1 Tsaatsɛ Mawu, i ngɛ o yi jee, ejakaa o he ye yi wami kɛ je ye he nyɛli ɔmɛ a dɛ mi. O ha we nɛ a ye ye nɔ kunimi. 2 Oo Tsaatsɛ, ye Mawu, i kpa mo pɛɛ ke o tsa mi, nɛ o ha i na he wami ekohu. 3 O kpale mi kɛ je gbenɔ muɔ nya, kɛ je gbenɔ nitsɛ dɛ mi, nɛ o ha mi wami ekohu.

4 Oo, nyɛ la nɛ nyɛ je e yi, nyɛ he tsɔli ɔmɛ. Nyɛ kai níhi nɛ e tsu ha nyɛ ɔmɛ, nɛ nyɛ je e biɛ klɔuklɔu ɔ yi. 5 E abofu se kɛ we; nɛ e mɔbɔ nami ngɛ daa. Wa ma fo ya nyɔnyɔɔnyɔ se mɔtu pɛ bua jɔmi ba.

6,7 Benɛ i na ye he ɔ, i de ke, "Enɛ ɔ lɛɛ e se be poe. Nɔ́ ko be ye nya tsie amlɔ nɛ ɔ. Mawu na mi mɔbɔ. E ngɔ mi kɛ da si kpɛii kaa yoku." Tsaatsɛ, kɛkɛ nɛ o ngmɛɛ ye he, nɛ o po o jɔɔmi ɔ se ngɛ ye nɔ. Kɛkɛ nɛ kã je ye mi nɛ gbeye nu mi. 8 Oo Mawu, i kpa ngmlaa kɛ tsɛ mo, nɛ i fa kue ha mo hluu nɛ i bi ke, 9 "Oo Tsaatsɛ, mɛni se o ma na ngɛ ye gbenɔ he? Kɛ ma pee kɛ je o yi kɛ ha ye huɛmɛ kɛɛ? Kɛ ye gbogboe maa pee ngɛ muɔ mi kɛ ye o anɔkuale yemi ɔ he odase kɛ ha je ɔ kɛɛ? 10 Moo bu mi tue, Mawu, nɛ o na mi mɔbɔ, nɛ o ye kɛ bua mi." 11 Kɛkɛ nɛ e ha nɛ ye aywilɛho yemi ɔ plɛ bua jɔmi. E tsake ye aywilɛho yemi tade ɔmɛ nɛ e ngɔ nyami tadehi kɛ wo mi, 12 konɛ ma la bua jɔmi lahi kɛ ha Mawu, pe bɔ nɛ i ma hwɔ si ngɛ gbogboe muɔ mi dii. Oo Tsaatsɛ ye Mawu, i ma na mo si daa.