Nunei Reantenangfo 26

Isaki niayai na nu inontarai Filistini foi

1 Na rahida bei kaharifoi miung na katai Isaki niayai naifoi, toyari ne dariai kawurua na rabuang bo Abrahami minohi darangfo. Ampefe Isaki da to Gerari, kataio inontarai Filistini ene mananu Abimeleki niayai naifoi. 2 Mayeai Yahwei deinawi netarai wei tuti medu wei deyo, "Wiro ro to Mesiri fanai. Nayai na kataio Yeisaharai we wau nei. 3 Na katai nini nayai we inontarai aisei. Yau ambori iwe riria wau tuti Imoang wau. Weo katai nini sentenang ambori Yohongni we wau tuti nemu ririanei. Tuti Yau ambori Yohong kariri kaiwo faforao Yohongnai kawurua we nemu dai Abrahami ne. 4 Yau ambori inari nemu ririanei bitoya netarai toyari awaha na rorafaisi. Tuti ambori Yohong katai nini sentenang we nemu ririanei. Tuti na nemu ririanei, kaiwasa na nunei sentenang esobu moangfo.✝26:3-4 Nun. 22:16-18. 5 Weo nemu dai Abrahami tarao Nehu kaiwone kawurua ampa. I niari kariri fi kiaio Yemi weafo, Nehu kaiwo kutuane, tuti Nehu kaiwo aunau ne." 6 Ampefe Isaki niayai na Geraria.

7 Na kutu inontarai Gerari fosa etutangni we Ribkai, Isaki yoa wesa deyo, "Rorohuwing dine." Weo Isaki mitai yoa we ne wiwing dine, enetituaitai dohonao inontarai fosa na katai nani emungnife tuti eha Ribkai, weo ureng bohi paria.✝26:7 Nun. 12:13; 20:2.

8 Isaki kawurua niayai na wanai wairoi kuteaia. Na rahida bei, Abimeleki mananu inontarai Filistini foi doari deti na suwireifoi aweu, na tantuma deti Isaki fiaung ne wiwingno Ribkai.