, nɛ o wo ngɔ dloo lɛ. E wami ligbi ɔmɛ a se be poe gbleegbleegblee. 5 O ha e na biɛ kpakpa kɛ anunyami. Nɛ o wlua lɛ kɛ afɛu kɛ agboje níhi. 6 O dloo lɛ neneene bua jɔmi nɛ e ma na ngɛ o mi daa. 7 Nɛ akɛnɛ matsɛ ɔ wo e hɛ kɛ fɔ Mawu nɔ he je ɔ, e be nɔ́ tɛe nɛ e be si hu nɔe ligbi ko, ejakaa nɔ nɛ e kpasa ji Mawu nɛ pe mawuhi kulaa a, e suɔmi nɛ e kɛ suɔ lɛ ɔ be nyagbe.

8 Oo neneene Tsɛ, o nine maa gbe o he nyɛli kɛ ni nɛmɛ nɛ sume mo ɔ tsuo. 9,10 Ke o je o he kpo ɔ, o hɛ mi la a ma kpata mɛ kɛ a bimɛ tsuo a he mi. 11 Ejakaa nimli nɛ ɔmɛ ngɛ o he ga toe, Tsaatsɛ, se e ma kpa bu a nɔ. 12 A maa tu fo nɛ a maa gbɛ kɛ fĩa ke a na o kɛ̃ɛ̃ ɔ nɛ o ka kɛ ma a nɔ ɔ.

13 Tsaatsɛ Mawu, wa ngɛ o yi jee ngɛ o anunyami he wami ɔ he. Wa maa po lahi nɛ wa kɛ kai o ni nguahi nɛ o pee ɔmɛ.