10 Nipele ŵatesile mpela iŵatite kusalilwa, ŵasijigele ng’ombe siŵili sila ni kusitaŵila mutuka, ni ŵanache ŵakwe ŵaalesile mu lichinga. 11 Ŵaliŵisile lisanduku lya lilangano lya Ambuje Akunnungu mmutuka mo pamo ni lisanduku lyana inyago ya sahabu yelandane ni mapuku ni aila inyago ya yakwimbila. 12 Ng’ombe sila syagambile kwaula ku musi wa ku Beti Shemeshi pangali kugalauchila kulyo atamuno kunchiji, syaliji nkulila pisyajaulaga. Ilongola ŵa Ŵafilisiti ŵala ŵaakuilisye mpaka mumpika wa ku Beti Shemeshi.

13 Ŵandu ŵa ku Beti Shemeshi ŵaliji nkugungula ngano mu chiŵata. Paŵanyakwile mitwe jawo ni kulolechesya ŵaliweni lisanduku lya lilangano lya Ambuje Akunnungu, ni ŵasangalele kwannope. 14 Mutuka jo jajawile kungunda wa che Yoshua, mundu juŵatamaga ku Beti Shemeshi. Palyaiche pelepo lyajimi chiŵandika ni liganga lyekulungwa. Ŵandu ŵajipaswile sasu mutuka jila, nipele ŵasikite ngombe syo ni kusityosya mbopesi jakutinisya kwa Ambuje Akunnungu. 15 Nombe Ŵalawi ŵalitulwisye lisanduku lya lilangano lya Ambuje Akunnungu ni alila lisanduku lyalili ni inyago ya sahabu ni kuiŵika pachanya pa liganga lyekulungwa lila. Nipele pa lyuŵa lyo ŵandu ŵa ku Beti Shemeshi ŵapeleche mbopesi syakutinisya ni mbopesi sine kwa Ambuje Akunnungu.