1 Mawu nɔ́ ji je ɔ kɛ e mi nɔ́ tsuaa nɔ. 2 Lɛ nɛ e tsiɛ wo ɔmɛ kɛ ya se nɛ e ha nɛ zugba gbigbli je kpo.

3 Mɛnɔ maa kuɔ Mawu yoku ɔ, nɛ e maa sɛ e hi he ɔ? Nɛ mɛnɔ maa da Mawu hɛ mi? 4 Ja nihi nɛ a tsui mi tsɔ, a gbi nɔmlɔ, a yeɔ anɔkuale nɛ a kã we lakpa kita. 5 Mawu maa jɔɔ nimli nɛ ɔmɛ, nɛ e ma he a yi wami. Nɛ lɛ kɛ e maa wo mɛ nguɔ. 6 Nimli kaa kikɛ ɔmɛ nɛ a ngɛ he blɔ nɛ a daa Yakob Mawu ɔ hɛ mi nɛ a jaa lɛ.

7 Blema agbohi, nyɛ bli nɛ Anunyami Matsɛ ɔ nɛ e sɛ mi. 8 Mɛnɔ ji Anunyami Matsɛ nɛ ɔ? Lɛ ji Mawu Ope kɛ he walɔ nɛ a yi e nɔ ngɛ ta mi. 9 Nyɛ bli blema agbo ɔmɛ gbajaa nɛ Anunyami Matsɛ ɔ nɛ e sɛ mi.

10 Mɛnɔ ji Anunyami Matsɛ nɛ ɔ? Lɛ ji hiɔwe ta hwuli tsuo a Tatsɛ. Lɛ ji Anunyami Matsɛ ɔ nɛ.