1 Benyamin otii saawɛntɛ onwii lawɛ, leyooto nɔɔ niale Kis. Ote niale Abiel, ɔwa nɔɔ niale Sero nɛ. Sero ote niale Bekorat, ote kafɔɔ niale Afia wɔ niakye ni Benyamin leyo kamɛ nɛ. 2 Kis lawɛ obisuɔtɔbi onwii, leyooto nɔɔ niale Saul nɛ. Aale okosopo wɔ di okle-nɔɔ ditawɛ ni di Israel batii kamɛ-aakaana aalenkee otii biala.

3 Ninfɛ di Saul ote, Kis babɔkɛɛ nɔɔ ba nintuka ni atoo layu nɛ, ni di Kis latɔkɔ obisuɔtɔbi nɔɔ Saul alɛ, "Kpaa kpɛmblatɛ onwii biɛkyɛ minko nwɔ bilawolaa babɔkɛɛ ba nintuka ni atoo nwu." 4 Nioso baafe di Efraim kale lekpenkpe, baafe di Salisa ntɛɛ nwu, kafɔɔ batanya ma. Baakple baabuo di Saalim kasɔ, kafɔɔ babɔkɛɛ ba nintuka ni atoo ditawɛ ninfa. Ninfɛ baafe di Benyamin kasɔ suoto nɛ, kafɔɔ batanya ma.

5 Obe wɔ baadu ni Suf kasɔ suoto, Saul latɔkɔ kpɛmblatɛ wɔ niawɛ ni di ɔkyɛ nɔɔ alɛ, "Wa buokple busifi, nse diele nkpo teemi kamadiɛ disi obu di babɔkɛɛ nwu suoto ankyako ɔyɛkɛ ɔta wo."

6 Kafɔɔ kpɛmblatɛ nwu ladiki kanya alɛ, "Nyu lo, Yaa otii onwii nkpe di okpoo wɔ mmle; batii mbu nwɔ osie kanya, ɔlaa lele kafɔɔ eebuɛ nnwa kaanya. Ta bukyɛ nfa nunua. Loo bia abatuo wo osuku wɔ buoofe nii."

7 Ni di Saul lakaalɛ kpɛmblatɛ nɔɔ nwu alɛ, "Nse buɔkyɛ, lɛ bubata osuɔtɔ nwu? Alesaa ya di atofo loo kamɛ ntooloo. Lɛkyɛsaa kuninwii nnaa wo buayɔ munkyɛnko ni Yaa otii nwu. Obe lɛsaa ninkpe wo?"

8 Ni di kpɛmblatɛ nwu lakple aadiki kanya alɛ, "Nyu, nkle koto fututu dikyuu naafa. Kamayɔ ni nta Yaa otii nwu di mmle abatɔkɔ wo ni osuku wɔ buafe nii." 9 (Saa di Israel, nse otii lɛkyɛ lɛsaa owolaa di Yaa nfũ yi, ambuɛ alɛ, "Biwa buɔkyɛ asaanyatɛ nfũ." Diekye miɛ Yaa ɔlaa buɛtɛtɛ baatɔɔlɛɛ asaanyatɛ nɛ.)

10 Ninfɛ di Saul latɔkɔ kpɛmblatɛ nɔɔ alɛ, "Kulɛ, wa buɔkyɛ." Nioso baadie baasifi okpoo wɔ di Yaa otii nwu lawɛ nii.

11 Baatɔɔkata ni lekpenkpe baatoofe ni okpoo nwu, baakyakako basankobi bawo kɔwa ntu odu, ni baakaalɛ ma alɛ, "Nfũ di asaanyatɛ nwu nkpe nɛ?"

12 Ni baadiki kanya alɛ, "Akpe, akpe di sitũ lee. Bipɛsɛwa; kanunua nwu ɔɔwa okpoo loo nɛ. Diekye batii nwu nkpe oleɔta di olekatakɔ nwu. 13 Nse biebuo obuo okpoo nwu, bibanyɔɔ fiɛ abasifi olekatakɔ nwu anaale alesaa. Batii nwu dilɔbakye alesaa kalesɔ diɛlaase di obe wɔ abawa nii, diekye dikpeni eewii lɛtɔtrɔ di oleɔta nwu suoto; fiɛ sɛɛmaa, mba bɛɛlɛɛ ni kamale. Bikata bikyɛ nunua; bibanyɔɔ di obe wɔ mmle kamɛ."

14 Ni baakata baasifi okpoo nwu nɛ. Baatoobuo nwu nii, Samuel nɛ, aatɔɔwa di anu lɛma, akyɛ di osuku nwu ɔɔkata anfe olekatakɔ nwu.

15 Fiɛ di kale kamasɛ ni dii le di Saul lawa nii, SAATE nwu ladiki nle mmle aatuo Samuel alɛ: 16 "Kɔsɛɛ fɛ nuakpa okle kamakyesee fɔ osuɔtɔ onwii eekye ni Benyamin kasɔ suoto. Pɛ nwɔ ɔfɔɔ, aale tunletɛ di batii nii Israel suoto; nnwɔɔ nimadiki batii nii ankyeko Filisti batii nnɛɛ nɛ. Ntɔɔnya batii nii dibuo, diekye kaku lɛma ntoodu mi."

17 Obe wɔ di Samuel anu layefe ni di Saul suoto, SAATE nwu latɔkɔ nwɔ alɛ, "Nnya osuɔtɔ wɔ suoto lakakatɛ lakyeko ni; nnwɔɔ nimale sɛka di batii nii suoto nɛ."

18 Ninfɛ di Saul latɛɛtɛɛ Samuel di okpoo nwu kasukunya aatɔkɔ nwɔ alɛ, "Lekoto faafuo mi otuo lɛba le di asaanyatɛ nwu leyo nkpe ni."

19 Ninfɛ di Samuel ladiki kanya alɛ, "Ami ninle asaanyatɛ nwu nɛ, le mi katũ faakata fasifi olekatakɔ nwu, diekye miɛ fabale alesaa ku ami. Olesɛ kafɔɔ kamatɔkɔ fɔ kafɔɔ sɛlaa se simuu ninsi ni di otu lɛfɔ kamɛ, ninta fɔ fansifi. 20 Kafɔɔ di babɔkɛɛ ba nintuka ni atoo ba nieyu ye ni miɛ dii tiɛfa suoto yi, tanta diabuo fɔ suoto di suoto lɛma; batɔɔnya ma. Ni owe ɔkyɛ nfɛ di Israel dibiesaa kamakyi ninfe, nse diele afɔ ku teefɔ leyo batii bamuu ɔkyɛ?"

21 Ninfɛ di Saul ladiki kanya alɛ, "Kafɔɔ diele Benyamin otii nle, lekye ni Israel kɔna biibii kamɛ, kafaabi nii kafɔɔ ninle kabiibii di nfaabi be mmuu di Benyamin kɔna kamɛ? Be kanya oso fambuɛ ɔlaa nwu okle fantɔkɔ mi?"

22 Ninfɛ di Samuel lakpaa Saul ku kpɛmblatɛ nɔɔ aabuoko lɛkpata nwu kamɛ nɛ, aata ma baasiɛ di mba baalɛɛ ni di opunu katũ disi- lɛpɔ lɛma labla fɛ afosi-atiɛ. 23 Ni di Samuel latɔkɔ alesaa-wantɛ nwu alɛ, "Yɔ lɛnankudi le lata fɔ ni fawakoe, nle latɔkɔ fɔ nlɛ diki fatɛ ni lete."

24 Nioso alesaa-wantɛ nwu layɔ kutĩ ku n-ya niakaa ni di suoto aabase di Saul anu. Ni di Samuel labuɛ alɛ, "Nnya lɛsaa le bɛɛyɔ bɛɛtɛ fɔ ni. Wee, diekye baadiki sĩ baatɛ lete baata fɔ, baata ni ɔsaabla wɔ mmle. Diayɔ ni di obe wɔ labuɛ ni nlɛ, ‘Nkpe ni bafɔɔ ba lɛkyakako nii.’ " Ninfɛ di Saul lale alesaa ku Samuel di dii nwu nɛ.

25 Baasoo baakye ni olekatakɔ nwu baawa ni okpoo, Samuel lakakatɛko Saul di leyo nɔɔ lɛkya osi. 26 Baataka kolesɛtũ, ni di Samuel lalɛɛ Saul di lɛkya osi aatɔkɔ alɛ, "Lolaa suoto, kamata fɔ fanyefe osuku lɛfɔ." Obe wɔ di Saul laloo ni suoto ololaa, ninfɛ di nnwɔɔ ku Samuel baadie baafe kayi banyɔ lɛma nɛ. 27 Baatoosoo baatoofe ni okpoo-lɔɔkɔ yi, ni di Samuel latɔkɔ Saul alɛ, "Tɔkɔ kpɛmblatɛ lɛfɔ nwu aale wo katũ"- ni di kpɛmblatɛ nwu labla nkpo nɛ- "Kafɔɔ afɔ siɛ ninfũ kɛɛkɛ, di mmle katɔkɔ fɔ ni kanya ka niekye ni Yaa nfũ."